Heremaia 21 - Paipera Tapu 2012

Ka Hinga a Hiruhārama i a Nepukareha

¹ Ko te kupu i puta mai ki a Heremaia, he mea nā Ihowā, i te ngarenga a Kīngi Terekia i a Pahuru tama a Merekia, i a Tepania hoki, tama a Maaheia tohunga, ki a ia, hei kī,

² “Rapua koa tētahi tikanga i a Ihowā mō tātou, kei te whawhai nei hoki a Nepukareha kīngi o Papurōna ki a tātou; tērā pea tā Ihowā mahi ki a tātou e rite ki āna mea whakamīharo katoa, ā, ka haere atu ia i tō tātou wāhi.”

³ Kātahi a Heremaia ka mea atu ki a rātou: “Ko tā koutou tēnei e kōrero ai ki a Terekia:

⁴ ‘Ko te kupu tēnei a Ihowā, a te Atua o Īharaira: Nanā, ka whakahokia atu e ahau ngā patu mō te whawhai i ō koutou ringa, mō tā koutou whawhai ki te kīngi o Papurōna, ki ngā Karari, e whakapae nei i a koutou i waho o te taiepa, ka huihuia hoki rātou e ahau ki waenganui o tēnei pā.

⁵ Ā, ko ahau nei anō hei whawhai ki a koutou ki te ringa mārō, ki te tākakau kaha, i runga i te riri, i te weriweri, i te āritarita nui.

⁶ Ā, ka patua e ahau ngā tāngata o tēnei pā, te tangata, te kararehe; ka mate rātou i te mate urutā nui.

⁷ Nā muri iho, e ai tā Ihowā, ka hoatu e ahau a Terekia kīngi o Hūrā rātou ko āna tāngata, ko te iwi – arā ko te hunga o tēnei pā e toe i te mate urutā – i te hoari, i te hemokai, ki te ringa o Nepukareha kīngi o Papurōna, ki te ringa o ō rātou hoa whawhai, ki te ringa hoki o te hunga e whai ana kia whakamatea rātou. Ā, ka patua rātou e ia ki te mata o te hoari; e kore rātou e tohungia e ia, e kore e manawapātia, e kore e arohaina.’

⁸ “Kōrero atu anō hoki koe ki tēnei iwi: ‘Ko te kupu tēnei a Ihowā: Nanā, kua takoto i ahau ki tō koutou aroaro te ara ki te ora, me te ara ki te mate.

⁹ Ko te tangata ka noho i tēnei pā, ka mate i te hoari, i te hemokai, i te mate urutā; ko te tangata ia e haere atu ana, ā, ka taka atu ki ngā Karari e whakapae nei i a koutou, ka ora ia, ā, ko tōna oranga hei taonga parakete ki a ia.

¹⁰ Nō te mea kua whakamau atu tōku mata ki tēnei pā hei kino, kāhore hoki hei pai, e ai tā Ihowā: ka hoatu ki te ringa o te kīngi o Papurōna, ā, ka tahuna e ia ki te ahi.’ ”

He Pānui ki ngā Uri o Rāwiri

¹¹ “Nā, ko te mea mō te whare o te kīngi o Hūrā: ‘Whakarongo koutou ki te kupu a Ihowā,

¹² e te whare o Rāwiri! Ko te kupu tēnei a Ihowā: Whakaritea te whakawā i te ata, whakaorangia ake hoki te tangata e pāhuatia ana i roto i te ringa o te kaitūkino, kei puta tōku riri ānō he ahi, ā, ka kā, tē taea te tinei, mō te kino hoki o ā koutou mahi.

¹³ Nanā, hei hoariri ahau mōu, e te wahine e noho nā i te raorao, i te kāmaka hoki o te wāhi papatairite, e ai tā Ihowā; koutou nāna nā te kupu, “Ko wai e haere mai ki a tātou ko wai rānei e tomo ki ō tātou nohoanga?”

¹⁴ Ā, ka rite ki ngā hua o ā koutou mahi tāku whiu i a koutou, e ai tā Ihowā; ā, ka ngiha i ahau he ahi i tōna ngahere, e pau ai ngā mea katoa ā taka noa, taka noa i a ia.’ ”