Heremaia 31 - Paipera Tapu 2012

Te Hokinga Harikoa mai o ngā Manene

¹ “I taua wā,” e ai tā Ihowā, “ka waiho ahau hei Atua mō ngā hapū katoa o Īharaira, ko rātou hoki hei iwi māku.”

² Ko te kupu tēnei a Ihowā: “Ko te iwi i toe i te hoari, i kite i te manako ki te koraha; arā a Īharaira, i ahau i haere atu ai ki te mea tānga manawa mōna.”

³ I puta mai a Ihowā ki ahau i mua noa atu, i mea mai: “Āe rā, he aroha pūmau tōku i aroha ai ahau ki a koe; nā reira, te atawhai i kukume ai ahau i a koe.

⁴ Ka hangā anō koe e ahau, ā, ka oti koe te hanga, e te wāhina o Īharaira. Tērā anō koe ka whakapaipaia ki āu timipera, ā, ka haere atu i roto i ngā kanikani a te hunga harakoa.

⁵ Tērā koe e whakatō anō he māra wāina ki runga ki ngā maunga o Hamaria. Ka whakatō ngā kaiwhakatō, ā, ka kai i ōna hua.

⁶ Nō te mea tēnā anō te rā, e karanga ai ngā kaitiaki i runga i ngā pukepuke o Ēparaima, ‘Whakatika, tātou ka haere ki runga, ki Hiona, ki a Ihowā, ki tō tātou Atua.’ ”

⁷ Ko te kupu hoki tēnei a Ihowā: “Waiata i runga i te koa ki a Hākopa, hāmama mō te metararahi o ngā iwi; kōrerotia atu, whakamoemititia, mea atu, ‘E Ihowā, whakaorangia tāu iwi, te mōrehu o Īharaira.’

⁸ Nanā, ka kawea mai rātou e ahau i te whenua ki te raki, ka kohikohia mai i ngā tōpito o te whenua, me ngā matapō, me ngā kopa, me te wahine e hapū ana, me te wahine hoki e whakamamae ana, i ō rātou taha; he hui nui tonu rātou e hoki mai ai ki konei.

⁹ Ka haere mai rātou me te tangi, ā, ka ārahina rātou e ahau i runga i te īnoi. Ka meinga rātou e ahau kia haere i te taha o ngā awa wai, mā te ara tika e kore ai ō rātou waewae e tūtuki i reira; nō te mea he pāpā ahau ki a Īharaira, ā, ko Ēparaima tāku mātāmua.

¹⁰ “Whakarongo ki te kupu a Ihowā, e ngā iwi, kōrerotia hoki ki ngā motu o tawhiti, mea atu, ‘Ko te kaitītaritari o Īharaira, māna rātou e whakawhāiti, māna rātou e tiaki, ka rite ki tā te hēpara i tāna kāhui.’

¹¹ Kua hokona nei hoki a Hākopa e Ihowā, utua ana e ia, tangohia mai ana i roto i te ringa o te mea i kaha rawa i a ia.

¹² Nā, ka haere mai rātou ka waiata i te wāhi tiketike o Hiona, ka rere huihui ki te pai o Ihowā, ki te wīti, ki te wāina, ki te hinu, ā, ki ngā kūao hipi, kūao kau: ā, ka rite ō rātou wairua ki te kāri kua oti te whakamākūkū; ā, ka tino mutu rawa tā rātou tangi.

¹³ Kātahi te wāhina ka koa ki te kanikani, me ngā taitama ngātahi ko ngā kaumātua. Ka meinga hoki e ahau tā rātou tangi hei koa, ka whakamārietia rātou, ā, ka meinga rātou kia hari i ō rātou mamae.

¹⁴ Ka whakatinaia e ahau te wairua o ngā tohunga ki te ngako, ka mākona anō tōku iwi i tōku pai,” e ai tā Ihowā.

¹⁵ Ko te kupu tēnei a Ihowā: “I rangona he reo ki Rama, he uhunga, he tangi, tīwerawera ana, ko Rahera e tangi ana ki āna tamariki, ā, kīhai i pai kia whakamārietia mō āna tamariki, kua kāhore nei.”

¹⁶ Ko te kupu tēnei a Ihowā: “Whakamutua te tangi o tōu reo, ngā roimata hoki i ōu kanohi; nō te mea ka whai utu tāu mahi,” e ai tā Ihowā: “ā, ka hoki mai anō rātou i te whenua o te hoariri.

¹⁷ Ka whai tūmanakohanga hoki tōu mutunga,” e ai tā Ihowā: “ā, ka hoki mai āu tamariki ki tō rātou ake rohe.

¹⁸ “He pono kua rongo ahau i a Ēparaima e tangi ana ki a ia anō, pēnei: ‘Kua pākia ahau e koe, ā, i pākia ahau, pērā i te kūao kau kīhai i whakaakona ki te ioka. Whakatahuritia ahau, ā, ka tahuri ahau; ko koe nei hoki a Ihowā, tōku Atua.

¹⁹ He pono i muri i tōku tahuritanga, i rīpenetā ahau; ā, i muri i tōku whakaakoranga i papaki ahau ki tōku hūhā. I whakamā ahau, āe rā, i numinumi kau, nō te mea e waha ana e ahau te ingoa kino o tōku taitamarikitanga.’

²⁰ He tamaiti matenui ianei a Ēparaima nāku? He tamaiti āhuareka ianei? Nō te mea ka kōrero ana ahau i te hē mōna, mau tonu tōku māharahara ki a ia. Nō reira ōku whēkau i oho ai ki a ia; he pono ka tohungia ia e ahau,” e ai tā Ihowā.

²¹ “Whakatūria ake ētahi tohu ara māu; hangā he pou waitohu. E anga tōu ngākau ki te huanui, ki te ara i haere ai koe. Hoki mai, e te wāhina o Īharaira, hoki mai anō ki ēnei pā ōu.

²² Kia pēhea te roa o tōu kōpikopiko, e te tamāhine tāhurihuri kē? Kua hangā hoki e Ihowā he mea hou ki runga ki te whenua – ka karapoti te wahine i te tāne.”

²³ Ko te kupu tēnei a Ihowā o ngā mano, a te Atua o Īharaira: “Tēnei ake ka kōrerotia anō tēnei kupu ki te whenua o Hūrā, ki ōna pā hoki, ina whakahokia mai rātou e ahau i te whakarau: ‘Kia manaaki a Ihowā i a koe, e te nohoanga o te tika, e te maunga o te tapu!’

²⁴ Ā, ka noho tahi a Hūrā me ōna pā katoa ki reira; te hunga ngaki i te whenua me te hunga anō e haere tahi ana me ngā kāhui.

²⁵ Kua tino whakamākonatia hoki e ahau te wairua ruha, kua whakakīia anō ngā wairua katoa e pōuri ana.”

²⁶ I konei ka maranga ahau, ā, ka titiro; nā, he reka ki ahau tāku moe.

Te Whiunga i ia Tangata

²⁷ “Nanā, kei te haere mai ngā rā,” e ai tā Ihowā, “e whakatōkia ai e ahau te whare o Īharaira me te whare o Hūrā ki te purapura tangata, ki te purapura kararehe.

²⁸ Nā, ka pērā i ahau i tiaki ai i a rātou i mua, he mea kia hūtia ake, kia wāhia iho, kia turakina ki raro, kia whakangaromia, kia tūkinotia; ka pērā anō tāku tiaki i a rātou, he mea kia hangā, kia whakatōkia,” e ai tā Ihowā.

²⁹ “I aua rā ka mutu tā rātou kī: ‘Kua kai ngā mātua i ngā karepe kaiota, ā, mōniania ana ngā niho o ngā tamariki.’

³⁰ Engari, ka mate tēnei, tēnei, i runga i tōna kino, i tōna kino; ko ngā tāngata katoa e kai ana i te karepe kaiota, ko ōna niho anō e mōniania.”

He Kawenata Hou

³¹ “Nanā, kei te haere mai ngā rā,” e ai tā Ihowā, “e whakaritea ai e ahau he kawenata hou ki te whare o Īharaira, ki te whare hoki o Hūrā.

³² E kore anō ia e rite ki te kawenata i whakaritea e ahau ki ō rātou mātua i te rā i pupuri ai ahau ki ō rātou ringa, ā, kawea mai ana rātou i te whenua o Īhipa – whakatakā ana e rātou taua kawenata āku, ahakoa i waiho ahau hei tahu mārena mā rātou,” e ai tā Ihowā.

³³ “Engari ko te kawenata tēnei e whakaritea e ahau ki te whare o Īharaira i muri i aua rā,” e ai tā Ihowā. “Ka hoatu e ahau tāku ture ki ō rātou wāhi i roto, ka tuhituhia anō ki tō rātou ngākau; ā, ko ahau hei Atua mō rātou, ko rātou hei iwi māku.

³⁴ I muri nei kāhore he whakaako a tētahi i tōna hoa tata, a tētahi i tōna teina, kāhore he kī atu, ‘Kia mōhio ki a Ihowā,’ ka mōhio hoki rātou katoa ki ahau, i te iti o rātou tae noa ki te mea rahi rawa,” e ai tā Ihowā. “Nō te mea ka whakarērea noatia e ahau tō rātou kino, ā, heoi anō ōku mahara ki tō rātou hara.”

³⁵ Ko te kupu tēnei a Ihowā, nāna nei i hōmai te rā hei whakamārama i te awatea, me ngā tikanga o te marama, o ngā whetū, hei whakamārama i te pō, nāna hoki i whakatūtehu te moana, i nganga ai ōna ngaru – ko Ihowā o ngā mano tōna ingoa:

³⁶ “Ki te mawehe atu ēnei tikanga i tōku aroaro,” e ai tā Ihowā, “ko reira anō ka kore te uri o Īharaira hei iwi i tōku aroaro ā ake ake.”

³⁷ Ko te kupu tēnei a Ihowā: “Mehemea e taea ana te rūri te rangi i runga, te rapu hoki ngā tūranga o te whenua i raro, kātahi hoki ahau ka paopao ki ngā uri katoa o Īharaira mō ngā mea katoa kua mahia e rātou,” e ai tā Ihowā.

Ko Hiruhārama e Whakanuia ake

³⁸ “Nanā, kei te haere mai ngā rā,” e ai tā Ihowā, “e hangā ai te pā hei mea ki a Ihowā, i te Pourewa atu o Hananēre tae noa ki te Kūwaha o te Koki.

³⁹ Ā, ka tae tonu atu te aho rūri, tika tonu atu ki te pukepuke ki Karepe, taiāwhio tonu atu ki Koata.

⁴⁰ Nā, ko te raorao katoa i ngā tūpāpaku, i ngā pungarehu, ā, ko ngā māra katoa hoki, ā tae noa ki te awa, ki Kitirono, ki te koki i te Kūwaha Hōiho whaka te rāwhiti, ka tapu katoa ki a Ihowā. E kore e hūtia ake, e kore anō e wāhia iho ā ake ake.”