Heremaia 12 - Paipera Tapu 2012

Ka Uiuia e Heremaia a Ihowā

¹ Tika tonu koe, e Ihowā, ina totohe ahau ki a koe; otiia, kia kōrerotia e ahau ki a koe ngā whakaritenga. He aha i whai pai ai te ara o te hunga kino? He aha i noho hūmārie ai te hunga katoa he nui rawa nei tō rātou tinihanga?

² Whakatōkia ana rātou e koe, āe rā kua whai pakiaka rātou; kei te tupu ake, āe rā kua whai hua; i ō rātou māngai e tata ana koe; i ō rātou whatumanawa ia kei tawhiti koe.

³ Otiia e mōhio ana koe ki ahau, e Ihowā, kua kite koe i ahau, e whakamātautau ana hoki koe i tōku ngākau ki a koe. Tōia mai rātou ānō he hipi e patua ana, motuhia atu rātou mō te rā o te parekura.

⁴ Kia pēhea te roa o te whenua ka tangi nei, o te otaota o ngā māra katoa ka maroke nei? Hei mea mō te kino o ōna tāngata, kua pau ōna kararehe me ngā manu; nō te mea i kī rātou, “E kore ia e kite i tō tātou mutunga iho.”

Ka Whakautu a Ihowā ki a Heremaia

⁵ “Nā, mehemea i rere koe i roto i te hunga haere i raro, ā, ka ngenge i a rātou, ka pēhea rā tāu whakataetae ki ngā hōiho? Nā, ahakoa ū tōu noho i te whenua rangatira, ka pēhea rā koe i te whakapehapeha o Horano?

⁶ Ko ōu tuākana nei hoki, ko ōu tēina, me te whare o tōu pāpā, kei te tinihanga ki a koe, ko rātou anō kei te karanga nui i muri i a koe. Kaua e whakapono ki tā rātou, ina kōrero pai ki a koe.

⁷ “Kua mahue i ahau tōku whare, whakarērea ake tōku kāinga pūmau; tukua ana e ahau te wahine i arohaina e tōku wairua ki te ringa o ōna hoariri.

⁸ Ko tōku kāinga tupu, tōna rite ki ahau kei te raiona i roto i te ngahere. Hāmama ana ia ki ahau; nā reira kino iho ahau ki a ia.

⁹ Ko tōku kāinga tupu, ki ahau he rite ki te manu kōtingotingo; hei hoariri mōna ngā manu i tētahi taha, i tētahi taha. Haere mai koutou, huihuia mai ngā kīrehe katoa o te pārae, mauria mai ki te horo kai.

¹⁰ Mōtī ake tāku māra wāina i ngā hēpara tokomaha, kua takatakahia e rātou tōku wāhi, kua meinga hoki e rātou tāku wāhi i matenui ai hei koraha, ururua rawa.

¹¹ Kua meinga e rātou hei ururua, ā, i a ia e ururua nei, tangi ana ia ki ahau. Kua ururua katoa te whenua, nō te mea kāhore he tangata e mahara ake ana tōna ngākau.

¹² Kua tae ngā kaipāhua ki ngā wāhi tiketike katoa o te koraha; ka kai hoki te hoari a Ihowā i tētahi pito o te whenua ā tae noa ki tētahi pito o te whenua; ki ngā kikokiko katoa kāhore he maunga rongo.

¹³ He wīti tā rātou i rui ai, he tātarāmoa tā rātou i kokoti ai; kua whakamamae rātou i a rātou, ā, kāhore he pai ki a rātou. Ka whakamā anō koutou ki ā koutou hua i te riri o Ihowā ka mura nei.”

¹⁴ Ko te kupu tēnei a Ihowā: “Mō ōku hoa tata katoa e kino nei, kua pā nei ki te wāhi tupu i hoatu e ahau mō tāku iwi, mō Īharaira: Tēnei ahau te huhuti atu nei i a rātou i runga i tō rātou whenua, ka hūtia atu anō e ahau te whare o Hūrā i waenganui i a rātou.

¹⁵ Ā tēnei ake, kua mutu tāku huhuti atu i a rātou, ka hoki ahau, ka aroha ki a rātou, ka whakahoki anō i a rātou ki tōna wāhi, ki tōna wāhi, ki tōna whenua, ki tōna whenua.

¹⁶ Ā tēnei ake, ki te ako mārie rātou ki ngā ara o tāku iwi, ā, ka oatitia tōku ingoa, arā, ‘E ora ana a Ihowā,’ ki te pērā rātou me rātou i whakaako rā i tāku iwi kia oatitia a Paara; kātahi ka hanga rātou ki waenganui i tāku iwi.

¹⁷ Tēnā ko tēnei, e kore rātou e rongo, kātahi taua iwi ka hūtia rawatia atu e ahau, ka whakangaromia,” e ai tā Ihowā.