Heremaia 3 - Paipera Tapu 2012

Ko Īharaira Pūremu

¹ “E kōrerotia ana, ki te whakarērea e te tangata tāna wahine, ā, ka haere atu ia i tōna taha, ka riro i te tāne kē, e hoki anō rānei ia ki a ia? E kore ianei taua whenua e poke rawa? Ko koe ia kua kairau ki ngā hoa tokomaha; nā, hoki mai ki ahau,” e ai tā Ihowā.

² “Kia ara ōu kanohi ki ngā pukepuke moremore, tirohia! Ko tēhea te wāhi i kore ai koe e pūremutia? Nohoia atu ana rātou e koe i ngā ara, pērā ana me te Arāpi i te koraha; ā, poke iho i a koe te whenua i ōu kairautanga, i tāu mahi kino.

³ Nā reira i kaiponuhia ai ngā ua, kāhore hoki he ua ō muri. Engari, he rae tōu nō te wahine kairau, e whakakāhore ana ki te whakamā.

⁴ E kore ianei koe e karanga ki ahau i ngā wā ā muri nei, ‘E tōku pāpā, ko koe te kaiārahi o tōku taitamarikitanga,

⁵ e mau rānei tōna riri ā ake ake? E whakapūmautia tonutia rānei e ia?’ Nanā, kua kōrerotia e koe, kua mahia ngā mea kino, kua rite ki tāu.”

He Karanga ki te Rīpenetānga

⁶ I kī mai anō a Ihowā ki ahau i ngā rā o Kīngi Hōhia, “Kua kite rānei koe i ngā mahi a Īharaira tahuri kē? Kua haere ia ki runga ki ngā maunga tiketike katoa, ki raro i ngā rākau kōuru nui katoa, ki reira kairau ai.

⁷ I mea anō ahau i muri i tāna meatanga i ēnei mea katoa, ‘Ka hoki mai ia ki ahau’; heoi kīhai ia i hoki mai, me te titiro anō tōna tuakana tinihanga, a Hūrā.

⁸ Ā, i kite ahau, i tāku peinga atu i a Īharaira tahuri kē mō taua take nei anō, mō tōna pūremutanga, ā, i tāku hoatutanga he pukapuka whakarere ki a ia, nā, kīhai tōna tuakana, a Hūrā tinihanga i wehi; heoi haere ana anō ia, kairau ana.

⁹ Nā, ko te otinga, kua poke te whenua i te rongo o tōna pūremutanga, pūremu ana ia ki te kōhatu, ki te rākau.

¹⁰ Nā, ahakoa ko tēnei katoa, kīhai i whakapaua te ngākau o tōna tuakana tinihanga, o Hūrā, ki te hoki ki ahau; he hoki teka kau ia,” e ai tā Ihowā.

¹¹ Nā, ka mea a Ihowā ki ahau, “Ā Īharaira tahuri kē, nui atu tāna whakatika i a ia i tā Hūrā, i tā te mea tinihanga.

¹² Haere, karangatia ēnei kupu whaka te raki, mea atu: ‘Hoki mai, e Īharaira tahuri kē,’ e ai tā Ihowā. ‘E kore ahau e mea i tōku riri kia tau ki a koutou; he atawhai hoki ahau,’ e ai tā Ihowā; ‘e kore ahau e mauāhara tonu.

¹³ Whākina kautia tōu hē, arā kua kino koe ki a Ihowā, ki tōu Atua, kua whakamararatia atu e koe ōu ara ki ngā tāngata kē i raro i ngā rākau kōuru nui katoa, kīhai anō i rongo ki tōku reo,’ ” e ai tā Ihowā.

¹⁴ “Hoki mai, e ngā tamariki tahuri kē,” e ai tā Ihowā; “kua mārenatia hoki koutou e ahau; ā, ka tangohia koutou e ahau, tētahi i roto i te pā, tokorua hoki i roto i te hapū, ka kawea anō koutou e ahau ki Hiona.

¹⁵ Ā, ka hoatu e ahau he hēpara mō koutou, ko āku i pai ai, ka whāngaia anō koutou e rātou ki te mātauranga, ki te whakaaro pai.

¹⁶ Ā tēnei ake, ina nui, ina hua koutou ki te whenua i aua rā,” e ai tā Ihowā, “heoi anō ā rātou kīanga ake, ‘Ko te āka o te kawenata a Ihowā.’ E kore anō e puta ake ki te ngākau; e kore hoki e maharatia taua mea e rātou, e kore anō rātou e hāereere ki reira, kāhore hoki he mahinga pērā i muri iho.

¹⁷ I taua wā ka kīia e rātou a Hiruhārama, ko te torōna o Ihowā; ā, ka huihuia ngā iwi katoa ki reira, ki te ingoa o Ihowā, ki Hiruhārama; ā, heoi anō tō rātou haere i runga i te mārō o ō rātou ngākau kino.

¹⁸ I aua rā ka haere tahi te whare o Hūrā rāua ko te whare o Īharaira, ka huihuia anō tō rātou haere mai i te whenua i te raki, ki te whenua i hoatu e ahau hei kāinga tupu ki ō koutou mātua.

¹⁹ “I mea anō ahau, ‘Me pēhea e oti ai koe te whakauru e ahau ki ngā tamariki, e hoatu ai e ahau ki a koe he whenua e minaminatia ana, he kāinga tupu, he wāhi ātaahua nō ngā mano o ngā iwi?’ I mea anō ahau, ka karangatia ahau e koe, ‘E tōku pāpā,’ e kore anō koe e tahuri atu i te whai i ahau.

²⁰ Rite rawa ki tā te wahine i whakarere tinihanga i tāna tahu tā koutou mahi tinihanga ki ahau, e te whare o Īharaira,” e ai tā Ihowā.

²¹ E rangona ana he reo i runga i ngā puke moremore, ko te tangi, ko ngā īnoi hoki a ngā tama a Īharaira; mō rātou i whakaparori kē i tō rātou ara, wareware ake i a rātou a Ihowā, tō rātou Atua.

²² “Hoki mai, e ngā tamariki tahuri kē, māku e rongoā ō koutou tahuritanga kētanga. “Tēnei mātou te haere atu nei ki a koe; ko koe hoki a Ihowā, tō mātou Atua.

²³ He pono, he hori kau te āwhina e tāria ana mai i ngā pukepuke, te ngē i runga i ngā maunga. Tika rawa kei a Ihowā, kei tō tātou Atua te whakaora mō Īharaira.

²⁴ Kua pau hoki i te mea whakamā te māuiui o ō tātou mātua, nō tō tātou tamarikitanga ake anō; ā rātou hipi, ā rātou kau, ā rātou tama, me ā rātou tamāhine.

²⁵ Takoto tātou i roto i tō tātou whakamā, mā tō tātou matangerengere tātou e hīpoki. Kua hara hoki tātou ki a Ihowā, ki tō tātou Atua, tātou ko ō tātou mātua, nō tō tātou tamarikitanga ake anō ā mohoa noa nei; kīhai hoki tātou i rongo ki te reo o Ihowā, o tō tātou Atua.