Heremaia 18 - Paipera Tapu 2012

Te Kaihanga Rīhi me te Uku

¹ Ko te kupu i puta mai ki a Heremaia, he mea nā Ihowā, i kī ia:

² “Whakatika, haere ki raro, ki te whare o te kaihanga rīhi, ā, ki reira ahau mea ai kia rongo koe i āku kupu.”

³ Kātahi ahau ka haere ki raro, ki te whare o te kaihanga rīhi, nā, kei te mahi ia i tāna mahi i runga i ngā wīra.

⁴ Nā, i te hēnga i roto i te ringa o te kaihanga rīhi o te oko i hangā e ia ki te paru, ka hangā anō e ia tētahi atu oko ki taua mea, ko tā te kaihanga rīhi i kite ai e tika ana kia hangā.

⁵ Nā, ka puta mai te kupu a Ihowā ki ahau, i mea ia:

⁶ “E kore ianei e āhei i ahau te mea i tā tēnei kaihanga rīhi ki a koutou, e te whare o Īharaira?” e ai tā Ihowā. “Nanā, ko te paru i roto i te ringa o te kaihanga rīhi, ko tō koutou rite tēnā i roto i tōku ringa, e te whare o Īharaira.

⁷ I te wā tonu e kōrero ai ahau mō tētahi iwi, mō tētahi kīngitanga, kia hūtia ake, kia wāhia iho, kia whakangaromia;

⁸ ki te tahuri taua iwi i kōrerotia rā e ahau i tō rātou kino, ka puta kē tōku whakaaro mō te kino i whakaaro ai ahau kia meatia ki a rātou.

⁹ Ā, i te wā tonu e kōrerotia ai e ahau tētahi iwi, tētahi kīngitanga rānei, kia hangā, kia whakatōkia,

¹⁰ ki te mahi taua iwi, i te kino ki tāku titiro, e kore ai e rongo ki tōku reo, kātahi ka puta kē tōku whakaaro mō te pai, i mea nei ahau hei pai mō rātou.

¹¹ “Nā, tēnā, kōrero ki ngā tāngata o Hūrā, ki te hunga hoki e noho ana i Hiruhārama, mea atu: ‘Ko te kupu tēnei a Ihowā: Nanā, tēnei ahau te hanga nei i te kino mō koutou, te whakatakoto whakaaro nei mō koutou. Tēnā rā, hoki mai āianei i tōna ara kino, i tōna ara kino, whakatikaia hoki ō koutou ara, ā koutou mahi.’ ”

Kua Wareware a Ihowā i te Iwi

¹² “Otiia ka kī rātou, ‘Kāhore he painga. Ka haere tonu hoki mātou i ā mātou nei i whakaaro ai, ā, ka mahi mātou i ngā tikanga pakeke a te ngākau kino o tēnā, o tēnā.’ ”

¹³ Nā reira tēnei kupu a Ihowā: “Tēnā, uia atu ki ngā iwi: Ko wai i rongo ki ngā mea pēnei? He hanga whakawehi rawa te mahi a te wāhina o Īharaira.

¹⁴ E whakarere rānei te hukarere o Repanōna i te kōhatu o te pārae? Ka maroke rānei ngā wai mātao e rere iho ana i tawhiti?

¹⁵ Kua wareware hoki tāku iwi ki ahau, kua tahu whakakakara ki te horihori; ā, kua meinga kia tūtuki rātou i ō rātou ara, i ngā huarahi onamata, haere ai i ngā huarahi i rahaki, i te ara kīhai i opehia ake.

¹⁶ Kia meinga tō rātou whenua hei mīharotanga, hei mea e whakatoia mai ai ā ake ake. Ka oho katoa ngā tāngata e tika ana nā reira, ka rūrū i tōna māhunga.

¹⁷ Ka tītaritaria rātou e ahau ānō nā te hau marangai i te aroaro o te hoariri; ka titiro ahau ki tō rātou tuarā, kāhore ki tō rātou kanohi, i te rā o tō rātou aituā.”

He Whakangārahu ki a Heremaia

¹⁸ Kātahi rātou ka mea, “Haere mai, tātou ka whakatakoto whakaaro mō Heremaia – e kore hoki e ngaro te ture i te tohunga, te whakaaro rānei i te tangata whakaaro nui, te kupu rānei i te poropiti. Haere mai, tātou ka patu i a ia ki te arero; kaua hoki e whakarongo ki tētahi o āna kupu.”

¹⁹ Kia whai whakaaro koe ki ahau, e Ihowā; whakarongo hoki ki te reo o te hunga e totohe ana ki ahau.

²⁰ E utua rānei te pai ki te kino? Kua keria nei hoki e rātou he rua mō tōku wairua. Kia mahara ki tōku tūnga ki tōu aroaro ki te kōrero i te pai mō rātou, ki te whakatahuri atu hoki i tōu āritarita i a rātou.

²¹ Mō reira hoatu ā rātou tamariki ki te hemokai, tukua atu ki te kaha o te hoari; whakapania ā rātou wāhine i te tamariki, whakapouarutia. Tukua ō rātou tāngata kia whakamatea, ā rātou taitamariki kia patua ki te hoari i te whawhai.

²² Kia rangona he tangi i roto i ō rātou whare, ina kawea e koe he ope huaki tata ki a rātou. Kua keria hoki e rātou he rua hei hopu i ahau, kua huna hoki he rore mō ōku waewae.

²³ Otiia, e Ihowā, e mōhio ana koe ki ō rātou whakaaro katoa mōku kia whakamatea; kaua he whakamārie mō tō rātou hē, kaua anō tō rātou hara e murua atu i tōu aroaro. Engari, kia whakatakā atu rātou i tōu aroaro; māu e mea ki a rātou i te wā e riri ai koe.