Heremaia 46 - Paipera Tapu 2012

He Whakawātanga ki Īhipa

¹ Ko te kupu a Ihowā i puta mai ki a Heremaia poropiti mō ngā iwi.

² Mō Īhipa, mō te ope a Parao Neko kīngi o Īhipa, mō tērā i te awa, i Uparati, i Karakemihi, i patua rā e Nepukareha kīngi o Papurōna i te whā o ngā tau o Iehoiakimi tama a Hōhia kīngi o Hūrā:

³ “Whakapaia te whakangungu rākau me te puapua, whakatata ki te whawhai!

⁴ Whakanohoia ngā hōiho, e eke, e ngā kaieke hōiho! Ā, tū atu me ō koutou pōtae; whakakanapatia ngā tao, kākahuria ngā pukupuku!

⁵ He aha ahau i kite ai i tēnei? Kei te pāwera rātou, kua hoki ki muri; kua tukitukia ō rātou mārohirohi, kua whati noa atu, kīhai hoki i titiro whakamuri – kei ngā taha katoa te wehi,” e ai tā Ihowā.

⁶ “Kaua te tangata tere e rere atu, kaua hoki te mārohirohi e mawhiti; kei te raki, kei te awa, kei Uparati, kua tūtuki ō rātou waewae, kua hinga.

⁷ “Ko wai tēnei e puhake ake nei me te mea ko te Naera, e tutū nei ōna wai me te mea ko ngā awa?

⁸ I puhake mai a Īhipa ānō ko te Naera, i tutū ōna wai ānō ko ngā awa; ā, ka mea ia, Ka puhake atu ahau, ā, ka taupokina te whenua; ka ngaro i ahau te pā me ōna tāngata.

⁹ Haere atu, e ngā hōiho; e ngana, e ngā hāriata! Tukua atu ngā mārohirohi; a Kuhu, a Putu, e rahurahu nei i te whakangungu rākau; ngā Rurimi, e rahurahu nei, e whakapiko nei i te kōpere.

¹⁰ Ko taua rā hoki he rā nā te Ariki, nā Ihowā o ngā mano, he rā rapu utu, e whai utu ai ia i ōna hoariri. Ā, ka horomi te hoari, ā, ka mākona, ka inu hoki, ki rawa i ō rātou toto. Nō te mea he patunga tapu tā te Ariki, tā Ihowā o ngā mano i te whenua ki te raki, i te taha o te awa o Uparati.

¹¹ “Haere ki runga, ki Kireara, e te tamāhine wāhina a Īhipa, ka tiki he pama; ka maumau tāu mahi i ngā rongoā maha; kāhore he ora mōu.

¹² Kua rongo ngā iwi ki tōu whakamā, kua pakū tāu karanga ki ngā whenua. Kua tūtuki nei hoki te waewae o te mārohirohi ki te mārohirohi, kua hinga ngātahi tautokorua.”

Mā Papurōna a Īhipa e Patu

¹³ Ko te kupu i kōrerotia e Ihowā ki a Heremaia poropiti, tērā ka haere mai a Nepukareha kīngi o Papurōna ki te patu i Īhipa:

¹⁴ “Kauwhautia e koutou ki Īhipa, pānuitia ki Mikitoro, pānuitia ki Nopo, ki Tahapanehe, mea atu, ‘E tū, kia tūmatohi; kua kai hoki te hoari i tētahi taha ōu, i tētahi taha.’

¹⁵ He aha ōu māia i tahia atu ai? Kīhai rātou i tū, nā Ihowā hoki rātou i ā atu.

¹⁶ He tini ngā mea nāna i tukoki ai, āe rā, i hinga rātou tētahi ki runga ki tētahi. I mea anō, ‘Whakatika, tātou ka haere ki tō tātou nei iwi, ki te whenua i whānau ai tātou, i te hoari tūkino.’

¹⁷ I karanga rātou i reira, ‘He turituri kau a Parao kīngi o Īhipa; kua tukua e ia kia pahemo te wā i whakaritea.’

¹⁸ “E ora ana ahau,” e ai tā te Kīngi, ko Ihowā o ngā mano nei tōna ingoa, “Kei Taporo i roto i ngā maunga, kei Karamere hoki i te moana he rite mō tōna haerenga mai.

¹⁹ E koe, e te tamāhine e noho nei i Īhipa, mahia ngā mea mōu mō te whakaraunga; nō te mea ka ururuatia a Nopo, ka wera, tē ai he tangata hei noho.

²⁰ “He kūao kau ātaahua rawa a Īhipa – otiia, kua tae mai te whakangaro i te raki, tēnei kua tae mai.

²¹ Ko āna tāngata hoki i utu ai, rite tonu i roto i a ia ki te kūao whāngai; kua tahuri atu anō hoki rātou, kua oma ngātahi atu, kīhai hoki i tū; nō te mea kua tae mai te rā o tō rātou aituā ki a rātou, te wā e whiua ai.

²² Ko tōna reo ka rite te puaki ki tō te nākahi; nō te mea he taua tā rātou ina haere, ka haere mai rātou ki a ia me ngā toki, ka rite ki ngā kaitapahi rākau.

²³ Ka tuaina e rātou tōna ngahere,” e ai tā Ihowā, “ahakoa e kore tōna mutunga e taea te rapu. He tini kē hoki rātou i te māwhitiwhiti, e kore e taea te tatau.

²⁴ Ka whakamā te tamāhine a Īhipa; ka tukua ia ki te ringa o te iwi ki te raki.”

²⁵ E mea ana a Ihowā o ngā mano, te Atua o Īharaira: “Nanā, ka whiua e ahau a Amono o Nō, a Parao, a Īhipa hoki, me ō reira atua, me ō reira kīngi; a Parao rawa, rātou ko te hunga e whakawhirinaki ana ki a ia.

²⁶ Ka tukua hoki rātou e ahau ki te ringa o te hunga e whai ana kia whakamatea rātou, ki te ringa anō o Nepukareha kīngi o Papurōna, ki te ringa o āna tāngata. Ā muri iho ka nohoia, ka pērā me ngā rā o mua,” e ai tā Ihowā.

Ka Whakorangia e Ihowā a Īharaira

²⁷ “Ko koe ia, kaua e wehi, e tāku pononga, e Hākopa, kaua e pāwera, e Īharaira. Nō te mea, nanā, māku koe e whakaora i tawhiti, ōu uri hoki i te whenua i whakaraua ai rātou; ā, ka hoki mai a Hākopa, ka āta noho, ka whai tānga manawa, tē ai he kaiwhakawehi mōna.

²⁸ Kaua koe e wehi, e tāku pononga, e Hākopa,” e ai tā Ihowā, “kei a koe nei hoki ahau. Ka poto rawa hoki i ahau ngā iwi katoa kua peia nei koe e ahau ki reira, otiia e kore koe e poto rawa i ahau. Engari, ka pākia koe e ahau, he mea whakarite mārie, e kore ia koe e tukua kia kore e whiua.”