Heremaia 15 - Paipera Tapu 2012

Ka Heipū tonu te Whiunga

¹ Nā, ka mea a Ihowā ki ahau: “Ahakoa i tū a Mohi rāua ko Hamuera ki tōku aroaro, e kore ahau e whai ngākau ki tēnei iwi. Makā atu rātou i tōku aroaro, kia haere atu rātou.

² Nā, ki te mea rātou ki a koe, ‘Me haere mātou ki hea?’ kātahi koe ka mea ki a rātou, ‘Ko te kupu tēnei a Ihowā: Ko ngā mea mō te mate, ki te mate, ā, ko ngā mea mā te hoari, ki te hoari; ko ngā mea hoki mō te hemokai, ki te hemokai; ā, ko ngā mea mō te whakarau, ki te whakarau.’

³ “E whā hoki ngā tū mea e whakaritea e ahau mō rātou,” e ai tā Ihowā, “ko te hoari hei whakamate, ko ngā kurī hei haehae, ā, ko ngā manu o te rangi, ko ngā kararehe hoki o te whenua hei kai, hei whakamōtī.

⁴ Ka tukua hoki rātou e ahau kia poipoia haeretia i waenga i ngā kīngitanga katoa o te whenua, mō tā Mānahi tama a Hetekia kīngi o Hūrā, mō tāna i mea ai ki Hiruhārama.

⁵ Ko wai oti e tohu i a koe, e Hiruhārama, ko wai rānei e tangi ki a koe? Ko wai e peka atu ki te ui, kei te ora rānei koe?

⁶ Kua whakarērea ahau e koe,” e ai tā Ihowā, “kua hoki whakamuri koe. Koia i totoro atu ai tōku ringa ki a koe, i whakamōtītia ai koe; kua hōhā ahau ki te rīpenetā.

⁷ Kua pōwhiriwhiritia rātou e ahau ki te mea pōwhiriwhiri i ngā kūwaha o te whenua; kua whakapania rātou e ahau i te tamariki, kua ngaro i ahau tāku iwi; kāhore rātou i tahuri mai i ō rātou ara.

⁸ Ko ā rātou pouaru i tōku aroaro kua tokomaha atu i te onepū o ngā moana; kua kawea e ahau ki a rātou, hei hoariri mō te whaea o ngā taitama, he kaipāhua i te poutūmārōtanga; kua meinga e ahau kia pā whakarere ki a ia te pāwera me te tūmatatenga.

⁹ Ngohe kau te wahine ka tokowhitu nei āna tamariki; kua hemo tōna wairua; kua rere tōna rā i te mea ko te awatea nei anō; kua whakamā hoki ia, kua numinumi kau. Ka tukua atu hoki e ahau ō rātou mōrehu ki te hoari i te aroaro o ō rātou hoariri,” e ai tā Ihowā.

Ka Amuamu anō a Heremaia, ā, ka Whakaahurua

¹⁰ Auē, tōku mate, e tōku whaea, i whānau mai ahau i roto i a koe he tangata totohe, he tangata ngangare ki te whenua katoa! Kīhai ahau i whakatārewa atu i te moni whakatupu, kīhai anō te moni whakatupu i whakatārewaina mai ki ahau; otiia kei te kanga rātou katoa ki ahau.

¹¹ I mea a Ihowā: “He pono ka whakakahangia koe e ahau mō te pai; he pono ka meinga e ahau te hoariri kia īnoi ki a koe i te wā o te hē, i te wā o te mamae.

¹² “E taea rānei e tētahi te wāhi te rino, te rino o te raki, te parāhi rānei?

¹³ Ka hoatu e ahau ōu rawa me ōu taonga hei taonga parakete, kāhore hoki he utu, ā, hei mea tērā mō ōu hara katoa, arā i ōu rohe katoa.

¹⁴ Ā, ka meinga rātou e ahau kia haere tahi me ōu hoariri ki te whenua kīhai i mōhiotia e koe; nō te mea kei te ngiha he ahi i ahau e riri nei, kā tonu atu ki a koutou.”

¹⁵ E Ihowā, e mōhio ana koe; mahara ki ahau, tirohia ahau, rapua he utu mō tōku matenga i ōku kaitūkino. Kaua ahau e tangohia atu i a koe ka pūhoi nei ki te riri; kia mōhio koe, mōu ahau i tāwaia ai.

¹⁶ I kitea āu kupu, ā, kainga ake e ahau, ā, ki ahau hei whakakoa, hei whakahari āu kupu mō tōku ngākau; kua huaina hoki tōu ingoa mōku, e Ihowā, e te Atua o ngā mano.

¹⁷ Kīhai ahau i noho i roto i te whakaminenga o te hunga whakahī, kīhai i whakamanamana atu; i noho mokemoke ahau, he whakaaro ki tōu ringa; kua whakakīia nei hoki ahau e koe ki te riri.

¹⁸ He aha tōku mamae i mau tonu ai, tōku patunga tē mahu ai, tē pai ai ki te rongoā? Ka rite rawa rānei koe ki ahau me te awa pāremoremo, me ngā wai e kore e mau?

¹⁹ Mō reira ko te kupu tēnei a Ihowā: “Ki te hoki koe nā ka whakahokia koe e ahau, kia tū ai koe ki tōku aroaro, ā, ki te tangohia atu e koe te mea utu nui i te mea kino, ka rite koe ki tōku māngai. Ko rātou e hoki ki a koe, kaua ia koe e hoki ki a rātou.

²⁰ Ka meinga hoki koe e ahau ki tēnei iwi hei taiepa parāhi; ā, ka whawhai rātou ki a koe, otiia e kore rātou e kaha ki a koe; nō te mea kei a koe ahau hei whakaora i a koe, e mawhiti ai koe,” e ai tā Ihowā.

²¹ “Ka meinga anō koe e ahau kia mawhiti i roto i te ringa o te hunga kino, ka hokona anō koe e ahau i roto i te ringa o te hunga nanakia.”