Heremaia 48 - Paipera Tapu 2012

Te Whakawātanga ki Moapa

¹ Mō Moapa: Ko te kupu tēnei a Ihowā o ngā mano, a te Atua o Īharaira: “Auē te mate mō Nepo, kua pāhuatia hoki! Kua meinga a Kiriataima kia whakamā, kua riro: kua meinga a Mihikapa kia whakamā, kua wāwāhia iho ia.

² Kua kāhore te whakamoemiti mō Moapa; i Hehepona rātou e whakatakoto ana i te kino mōna, ‘Haere mai, tātou ka hātepe atu i a ia, kia kore ai tēnā iwi.’ Ko koe anō hoki, e Maramene, ka whakanohopukutia koe; ka aru te hoari i a koe.

³ Ka puta te reo auē i Horonaimi, ‘He pāhua, he whakangaromanga nui!’

⁴ Ka oti a Moapa te tukituki! He auē ka rangona, nā āna mea ririki.

⁵ Ka haere hoki rātou mā te pikinga atu ki Rūhiti me te tangi haere tonu; nō te mea i te heketanga ki Horonaimi kua rongo rātou i te mamae kino o te auē ki te whakangaromanga.

⁶ E rere! Kāhaki i a koutou kia ora ai! Kia rite ai ki te manoao i te koraha!

⁷ “Nō te mea, nāu i whakawhirinaki ki āu mahi, ki āu taonga, koia anō koe ka horo ai; ā, ka riro a Kemoho i te whakarau, rātou tahi ko ōna tohunga, ko ōna rangatira.

⁸ Ka tae te kaipāhua ki ngā pā katoa, e kore hoki tētahi pā e puta; ka ngaro te raorao, ka hunā hoki te mānia; ka pērā me tā Ihowā i kōrero ai.

⁹ Hoatu he parirau mō Moapa, kia rere atu ai, kia puta ai: ā, ka ururuatia ōna pā, tē ai he tangata hei noho ki reira.

¹⁰ “Ka kangā te tangata e mahi whakaparahako ana i tā Ihowā mahi, ā, ka kangā hoki te tangata e kore nei e tuku i tāna hoari ki te toto.

¹¹ “I runga a Moapa i te rangimārie nō tōna tamarikitanga ake, ā, i āta takoto ia i runga i ōna nganga, kīhai i ringihia atu i tētahi oko ki tētahi oko, kīhai anō hoki ia i riro i te whakarau. Heoi, mau tonu tōna reka ki a ia, ā, kīhai tōna kakara i rerekē.

¹² Mō reira, nanā, kei te haere mai ngā rā,” e ai tā Ihowā, “e ungā ai e ahau ki a ia te hunga ringiringi, ā, ka ringihia atu ia e rātou; ā, ka noho tahanga i a rātou āna oko, ka pakaru rikiriki hoki ā rātou pounamu.

¹³ Nā, ka whakamā a Moapa ki a Kemoho, ka pērā me te whare o Īharaira i whakamā rā ki Pētēre, ki tā rātou i whakawhirinaki ai.

¹⁴ “He pēhea tā koutou e kī nā, ‘He mārohirohi tātou, he uaua ki te whawhai’?

¹⁵ Kua pāhuatia a Moapa, ā, kua piki atu rātou ki ōna pā, kua heke iho hoki āna taitama, he mea whiriwhiri, kei raro, he parekura, e ai tā te Kīngi, ko Ihowā nei o ngā mano tōna ingoa.

¹⁶ Ka tata te aituā o Moapa te puta, ā, kei te tino kaikā mai te hē mōna.

¹⁷ Tangihia ia, e koutou katoa i tētahi taha ōna, i tētahi taha, e koutou e mōhio ana ki tōna ingoa; kī ake, ‘Anō te whatinga o te rākau kaha, o te tokotoko ātaahua!’

¹⁸ “E te tamāhine e noho mai nei i Ripono, makere mai i tōu korōria, e noho ki te matewai; nō te mea kua tae te kaipāhua o Moapa ki a koe, kua kore i a ia ōu wāhi kaha.

¹⁹ E te wahine e noho ana i Aroere, e tū ki te ara titiro ai. Ui atu ki te tangata e rere ana, ki te wahine e mawhiti ana; mea atu, ‘He aha kua meatia?’

²⁰ Kua whakamā a Moapa, kua pakaru; auē, e tangi! Kōrerotia ki Aranona, kua oti a Moapa te pāhua.

²¹ “Kua tae atu anō te whakawā ki te mānia; ki Horono, ki Iahata, ki Mepaata,

²² ā, ki Ripono, ki Nepo, ki, Pēteripirataima,

²³ ki Kiriataima, ki Petekamuru, Petemeono,

²⁴ ki Kerioto, ki Potora, ki ngā pā katoa o te whenua o Moapa, ki ngā mea i tawhiti, ki ngā mea e tata ana.

²⁵ Kua oti te haona o Moapa te pōuto atu, kua whati tōna ringa,” e ai tā Ihowā.

²⁶ “Meinga ia e koutou kia haurangi; mōna i whakakake ki a Ihowā; ā, ka okeoke a Moapa i roto i tōna ruaki, ā, waiho anō ia hei katanga.

²⁷ He teka ianei i waiho a Īharaira hei katanga māu? I kitea rānei ia i roto i ngā tāhae? Nō te mea i āu kōrerotanga katoa mōna, e oraora ana te māhunga.

²⁸ E ngā tāngata o Moapa, whakarērea ngā pā, e noho ki te kāmaka; ā, kia rite ki te kūkupa e hanga nei i tōna ōhanga ki ngā taha o te kūwaha o te rua.

²⁹ “Kua rongo tātou i te whakahīhī o Moapa – nui atu hoki tōna whakahīhī – i tōna whakakake, i tōna whakamanamana, i tōna whakapehapeha, i te whakahirahira hoki o tōna ngākau.

³⁰ E mōhio ana ahau ki tōna riri,” e ai tā Ihowā, “otiia kāhore he tikanga; kāhore he rawa o āna whakapehapeha.

³¹ Mō reira ka tangi ahau mō Moapa; āe rā, ka auē ahau mō Moapa katoa. Ka uhunga rātou mō ngā tāngata o Kiriherehe.

³² E te wāina o Hipima, ka tangihia koe e ahau, nui atu i te tangihanga, mō Iatere. Kua whiti ōu peka ki tērā taha o te moana, kua tae rawa ki te moana o Iatere. Kua kōkiri atu te kaipāhua ki āu hua raumati, ki tāu kohikohinga wāina.

³³ Ā, kua whakakāhoretia atu te koa me te hari i te māra mōmona, i te whenua hoki o Moapa; ā, kua mutu i ahau he wāina mō ngā takahanga wāina; e kore tētahi e hāmama i te takahanga; ko tō rātou hāmama ehara i te hāmama.

³⁴ “Nō te auētanga i Hehepona tae noa ki Ereare, ki Iahata, te puakanga o tō rātou reo, nō Toara tae noa ki Horonaimi, ki Ekerata Herihia, nō te mea ka mokemoke anō hoki ngā wai o Nimirimi.

³⁵ Ka meinga anō hoki e ahau kia mutu i roto i a Moapa,” ai tā Ihowā, “te tangata whakaeke whakahere ki te wāhi tiketike, me te tangata tahu whakakakara ki ōna atua.

³⁶ Nā reira kei te tangi tōku ngākau ki a Moapa ānō he pūtōrino, kei te tangi hoki tōku ngākau ānō he pūtōrino ki ngā tāngata o Kiriherehe; nā reira kua mōtī ngā mea maha i mahia e ia.

³⁷ He mea moremore katoa hoki ngā māhunga, ko ngā kumikumi katoa tapahi rawa; he haehaenga kei ngā ringa katoa, he kākahu taratara kei ngā hope.

³⁸ Kei runga i ngā tuanui katoa o Moapa a kei ōna ara he uhunga kei ngā wāhi katoa; nō te mea kua pakaru i ahau a Moapa, ānō he oko e kore e manakohia,” e ai tā Ihowā.

³⁹ “Anō tōna wawāhanga! Tā rātou auē! Inā, te tahuritanga mai o te tuarā o Moapa i te whakamā! Nā, ka waiho a Moapa hei katanga, hei whakawehi ki te hunga i tētahi taha ōna, i tētahi taha.”

⁴⁰ Nō te mea ko te kupu tēnei a Ihowā: “Nanā, ka rere ia ānō he ēkara, ka roha hoki ōna parirau ki runga ki Moapa.

⁴¹ Kua horo Kerioto, kua riro ngā wāhi kaha, ā, ka rite te ngākau o ngā mārohirohi o Moapa i taua rā ki te ngākau o te wahine e whakamamae ana.

⁴² Ā, ka hunā a Moapa, ka kore tēnā iwi, mōna i whakakake ki a Ihowā.

⁴³ Ko te wehi, ko te poka, ko te rore, kei a koe, e te tangata o Moapa,” e ai tā Ihowā.

⁴⁴ “Ko te tangata e rere ana i te wehi, ka taka ki te poka; ā, ko te tangata e puta ake ana i te poka, ka mau i te rore. Ka tākina hoki e ahau ki runga ki a ia, arā ki a Moapa, te tau e tirotirohia ai rātou,” e ai tā Ihowā.

⁴⁵ “Ko te hunga i rere, tū ana rātou i raro i te ata o Hehepona, kāhore he kaha; kua puta atu hoki he ahi i Hehepona, he mura i waenganui o Hihona, ā, kua pau te koki o Moapa, te tumuaki hoki o ngā tama a te ngangau.

⁴⁶ Auē te mate mōu, e Moapa! Kua hunā te iwi o Kemoho; kua riro hoki āu tama hei whakarau, āu tamāhine hoki hei whakarau.

⁴⁷ “Otiia, ka whakahokia mai anō e ahau a Moapa i te whakarau i ngā rā whakamutunga,” e ai tā Ihowā. Heoi anō te whakawā mō Moapa.