Heremaia 47 - Paipera Tapu 2012

He Whakawātanga ki ngā Pirihitini

¹ Ko te kupu a Ihowā i puta mai ki a Heremaia poropiti mō ngā Pirihitini i te mea kāhore anō a Parao i patu noa i Kaha:

² Ko te kupu tēnei a Ihowā: “Nanā, te puta mai nei ngā wai i te raki, ka meinga hei waipuke e ngawhā ana, ā, ka pōkia te whenua me ōna mea katoa, te pā me ngā tāngata e noho ana i roto. Ā, ka hāmama ngā tāngata, ka auē hoki ngā tāngata katoa o te whenua.

³ Hei te haruru o te takahi o ngā pāua o ōna hōiho kaha, hei te rorohū o ōna hāriata, hei te ngaehe o ōna wīra. Kore iho ngā mātua e tahuri ki muri ki ā rātou tamariki i te ngoikore hoki o ngā ringa.

⁴ Nā, mō te rā e haere mai nei, e pāhuatia ai ngā Pirihitini katoa, e hātepea atu ai i Tāira, i Hairona ngā kaiāwhina katoa e toe nei. Ka pāhuatia hoki e Ihowā ngā Pirihitini, ngā mōrehu o te motu, o Kapatoro.

⁵ Kua tae te pākira ki runga ki Kaha; kua whakamōtītia a Ahakerono me te toenga anō o tō rātou awaawa; kia pēhea te roa o tāu haehae i a koe?

⁶ “ ‘E te hoari a Ihowā! Kia pēhea te roa ka āta takoto ai koe? Hoki atu ki roto ki tōu kōpaki; okioki, kāti hoki tāu!’

⁷ Me pēhea koe e āta takoto ai, kua hoatu nei hoki e Ihowā he whakahau ki a koe? He hē mō Ahakerono, mō te tahatika hoki o te moana – kua whakaritea e ia ki reira.”