Heremaia 10 - Paipera Tapu 2012

Nā ngā Whakapakoko te Turaki ki runga i Īharaira

¹ Whakarongo ki te kupu kua kōrerotia nei e Ihowā ki a koutou, e te whare o Īharaira;

² ko te kupu tēnei a Ihowā: “Kaua e ākona te ara o ngā tauiwi, kaua anō e wehi i ngā tohu o te rangi; e wehi ana hoki ngā tauiwi i aua mea.

³ He mea teka noa hoki ngā tikanga a ngā iwi: e tapahia ana hoki e tētahi he rākau i roto i te ngahere, he mahi nā ngā ringa o te kaimahi, ki te tītaha.

⁴ Kei te whakapaipai i taua mea ki te hiriwa, ki te kōura, whakamau rawa ki ngā titi, ki ngā hama, tē taea te whakakorikori.

⁵ He rite aua mea ki te nīkau, i āta mahia, kāhore ia he kupu; me amo, he kore nō rātou e haere. Kaua e wehi i a rātou, nō te mea e kore e taea e rātou te kino, kāhore hoki e āhei i a rātou te mea i te pai.”

⁶ Kāhore rawa he rite mōu, e Ihowā; he nui koe, he nui anō tōu ingoa i runga i te kaha.

⁷ Ko wai e kore e wehi i a koe, e te Kīngi o ngā iwi? He tika hoki tēnā ki a koe. Nō te mea i roto i ngā tāngata whakaaro nui katoa o ngā iwi, i roto i ō rātou kīngitanga katoa, kāhore he rite mōu.

⁸ Huihuia rātou, he pōauau rawa, he wairangi; ko tā ngā whakapakoko e whakaako ai, he rākau tonu ia!

⁹ E maua mai ana he hiriwa pāraharaha i Tarahihi, he kōura i Upata. He mahi nā te kaimahi nā ngā ringa anō o te kaiwhakarewa kōura: he purū, he pāpura ō rātou kākahu; he mea mahi katoa nā te hunga tohunga.

¹⁰ Ko Ihowā ia te Atua pono; ko ia te Atua ora, he kīngi pūmau tonu. Ka riri ia, ka wiri te whenua, e kore anō ngā iwi e kaha ake ina āritarita ia.

¹¹ “Kia pēnei tā koutou kī atu ki a rātou: ‘Ko ngā atua kīhai nei i hanga i te rangi, i te whenua, ka ngaro i runga i te whenua, i raro atu anō hoki i ngā rangi.’ ”

¹² Nāna i hanga te whenua, nā tōna kaha hoki; ko te ao he mea whakapūmau nā ōna whakaaro nui; ko ngā rangi he mea hora nā tōna mātauranga.

¹³ Ka puaki tōna reo, he haruru wai kei ngā rangi, e meinga ana e ia ngā kohu kia pupū ake i ngā pito o te whenua. E hangā ana e ia ngā uira mō te ua, e whakaputaina mai ana te hau i roto i ōna whare taonga.

¹⁴ Pōauau kau ngā tāngata katoa, ā, kāhore he mōhio; ko ngā kaiwhakarewa kōura katoa whakamā iho i te whakapakoko. He mea teka hoki tāna i whakarewa ai, kāhore hoki he wairua i roto.

¹⁵ He horihori kau rātou, he mahi pōhēhē; i te wā e pā ai ia ki a rātou ka ngaro.

¹⁶ Kāhore e rite ki ērā te wāhi i a Hākopa; ko ia hoki te kaiwhakaahua o ngā mea katoa; ko Īharaira hoki te iwi o tōna kāinga tupu, ko Ihowā o ngā mano tōna ingoa.

Te Manenetanga e Haere mai nei

¹⁷ Kohikohia āu mea i te whenua, e koe e noho nā i te pā e whakapaea ana.

¹⁸ Ko te kupu hoki tēnei a Ihowā: “Tēnei ahau te piupiu atu nei i ngā tāngata o te whenua i tēnei wā, te whakatupu kino nei hoki i a rātou, kia kitea ai e rātou.”

¹⁹ Auē te mate i ahau, mamae rawa tōku marūtanga. Otiia, kua mea nei ahau, “He pono nōku tēnei mate, me whakamanawanui.”

²⁰ Kua pāhuatia tōku tēneti, ko āku aho motumotu katoa. Kua riro atu āku tamariki i tōku taha, kua kore; kāhore ake he tangata hei whakamārō i tōku tēneti, hei whakaara i ōku kākahu ārai.

²¹ Kua pōauau nei hoki ngā hēpara; kīhai a Ihowā i rapua e rātou; nā reira i kore ai e tika tā rātou, ka marara hoki ā rātou kāhui katoa.

²² Nanā, te haere mai nei te reo o ngā kōrero, nui atu te whakaohooho nō te whenua ki te raki, hei mea i ngā pā o Hūrā hei ururua, hei nohoanga, mō ngā kīrehe mohoao.

²³ E mōhio ana anō ahau, e Ihowā, kāhore o te tangata ara i a ia ake anō; kāhore hoki i te tangata e hāereere nei māna e whakatikatika ōna hīkoinga.

²⁴ Pākia ahau, e Ihowā, me te whakariterite anō ia; kauaka ina riri koe, kei kāhore ahau i a koe.

²⁵ Ringihia atu tōu riri ki ngā tauiwi kāhore nei e mātau ki a koe, ki ngā hapū kāhore nei e karanga ki tōu ingoa. Kua pau hoki a Hākopa i a rātou, āe rā, pau rawa, mōtī rawa, ko tōna nohoanga hoki whakaururuatia ana e rātou.