Heremaia 4 - Paipera Tapu 2012

¹ “Ki te mea ka hoki mai koe e Īharaira,” e ai tā Ihowā, “hoki mai ki ahau; ki te whakarērea anō e koe āu mea whakarihariha i tōku aroaro, e kore koe e riro kē,

² ka oati anō koe, ‘Kei te ora a Ihowā,’ i runga i te pono, i te whakawā pai, i te tika, māna hoki ngā iwi ka whakapai ai ki a rātou anō, ka whakamanamana anō rātou ki a ia.”

³ Ko te kupu hoki tēnei a Ihowā ki ngā tāngata o Hūrā, ā, ki Hiruhārama: “Ngakia tā koutou pātohe; kaua hoki e whakatō ki roto ki ngā tātarāmoa.

⁴ Kotia hoki koutou, hei mea ki a Ihowā, whakarērea hoki ngā kiri matamata o ō koutou ngākau, e ngā tāngata o Hūrā, e te hunga anō e noho ana i Hiruhārama; kei puta tōku riri ānō he ahi, kei mura, ā, kāhore e tineia, mō te kino hoki o ā koutou mahi.”

Ka Whakawehitia a Hūrā ki te Whakaekenga

⁵ “Karangatia i roto i a Hūrā, kia rongo a Hiruhārama, mea atu: ‘Whakatangihia te tētere ki te whenua!’ Karanga, mea atu; ‘Whakamine mai, tātou ka haere ki ngā pā taiepa!’

⁶ Whakaarahia te kara ki te ritenga o Hiona, pūtere atu koutou, kaua e tū; nō te mea ka kawea mai e ahau he kino i te raki, he whatīanga nui.”

⁷ Kei te haere mai he raiona i tōna urupuia rākau, kei te ara anō he kaiwhakangaro mō ngā tauiwi; kei te ara ia, kua puta mai ia i tōna wāhi; hei whakangaro i tōu whenua, hei mea i ōu pā kia ururua; kāhore he tangata hei noho.

⁸ Mō konei whītikiria he kākahu taratara ki a koutou, e tangi, auē: Nō te mea kāhore te muranga o tō Ihowā riri e tahuri atu i a tātou.

⁹ “I taua rā,” e ai tā Ihowā, “ka pirau te ngākau o te kīngi, me te ngākau o ngā rangatira; ā, ka mīharo ngā tohunga, ā, ko ngā poropiti ketekete kau ana.”

¹⁰ Anō rā ko ahau, “Auē, e te Ariki, e Ihowā, kua pōhēhē rawa i a koe tēnei iwi, a Hiruhārama anō, i te kupu nei, ‘Ka mau te rongo ki a koutou.’ Tēnā ia, kua pā te hoari ki te wairua.”

¹¹ I taua wā ka kōrerotia ki tēnei iwi, ki Hiruhārama anō, “He hau wera nō ngā wāhi tiketike i te koraha e tika mai ana ki te tamāhine a tāku iwi, ehara i te mea hei pōwhiriwhiri, hei tahi rānei –

¹² he hau tōtōpū nō aua wāhi ka tae mai ki ahau. Ākuanei ahau whakapuaki ai i te whakawā mō rātou.”

¹³ Nanā, ko tōna haerenga mai ka rite ki ngā kapua, rite tonu anō ōna hāriata ki te tūkauati; he tere rawa ōna hōiho i te ēkara – auē, te mate mō tātou, kei te pāhuatia hoki tātou!

¹⁴ Horoia atu te kino o tōu ngākau e Hiruhārama, kia ora ai koe. Kia pēhea te roa o te noho o ōu whakaaro kino i roto i a koe?

¹⁵ Nō te mea e whakaatu mai ana he reo i Rāna, e mea ana hoki i te kino kia rangona i Maunga Ēparaima.

¹⁶ “Kōrero ki ngā iwi; nanā, kia rangona te hē mō Hiruhārama: ‘Kei te haere mai he kaitiaki i te whenua tawhiti, ka puaki tō rātou reo mō ngā pā o Hūrā.

¹⁷ Ko tā rātou ki a ia rite tonu ki tā ngā kaitiaki o te māra i tētahi taha, i tētahi taha, mōna i tutū ki ahau,’ ” e ai tā Ihowā.

¹⁸ “Nā tōu ara, nā āu mahi, ēnei i pā ai ki a koe; nōu tēnei hē; he kawa hoki, kua pā hoki ki tōu ngākau.”

Te Pōuri mō te Iwi Turaki

¹⁹ Ōku whēkau, ōku whēkau! Mamae pū a roto o tōku ngākau, oho ana tōku ngākau i roto i ahau; e kore ahau e whakarongo puku; kua rongo hoki koe, e tōku wairua, ki te tangi o te tētere, ki te hāmama o te whawhai.

²⁰ He ngaromanga hono iho ki te ngaromanga te karangatia nei; kua pāhuatia katoatia hoki te whenua; kitea rawatia ake kua pāhuatia ōku tēneti, mea kau iho ko ōku kākahu ārai.

²¹ Kia pēhea ake te roa ōku ka titiro nei ki te kara, ka rongo nei ki te tangi o te tētere?

²² “He wairangi hoki tāku iwi, kāhore e mōhio ki ahau. He tamariki kūware, kāhore ō rātou mātauranga; e mōhio ana rātou ki te mahi kino, ki te mahi pai ia kāhore he mātauranga.”

²³ I titiro ahau ki te whenua, nā, kāhore he āhua, e takoto kau ana, ki ngā rangi anō, nā, kāhore ō reira mārama.

²⁴ I titiro ahau ki ngā maunga, nā, e ngāueue ana, ā, ko ngā pukepuke katoa e nekeneke haere ana.

²⁵ I titiro ahau, ā, kāhore he tangata, ā, ko ngā manu katoa o te rangi kua rere atu.

²⁶ I titiro ahau, nā, he koraha kau te māra mōmona, kua pakaru ōna pā katoa i te aroaro o Ihowā, i te muranga o tōna riri.

²⁷ Ko te kupu hoki tēnei a Ihowā: “Ka ururua katoa te whenua, otiia e kore e whakapaua rawatia e ahau.

²⁸ Mō konei ka tangi te whenua, ka mangu anō te rangi i runga; nō te mea kua kōrero nei ahau, kua takoto tōku whakaaro, ā, kāhore anō i puta kē tāku, e kore hoki ahau e tahuri atu i tēnā.”

²⁹ Ka whati katoa te pā i te ngangau o ngā hōia eke hōiho, o ngā kaikōpere; ka haere rātou ki roto ki ngā urupuia rākau, ka piki ki ngā kāmaka; ka mahue katoa ngā pā, kāhore hoki tētahi tangata e noho ki roto.

³⁰ Ā, ko koe, kia oti koe te pāhua, ka pēhea koe? Ahakoa kākahu noa koe i te ngangana, ahakoa whakapaipai noa koe i a koe ki ngā whakapaipai kōura. Ahakoa haehae noa koe i ōu kanohi, mea rawa ki te pukepoto, maumau mea noa koe i a koe kia ātaahua. Ka whakahāwea ki a koe te hunga i aroha ki a koe, ka whai kia mate koe.

³¹ Kua rongo hoki ahau i te reo, me te mea nō te wahine e whānau ana, he mamae, me te mea ko tāna mātāmua e puta ana, ko te reo o te tamāhine a Hiona e whakahotuhotu ana, whewhera tonu ōna ringa, me te karanga, “Auē te mate i ahau! Kua hemo hoki tōku wairua i mua i ngā kaiwhakamate!”