Heremaia 2 - Paipera Tapu 2012

Ka Tohe a Ihowā ki a Īharaira kia Rīpenetā

¹ I puta anō te kupu a Ihowā ki ahau, i mea:

² “Haere, karanga ki ngā taringa o Hiruhārama, mea atu, Ko te kupu tēnei a Ihowā: E mahara ana ahau ki a koe, ki te mahi pai a tōu tamarikitanga, ki te aroha i tōu mārenatanga, i a koe i aru i ahau i te koraha, i te whenua kīhai i whakatōkia.

³ He tapu a Īharaira ki a Ihowā, ko ngā mātāmua ia o ōna hua. Ko te hunga katoa e kai ana i a ia, ka kīia he hē tā rātou; ka pā te kino ki a rātou,” e ai tā Ihowā.

⁴ Whakarongo ki te kupu a Ihowā, e te whare o Hākopa, e ngā hapū katoa o te whare o Īharaira.

⁵ Ko te kupu tēnei a Ihowā: “He aha tāku kino i mau i ō koutou mātua, i matara atu ai rātou i ahau, i whai ai rātou i te horihori, ā, horihori iho rātou?

⁶ Kāhore hoki ā rātou kīanga ake, ‘Kei hea a Ihowā, nāna nei tātou i kawe mai i te whenua o Īhipa, nāna nei tātou i ārahi i te koraha, i te whenua tītōhea, he maha nei ngā rua, i te whenua o te matewai, o te ātārangi o te mate, i te whenua kīhai i haerea e te tangata, kīhai anō i nohoia e te tangata?’

⁷ Ā, nāku koutou i kawe mai ki te whenua maha ōna hua, ki te kai i ōna hua, i ōna mea papai. Nā, i tō koutou taenga mai, kei te whakapoke i tōku whenua, meinga ana e koutou tōku wāhi tupu hei mea whakarihariha.

⁸ Kāhore ngā tohunga i kī, ‘Kei hea a Ihowā?’ Ko ngā kairahurahu o te ture, kāhore i mātau ki ahau; kua hē hoki ngā rangatira ki ahau; ko ngā poropiti, nā Paara ngā tikanga i poropiti ai rātou, whāia ana e rātou ngā mea kāhore nei he pai.

⁹ “Mō reira ka totohe anō ahau ki a koutou,” e ai tā Ihowā, “ka totohe hoki ahau ki ngā tama a ā koutou tama.

¹⁰ Tēnā rā, whiti atu ki ngā motu o Kitimi titiro ai; unga tāngata anō ki Kerara, ka whakaaroaro mārie; tirohia hoki mehemea tērā anō te rite o tēnei mea i mua.

¹¹ I whakaputaia kētia rānei ōna atua e tētahi iwi, ehara nei anō i te atua? Nā, ko tōku iwi, kua whakaputaina kētia e rātou tō rātou korōria hei mea kāhore ōna pai.

¹² Mīharo mai, e ngā rangi, ki tēnei, kia nui hoki te wehi, kia ngaro noa iho,” e ai tā Ihowā.

¹³ “Ka rua hoki ngā hē kua mahia nei e tāku iwi: Ko ahau, ko te puna o ngā wai ora kua mahue i a rātou, haua iho e rātou ētahi poka, he poka pakaru, e kore nei e mau te wai ki roto.

¹⁴ He pononga rānei a Īharaira? He pononga i whānau ki te whare? He aha ia i waiho ai hei pāhuatanga?

¹⁵ Kua ngengere ngā raiona kūao ki a ia, kua hāmama; ā, kua meinga e rātou tōna whenua kia ururua; kua tahuna ōna pā, kāhore hoki he tangata noho i reira.

¹⁶ I pakaru anō tōu tumuaki i ngā tamariki o Nopo, o Tahapanehe.

¹⁷ He teka ianei nāu anō tēnei i mahi ki a koe, i te mea nāu i whakarere a Ihowā, tōu Atua, i a ia e ārahi ana i a koe i te ara?

¹⁸ Tēnā rā ko te aha māu i te ara ki Īhipa i inu ai koe i ngā wai o Hihoro? He aha rānei māu i te ara ki Ahiria, i inu ai koe i ngā wai o te awa?

¹⁹ Ko tōu hē anō hei riri i tāu, ko ōu tahuritanga kētanga anō hei papaki i a koe. Kia mōhio koe, kia kite hoki, he mea kino, he mea kawa, kei tāu whakarerenga i a Ihowā, i tōu Atua, kāhore hoki ōu wehi ki ahau,” e ai tā te Ariki, tā Ihowā o ngā mano.

²⁰ “I wāhia hoki tōu ioka e ahau i mua, motumotuhia ana e ahau ōu here; ā, kī mai ana koe, ‘E kore ahau e mahi!’ Heoi, i runga koe i ngā pukepuke tiketike katoa, i raro hoki i ngā rākau kōuru nui katoa, e koropiko ana, e kairau ana.

²¹ He wāina pai anō koe i tāku whakatōkanga i a koe, he momo pai katoa. Nā te aha koe i puta kē ai ki ahau, he mea kua heke te tupu, he wāina kē?

²² Ahakoa i horoi koe i a koe ki te hōura, ā, nui noa tāu hopi, e mau ana anō tōu hē ki tōku aroaro,” e ai tā te Ariki, tā Ihowā.

²³ “He pēhea tāu kī, ‘Kāhore ōku poke, kīhai ahau i whai i a Paarimi’? Tirohia iho ōu ara i te raorao, kia mōhio ki āu mahi – tōu rite, kei te kāmera tere, kōpikopiko tonu ōna ara;

²⁴ kei te kāihe mohoao kua mōhio ki te koraha, e hongi ana i te hau mō tōna hiahia; ka matenui ia ko wai hei whakahoki i a ia? Ko te hunga katoa e rapu ana i a ia e kore e whakangenge noa i a rātou; i tōna marama anō ka kitea ia e rātou.

²⁵ Kaiponuhia tōu waewae, kei kore te hū, tōu korokoro hoki kei mate i te wai. Nā, kei te mea koe, ‘Kua hē! Kāhore; he tāngata kē hoki āku i aroha ai, ā, ko rātou tāku e whai ai.’

²⁶ “Ka whakamā te tāhae ina mau, ka pēnā anō te whare o Īharaira, ka whakamā – rātou ko ō rātou kīngi, ko ō rātou rangatira, ko ō rātou tohunga, ko ō rātou poropiti.

²⁷ I a rātou e mea nā ki te rākau, ‘Ko koe tōku pāpā,’ ki te kāmaka, ‘I whānau ahau i roto i a koe.’ Hurihia ake e rātou ko te kōhamo ki ahau, kāhore hoki te aroaro; heoi i te wā e hē ai rātou, ka kī mai rātou, ‘Whakatika ki te whakaora i a mātou.’

²⁸ Kei hea rā ōu atua i hangā e koe mōu? Kia whakatika rātou, ki te mea ka ora koe i a rātou i te wā e hē ai koe. Rite tonu hoki ki ōu pā te maha o ōu atua, e Hūrā.

²⁹ “He aha te mea e totohe ai koutou ki ahau? Kua mahi kē koutou katoa i te kino ki ahau,” e ai tā Ihowā.

³⁰ “Maumau whiu noa ahau i ā koutou tamariki; kīhai rātou i ākona. Ko tā koutou hoari nāna i kai ō koutou poropiti, i pērā anō me tā te raiona kai kino.

³¹ “E te whakatupuranga nei, whakaaroa te kupu a Ihowā! He koraha rānei ahau ki a Īharaira, he whenua pōuri kerekere? He aha tāku iwi i mea ai, ‘Kua matara mātou; heoi anō ō mātou taenga atu ki a koe’?

³² E wareware rānei te kōtiro ki āna whakapaipai, te wahine mārena hou ki ōna whītiki? Ko tāku iwi ia kua wareware ki ahau, e kore ngā rā e taea te tatau.

³³ Tāu mahi ki te whakapai i tōu ara hei rapunga i te aroha! Nā, kei te whakaako koe i ngā wāhine kikino anō hoki ki ōu ara.

³⁴ Kua kitea anō ki ngā remu o ōu kākahu te toto o ngā wairua o ngā ware harakore. Kīhai i kitea e ahau i te wāhi i pakaru ai, engari i runga i ēnei katoa.

³⁵ Heoi, kei te kī nā koe, ‘He harakore nei ahau; he pono e tahuri kē atu ana tōna riri i ahau.’ Nanā, ka whakawā ahau i a koe, mō tāu kīanga, ‘Kāhore ōku hara.’

³⁶ He aha koe i kōpikopiko rawa ai, i mea ai kia pōkaia kētia he ara mōu? Ka whakamā anō koe ki Īhipa, ka pērā me koe i whakamā rā ki Ahiria.

³⁷ Inā, ka haere atu anō koe i reira, i runga anō ōu ringa i tōu mātenga, nō te mea kua paopao a Ihowā ki ōu whakawhirinakitanga, e kore anō koe e whai wāhi i ēnā.”