Heremaia 50 - Paipera Tapu 2012

He Whakawātanga ki Papurōna

¹ Ko te kupu i kōrerotia e Ihowā mō Papurōna, mō te whenua o ngā Karari, i puaki i a Heremaia poropiti:

² “Kauwhautia i roto i ngā tauiwi, pānuitia, ā, ka whakaara he kara; pānuitia atu, kaua e hunā, mea atu: ‘Kua horo a Papurōna, kua whakamā a Pere, kua pororaru a Meroraka. Kua whakamā āna whakapakoko, kua wehi āna whakaahua.’

³ Nō te mea kei te haere mai he iwi ki a ia i te raki, māna e ururua ai tōna whenua. E kore anō tētahi e noho ki reira; kua rere rātou, kua heke, te tangata, te kararehe.

⁴ “I aua rā, i taua wā hoki,” e ai tā Ihowā, “ka haere mai ngā tama a Īharaira, rātou tahi ko ngā tama a Hūrā; ka haere rātou me te tangi haere, ā, ka rapu i a Ihowā, i tō rātou Atua.

⁵ Tērā rātou e ui mō Hiona, me te anga anō ō rātou kanohi ki reira, me te kī, Haere mai koutou, ka hono i a koutou ki a Ihowā, i runga i te kawenata mau tonu, e kore e wareware.

⁶ “Ko tāku iwi he hipi ngaro; nā ō rātou hēpara rātou i kotiti kē ai, nā rātou hoki rātou i tahuri kē ai i runga i ngā maunga. Kua haere atu rātou i te maunga ki te pukepuke, kua wareware ki tō rātou takotoranga.

⁷ Kua kainga rātou e te hunga katoa i kite i a rātou; ā, kua mea ō rātou hoariri, ‘Kāhore ō tātou hē, kua hara nei hoki rātou ki a Ihowā, ki te nohoanga o te tika, arā ki a Ihowā, ki tā ō rātou mātua i tūmanako ai.’

⁸ “Rere atu i roto i Papurōna, heke atu i te whenua o ngā Karari, ā, kia rite ki ngā koati toa i mua i ngā kāhui.

⁹ Nō te mea, nanā, ka whakaarahia e ahau, ka whakaekea hoki ki Papurōna he huihuinga o ngā iwi nunui nō te whenua ki te raki; ā, ka takoto ō rātou matua hei whawhai ki a ia; ka horo ia i reira. Ka rite ā rātou pere ki ā te mārohirohi mōhio; e kore tētahi e hoki kau mai.

¹⁰ Ā, ka pāhuatia a Karari; ka tatū ngā ngākau o te hunga katoa e pāhua ana i a ia,” e ai tā Ihowā.

¹¹ “Nō te mea e koa ana koutou, nō te mea e whakamanamana ana koutou, e te hunga e pāhua nei i tōku kāinga tupu, nō te mea e tākarokaro ana koutou, pērā i te kau kūao e takahi ana i te wīti, e tangi ana pērā i ngā hōiho kaha;

¹² ka nui rawa te whakamā o tō koutou whaea; matangerengere ana te wahine i whānau ai koutou. Nanā, ko ia hei muri rawa o ngā iwi, hei koraha, hei whenua waikore, hei ururua.

¹³ He riri nō Ihowā e kore ai e nohoia, engari, ka waiho hei ururua katoa a reira. Ko ngā tāngata katoa e tika ana nā Papurōna ka mīharo, ka hī ki ōna whiunga katoa.

¹⁴ Whakatakoto i ō koutou matua hei whawhai ki Papurōna, ki tētahi taha, ki tētahi taha, e te hunga whakapiko kōpere katoa; kōpere atu ki a ia, kaua e kaiponuhia ngā pere; kua hara hoki ia ki a Ihowā.

¹⁵ Hāmama ki a ia i tētahi taha, i tētahi taha! Kua whakangāwari ia i a ia; kua hinga ōna parepare, kua oti ōna taiepa te wāhi iho. He rapunga utu hoki nā Ihowā; he rapua he utu i a ia; kia rite ki tāna i mea ai tā koutou e mea ai ki a ia.

¹⁶ Hātepea atu te kairui i roto i Papurōna, me te kairahurahu o te toronaihi i te wā e kotia ai te wīti. He wehi nō rātou i te hoari tūkino, ka tahuri ki tōna iwi, ki tōna iwi, rere ana rātou ki tōna whenua, ki tōna whenua.

¹⁷ “He hipi a Īharaira i marara atu; kua āia atu ia e ngā raiona. I te tuatahi nā te kīngi o Ahiria ia i kai. I te whakamutunga nā tēnei Nepukareha kīngi o Papurōna ōna wheua i wāhi.”

¹⁸ Mō reira ko te kupu tēnei a Ihowā o ngā mano, a te Atua o Īharaira: “Nanā, ka whiua e ahau te kīngi o Papurōna me tōna whenua, ka pērā me tāku whiunga i te kīngi o Ahiria.

¹⁹ Ā, ka whakahokia e ahau a Īharaira ki tōna takanga, ā, ka kai ia ki runga ki Karamere, ki Pahana, ka mākona hoki tōna wairua ki runga ki ngā pukepuke o Ēparaima, ki Kireara.

²⁰ I aua rā, ā, i taua wā,” e ai tā Ihowā, “ka rapua te hē o Īharaira, ā, kāhore noa iho; ngā hara hoki o Hūrā, ā, e kore e kitea. Ka murua hoki e ahau te kino o te hunga ka whakatoea nei e ahau.

²¹ “Haere atu ki te whenua o Merataimi, ki reira tatau ai, ā, ki ngā tāngata hoki o Pekoro. Whakamōtītia, whakangaromia rawatia, whāia rātou,” e ai tā Ihowā, “mahia hoki ngā mea katoa i whakahaua e ahau ki a koe.

²² He ngangau nō te whawhai kei te whenua, he whakangaromanga nui.

²³ Tōna poroporonga rawatanga, wāwāhia ana te hama o te ao katoa! Tōna ururuatanga o Papurōna i roto i ngā tauiwi!

²⁴ I whakatakotoria e ahau he māhanga mōu, ā, kua mau koe, e Papurōna, kīhai hoki koe i mōhio; kua kitea koe, kua hopukia hoki, mōu i totohe ki a Ihowā.

²⁵ Kua whakapuaretia e Ihowā tōna whare taonga, kua whakaputaina mai e ia ki waho ngā patu o tōna riri: he mahi hoki tā te Ariki, tā Ihowā o ngā mano, hei mahinga ki te whenua o ngā Karari.

²⁶ Haere mai ki a ia i te pito rawa rā anō, whakapuaretia ōna toa; opehia ake hei pūranga, whakangaromia rawatia; kaua rawa he wāhi ōna e mahue.

²⁷ Patua ana pūru katoa; tukua rātou kia haere ki raro ki te patunga. Auē te mate mō rātou! Kua tae mai hoki tō rātou rā, te wā e whiua ai rātou.

²⁸ Ko te reo o te hunga e rere ana, e mawhiti ana i te whenua o Papurōna, hei kōrero ki te whenua o Hiona i te rapu utu a Ihowā, a tō tātou Atua, i te rapu utu mō tōna temepara.

²⁹ “Kārangarangatia kia hui ngā kaikōpere ki te tatau ki Papurōna, te hunga katoa e whakapiko ana i te kōpere. Whakapaea tēnā pā, karapoi noa; kaua rawa tētahi ōna e mawhiti; utua tāna mahi; kia rite ki ngā mea katoa i mea ai ia tā koutou e mea ai ki a ia; nō te mea kua whakapehapeha ia ki a Ihowā, ki te Mea Tapu o Īharaira.

³⁰ Mō reira ka hinga āna taitama ki ōna huarahi, ā, ka whakamōtītia āna tāngata whawhai katoa i taua rā,” e ai tā Ihowā.

³¹ “Nanā, hei hoariri ahau mōu, e te mea whakakake,” e ai tā te Ariki, tā Ihowā o ngā mano, “nō te mea kua tae mai tōu rā, te rā e whiua ai koe e ahau.

³² Ā, ka tūtuki ngā waewae o te mea whakapehapeha, ka hinga, ā, kāhore he kaiwhakaara mōna: ā, ka ngiha i ahau he ahi ki roto ki ōna pā, ā, ka pau i tērā ngā mea katoa i tētahi taha ōna, i tētahi taha.”

³³ Ko te kupu tēnei a Ihowā o ngā mano: Kei te tūkinotia ngātahitia ngā tamariki a Īharaira, rātou ko ngā tamariki a Hūrā; ā, kei te puritia rātou, mau rawa, e ō rātou kaiwhakarau; e kore rātou e pai ki te tuku i a rātou.

³⁴ He kaha tō rātou kaihoko; ko Ihowā o ngā mano tōna ingoa. Ka whakapaua e ia te tohe i tā rātou tohe, kia hoatu ai e ia he tānga manawa ki te whenua, ā, he ohooho ki ngā tāngata o Papurōna.

³⁵ “Kei runga i ngā Karari te hoari,” e ai tā Ihowā, “kei runga anō i ngā tāngata o Papurōna, kei runga i ōna rangatira, kei runga hoki i ōna tāngata whakaaro nui.

³⁶ Kei runga te hoari i te hunga whakapehapeha, ā, ka wairangi rātou. He hoari kei runga i āna mārohirohi, ā, ka pāwera rātou.

³⁷ Kei runga te hoari i ō rātou hōiho, kei runga i ō rātou hāriata, kei runga hoki i ngā whakauru katoa i roto i a ia, ā, ka rite rātou ki te wahine; kei runga te hoari i ōna taonga, ā, ka pāhuatia.

³⁸ He mimiti kei runga i ōna wai, ā, ka maroke. He whenua whakapakoko hoki ia, ā, e pōrangi ana rātou ki ngā atua whakawehi.

³⁹ “Mō reira ka nohoia a reira e ngā kīrehe mohoao o te koraha rātou ngātahi ko ngā wuruhi, ā, ka noho anō hoki ngā otereti ki reira; ā, e kore a reira e nohoia ā ake ake. Kāhore hoki e whai kāinga a reira i tētahi whakatupuranga ki tētahi whakatupuranga.

⁴⁰ Ka rite ki tā te Atua hurihanga i Horoma, i Komora, i ngā pā anō hoki e tata ana ki reira,” e ai tā Ihowā; “ka pērā te kore o te tangata e noho ki reira, e kore anō hoki tētahi tama a te tangata e whai kāinga ki reira.

⁴¹ “Nanā, kei te haere mai he iwi i te raki; ā, he iwi nui, he tokomaha hoki ngā kīngi e maranga mai i ngā tōpito o te whenua.

⁴² Ka rarau rātou ki te kōpere, ki te tao; he iwi nanakia rātou, e kore e tohu tangata; ā, pararā ana tō rātou reo pērā i te haruru o te moana, kei runga hōiho hoki e eke ana; rārangi rawa katoa, ānō he tangata e mea ana ki te whawhai, hei tatau ki a koe, e te tamāhine a Papurōna.

⁴³ Kua rongo te kīngi o Papurōna i tō rātou rongo, ā, kei te ngohe ōna ringa. Kua mau ia i te pāwera, i te mamae hoki, me te mea he wahine e whānau ana.

⁴⁴ Nanā, ka haere ake ia ānō he raiona i te ngawhātanga o Horano ki te nohoanga kaha. Otiia, e kore e rokohanga tāku meatanga i a rātou kia rere atu i reira; ā, ko wai te mea e whiriwhiria kia whakaritea e ahau hei rangatira mōna? Ko wai oti e rite ana ki ahau? Ko wai hoki hei whakarite wā mai ki ahau? Ko wai hoki te hēpara hei tū ki tōku aroaro?

⁴⁵ Mō reira whakarongo ki te tikanga a Ihowā, kua whakatakotoria e ia mō Papurōna; ki ōna whakaaro hoki i whakaaroa e ia mō te whenua o ngā Karari: He pono ka tōia atu rātou e rātou, arā ngā mea ririki o te kāhui. He pono ka whakangaromia rātou ko ō rātou nohoanga e ia.

⁴⁶ Ngateri ana te whenua i te haruru o te horonga o Papurōna, rangona ana te hāmama i roto i ngā iwi.”