Heremaia 20 - Paipera Tapu 2012

Ka Arumia a Heremaia e Pahuru

¹ Nā, ka rongo a Pahuru tama a Imere tohunga, tino kāwana i roto i te whare o Ihowā, i a Heremaia e poropiti ana i ēnei mea.

² Kātahi a Pahuru ka patu i a Heremaia poropiti, kuhuna ana e ia ki te here waewae i te Kūwaha o Runga o Pineamine, ki tērā i te whare o Ihowā.

³ Nā, i te aonga ake ka whakaputaina mai a Heremaia e Pahuru i te here waewae. Kātahi a Heremaia ka mea ki a ia, “Ehara a Pahuru i te ingoa i huaina e Ihowā mōu, engari ko Mākoro Mihapipi.

⁴ Nō te mea ko te kupu tēnei a Ihowā: ‘Nanā, ka meinga koe e ahau hei whakawehi mōu anō, mō ōu hoa katoa anō hoki; ka hinga rātou i te hoari a ō rātou hoariri, me te titiro anō ōu kanohi. Ka hoatu anō e ahau a Hūrā katoa ki te ringa o te kīngi o Papurōna, ā, māna rātou e whakarau ki Papurōna, e patu ki te hoari.

⁵ Ka hoatu anō e ahau ngā rawa katoa o tēnei pā, me āna mea katoa i hua mai, me āna mea utu nui katoa, āe rā, me ngā taonga katoa o ngā kīngi o Hūrā, ka hoatu e ahau ki te ringa o ō rātou hoariri, ā, ka pāhuatia e rātou, ka tangohia, ka maua hoki ki Papurōna.

⁶ Nā, ko koe, e Pahuru, koutou ko ngā tāngata katoa e noho ana i tōu whare, ka riro koutou ki te whakarau; ā, ka tae koe ki Papurōna, mate atu ki reira, tanumia atu ki reira, a koe me ōu hoa aroha katoa, i poropiti teka atu nā koe ki a rātou.’ ”

Ka Whakahorihori a Heremaia i ōna Kaiaru

⁷ E Ihowā, nāu ahau i hangarau, ā, raru ana ahau; he kaha rawa koe i ahau, ā, kua taea tāu. Kua waiho ahau hei whakakatanga i te rā katoa, kei te whakatoia ahau e te katoa.

⁸ I ōku kōrerotanga katoa hoki, ka hāmama ahau; ka karanga ahau, “He mahi nanakia, he pāhua!” Nō te mea kua waiho te kupu a Ihowā hei tāwainga mōku, hei whakatoinga, i te rā katoa.

⁹ Ā, ki te kī ahau, “E kore ahau e whakahua i a ia, e kore anō hoki e kōrero i runga i tōna ingoa ā muri ake nei,” nā, ka kā i roto i tōku ngākau me te mea he ahi e ngiha ana, tūtaki iho ki roto ki ōku wheua; ā, ka ruha ahau i te koromaki, ā, kāhore e taea e ahau te pupuri.

¹⁰ Kua rongo hoki ahau i te hahani a te tini: “He whakawehi i ngā taha katoa! Whakahēngia, ā, ka whakahēngia ia e mātou!” E ai tā ōku hoa tāpui katoa, te hunga e whanga ana i ahau kia tatū; “Tērā pea ia e taea te whakawai, ā, ka kaha tātou ki a ia, ā, ka whiwhi tātou ki te utu i a ia.”

¹¹ Otiia kei ahau a Ihowā, ānō he mārohirohi, he mea whakamataku. Nā reira, ka tūtuki ngā waewae o ōku kaitūkino, e kore hoki tā rātou e taea. Tērā e nui tō rātou whakamā, he whakamā mau tonu, ā, e kore e warewarea, nō te mea kīhai i mahia tā rātou i runga i te whakaaro nui.

¹² Otiia, e Ihowā o ngā mano, e whakamātautau nei i te tangata tika; e kite nei i ngā whatumanawa, i te ngākau, tukua ahau kia kite i tāu utu ki a rātou; kua whakakitea nei hoki e ahau ki a koe tāku totohe.

¹³ Waiata ki a Ihowā! Whakamoemititia a Ihowā! Kua whakaorangia nei hoki e ia te wairua o te rawakore i te ringa o ngā kaimahi i te kino.

¹⁴ Kia kangā te rangi i whānau ai ahau; kaua e whakapaingia te rā i puta, mai ai ahau i roto i tōku whaea.

¹⁵ Kia kangā te tangata nāna i kawe te kōrero ki tōku pāpā, i mea, “Kua whānau he tamaiti māu, he tāne,” meinga ana kia nui tōna koa.

¹⁶ Kia rite taua tangata ki ngā pā i hurihia e Ihowā, kīhai nei i rīpenetātia e ia. Kia rangona e ia te karanga i te ata, te hāmama i te poutūmārōtanga;

¹⁷ he kore nōna kīhai i whakamate i ahau i te putanga mai anō i te kōpū; ā, kia waiho ai tōku whaea hei urupā mōku, kia mau tonu ai te hapū o tōna kōpū.

¹⁸ He aha ahau i puta mai ai i te kōpū, kia kite i te raruraru, i te māuiui, kia poto anō ōku rā i te whakamā?