Heremaia 49 - Paipera Tapu 2012

Te Whakawātanga ki a Āmona

¹ Mō ngā tamariki a Āmona. Ko te kupu tēnei a Ihowā: “Kāhore ianei a Īharaira tamariki? Kāhore āna tāngata hei whakarerenga iho mō āna taonga? Nā, he aha a Kara i riro ai i a Marakomo, i noho ai tōna iwi ki roto ki ōna pā?

² Mō reira, tēnei ngā rā te haere mai nei, e ai tā Ihowā, e meinga ai e ahau te whakaoho o te riri kia rangona ki Rapa o ngā tama a Āmona; ā, ka waiho hei pūranga kua ururuatia, ka tahuna āna tamāhine ki te ahi; ā, ka riro i a Īharaira te hunga i a rātou nei ia i mua,” e ai tā Ihowā.

³ “Auē, e Hehepona, kua pāhuatia hoki a Hai! E tangi, e ngā tamāhine a Rapa! Whītikiria koutou ki te kākahu taratara; e tangi, ka omaoma noa i waenga i ngā taiepa; nō te mea ka riro a Marakomo i te whakarau, ōna tohunga me ōna rangatira ngātahi anō.

⁴ He aha koe i whakamanamana ai ki ngā raorao, ki tōu raorao tāheke, e te tamāhine tāhurihuri kē? E whakawhirinaki nei ki ōna taonga, e mea nei, ‘Ko wai e haere mai ki ahau?’

⁵ Nanā, ka tākina e ahau he wehi ki runga ki a koe,” e ai tā te Ariki, tā Ihowā o ngā mano, “He mea nā te hunga katoa i tētahi taha ōu, i tētahi taha; ā, ka āia rawatia atu koutou, tērā, tērā, ki waho, ā, kāhore he kaitāwhiu mai mō te mea i marara atu.

⁶ Hei muri ia ka whakahokia e ahau ngā tama a Āmona i te whakarau,” e ai tā Ihowā.

Te Whakawātanga ki a Ēroma

⁷ Mō Ēroma. Ko te kupu tēnei a Ihowā o ngā mano: “Kua kāhore rānei te whakaaro nui i Temana? Kua mōtī ianei te whakatakoto kōrero a te hunga mōhio? Kua memeha rānei tō rātou whakaaro nui?

⁸ E rere koutou, tahuri atu, hei roto riro noho ai, e ngā tāngata o Rerana! Nō te mea ka tākina mai e ahau te aituā o Ēhau ki runga ki a ia, i te wā e tirotiro ai ahau i a ia.

⁹ Ki te tae atu he kaikohikohi karepe ki a koe, e kore ianei e mahue i a rātou ētahi karepe hei hamunga? Ki te mea he tāhae i te pō, e kore ianei rātou e tukituki kia mākona rawa rātou?

¹⁰ Kua takoto kau ia i ahau a Ēhau, kua hurahia e ahau ōna wāhi ngaro, tē āhei ia te huna i a ia. Kua oti ōna uri te pāhua, ōna tēina me ōna hoa tata, ā, kua kore hoki ia.

¹¹ Waiho āu pani, māku e whakaora; ko ōu pouaru, kia whakawhirinaki rātou ki ahau.”

¹² Ko te kupu hoki tēnei a Ihowā: “Nanā, ko te hunga i takoto nei te tikanga kia kaua e inu i te kapu, he pono ka inumia e rātou; ā, ko koe rānei te mea e kore rawa e whiua? E kore e kore ka whiua koe, engari ka tino inu nei koe.

¹³ Nō te mea kua waiho ahau e ahau anō hei oati, e ai tā Ihowā, ka waiho a Potora hei mīharotanga, hei ingoa kino, hei ururua, hei kanga anō hoki; ā, ka waiho ōna pā katoa hei koraha ake ake.”

¹⁴ Kua rangona e ahau he kōrero i a Ihowā, kua oti hoki te karere te tuku ki ngā iwi, hei kī atu: “Whakahuihui i a koutou, haere mai hoki ki a ia, ā, ka whakatika atu ki te whawhai!

¹⁵ “Nō te mea, nā, kua meinga koe e ahau kia iti i roto i ngā tauiwi, he mea whakahāwea i roto i ngā tāngata.

¹⁶ Tēnā ko tōu whakamataku, he whakakake nō tōu ngākau i pōhewa ai koe, e koe e noho nā i ngā kapiti o te kāmaka, e pupuri nā i te wāhi tiketike o te pukepuke. Ahakoa hangā e koe tōu ōhanga kia rite ki tō te ēkara te tiketike, ka whakahokia iho koe e ahau i reira,” e ai tā Ihowā.

¹⁷ “Ā, ka meinga a Ēroma hei mīharotanga; ko ngā tāngata katoa e tika ana nā reira, ka mīharo, ka hī mai ki ōna whiunga katoa.

¹⁸ Ka rite ki te hurihanga o Horoma, o Komora, o ngā pā hoki i tata ki reira,” e ai tā Ihowā, “e kore tētahi tangata e whai kāinga ki reira, e kore hoki tētahi tama a te tangata e noho ki reira.

¹⁹ “Nanā, ka rite ia ki te raiona e haere ake ana i te whakamanamana o Horano ki te nohoanga kaha; otiia, ka meinga ohoreretia ai e ahau kia rere atu i a ia; ā, ko wai te mea e whiriwhiria e ahau ko ia hei rangatira mōna? Ko wai hoki e rite ana ki ahau? Ko wai hei whakarite he wā mōku? Ko wai anō tēnei hēpara hei tū ki tōku aroaro?”

²⁰ Mō reira whakarongo ki te tikanga a Ihowā kua whakatakotoria e ia mō Ēroma; ki ōna whakaaro hoki, kua whakaaroa e ia mō ngā tāngata o Temana: He pono ka tōia atu rātou, arā ngā mea ririki o te kāhui; he pono ka meinga e ia tō rātou nohoanga rātou hoki kia ngaro.

²¹ Oho ana te whenua i te haruru o tō rātou hinganga; tērā te hāmama rangona ana mai tōna ngangau i te Moana Whero.

²² Nanā, ka haere mai ia, ā, ka rere ānō he ēkara, ā, ka roha atu ōna parirau ki runga ki Potora; ā, ka rite te ngākau o ngā mārohirohi o Ēroma i taua rā ki te ngākau o te wahine e whakamamae ana.

Te Whakawātanga ki Ramahiku

²³ Mō Ramahiku. “Kua whakamā a Hāmata, rāua ko Ārapara; nō te mea kua tae he rongo kino ki a rātou, harotu kau rātou; tērā te tangi kei te moana; kāhore e marino.

²⁴ Kua ngoikore a Ramahiku, kua anga ki te rere, mau pū hoki i te wehi; kua rokohanga hoki ia e te raru, e te mamae, me te mea he wahine e whānau ana.

²⁵ Taukiri e! Kīhai i mahue te pā e whakamoemititia ana, te pā i koa ai ahau!

²⁶ Heoi, hinga ana āna taitama i ōna waharoa, mōtī pū ngā tāngata whawhai katoa i taua rā,” e ai tā Ihowā o ngā mano.

²⁷ “Nā, ka tahuna anō e ahau he ahi i roto i te taiepa o Ramahiku, ā, ka pau i reira ngā whare kīngi o Pēneharara.”

Te Whakawātanga ki Kerara me Hatoro

²⁸ Mō Kerara, mō ngā kīngitanga hoki o Hatoro i patua nei e Nepukareha kīngi o Papurōna. Ko te kupu tēnei a Ihowā: “Whakatika koutou, whakaekea a Kerara, pāhuatia hoki ngā tama o te rāwhiti.

²⁹ Ka tangohia e rātou ō rātou tēneti, ā rātou hipi; ā, ka mauria atu e rātou mā rātou ō rātou kākahu ārai, ā rātou oko katoa, me ā rātou kāmera; ā, tērā rātou e karanga ki a rātou, ‘He wehi kei ngā taha katoa!’

³⁰ E rere koutou, haere atu ki tawhiti, nohoia a roto riro, e ngā tāngata o Hatoro!” e ai tā Ihowā. “Kua takoto hoki te tikanga a Nepukareha kīngi o Papurōna mō koutou, kua whakaaroa hoki e ia he whakaaro mō koutou.

³¹ “Whakatika, whakaekea te iwi e noho ana i te rangimārie, e noho kore wehi nā,” e ai tā Ihowā; “kāhore nā ō rātou kēti, kāhore he tūtaki, e noho takitahi ana.

³² Ā, ka pāhuatia ā rātou kāmera, ā, hei taonga pārau hoki te tini o ā rātou kararehe. Ā, ka whakamararatia e ahau ki ngā hau katoa te hunga i tapahia ngā tapa o ō rātou makawe; ā, ka tākina mai e ahau te aituā mō rātou i ngā taha katoa o rātou,” e ai tā Ihowā.

³³ “Ā hei nohoanga a Hatoro mō ngā kurī mohoao, hei ururua ake ake. E kore tētahi tangata e whai kāinga ki reira, e kore anō hoki tētahi tama a te tangata e noho ki reira.”

Te Whakawātanga ki Erama

³⁴ Ko te kupu a Ihowā i puta mai ki a Heremaia poropiti mō Erama i te tīmatanga o te kīngitanga o Terekia kīngi o Hūrā, i mea ia:

³⁵ Ko te kupu tēnei a Ihowā o ngā mano: “Nanā, ka whatia e ahau te kōpere a Erama, te mea nui rawa o tō rātou kaha.

³⁶ Ā, ka tākina atu e ahau ngā hau e whā i ngā pito e whā o te rangi ki runga ki Erama, ā, ka tītaritaria atu rātou e ahau ki aua hau katoa; kāhore hoki he iwi e kore te taea atu e te hunga o Erama ka peia atu nei.

³⁷ Ā, ka meinga e ahau a Erama kia wehi i te aroaro o ōna hoariri, i te aroaro hoki o te hunga e whai ana kia whakamatea rātou; ka tākina hoki e ahau he kino ki runga ki a rātou, ko tōku riri e mura ana, e ai tā Ihowā; ā, ka ungā e ahau te hoari ki muri i a rātou, ā, kia poto rā anō rātou i ahau.

³⁸ Nā, ka whakatūria e ahau tōku torōna ki Erama, ā, ka whakakāhoretia atu tō reira kīngi, rātou ko ngā rangatira,” e ai tā Ihowā.

³⁹ “Otiia hei ngā rā whakamutunga ka whakahokia e ahau a Erama i te whakarau,” e ai tā Ihowā.