Hapakuku 3 - Paipera Tapu 2012

He Īnoi nā Hapakuku

¹ He īnoi nā Hapakuku poropiti, ko Hikionoto te waiata.

² E Ihowā, kua rongo ahau i tōu rongo, wehi ana ahau, e Ihowā. Kia ora tāu mahi i waenganui o ngā tau, kia mātauria i waenganui o ngā tau; i te mea e riri ana, mahara ki te tohu tangata.

³ I haere mai te Atua i Temana, te Mea Tapu i Maunga Parana. Hera Hei hīpoki tōna korōria mō ngā rangi; kī tonu te whenua i te whakamoemiti ki a ia.

⁴ Ko tōna tīahotanga ānō ko te mārama; he hihi e puta ana mai i tōna ringa; i reira anō te hunanga o tōna kaha.

⁵ I mua i a ia te mate urutā e haere ana, i puta anō he mura whānāriki i ōna waewae.

⁶ Tū ana ia, ā, whanganga ana e ia te whenua; i titiro ia, ā, tītaria ana e ia ngā iwi. Rererere ana ngā maunga onamata, piko ana ngā pukepuke ō mua; ko ōna ara koia anō kei onamata.

⁷ I kite ahau, kei te tuatea ngā tēneti o Kūhana; wiri ana ngā tauārai o te whenua o Miriana.

⁸ I riri rānei a Ihowā ki ngā awa? Ki ngā awa rānei tōu riri, ki te moana rānei tōu riri? I haere ai koe i runga i āu hōiho, i āu hāriata whakaora?

⁹ I meinga tāu kōpere kia noho tahanga; ko ngā oati ki ngā hapū he kupu pono. Hera Wāhia ana e koe te whenua ki ngā awa.

¹⁰ I kite ngā maunga i a koe, ā, wehi ana; i pahemo ake te waipuke o ngā wai; i puaki te reo o te rire, ā, ara ana ōna ringa ki runga.

¹¹ Tū ana te rā me te marama i tō rāua kāinga, haere ana rātou i te mārama o āu pere, i te wherikotanga o tāu tao kanapa.

¹² Hāereerea ana e koe te whenua i runga i te āritarita, patua ā-wītitia ana e koe ngā iwi i runga i te riri.

¹³ I puta koe ki te whakaora i tāu iwi, āe rā, ki te whakaora i tāu i whakawahi ai. Pakaru ana i a koe te upoko i roto o te whare o te hunga kino, takoto kau ana te tūranga, ā taea noatia te kakī. Hera

¹⁴ Werohia ana e koe te upoko o ōna ariki ki āna tokotoko anō; ānō he paroro rātou e āki mai ana ki te tītaritari i ahau; ko tō rātou koanga ngākau he kai puku i te rawakore.

¹⁵ Takahia ana e koe te moana ki ōu hōiho, te haupūranga o ngā wai nunui.

¹⁶ I tōku rongonga, wiri ana tōku kōpū; oraora ana ōku ngutu i te reo. Ngoto ana te pirau ki roto ki ōku wheua, ā, wiri ana ahau i tōku wāhi. He mea ia e whai okiokinga ai ahau i te rā o te raru, i te haerenga ake ki te iwi e kōkiri ana mai ki a ia me āna kaieke hōiho.

Te Whakawhirinaki me te Koa i waenganui i te Raruraru

¹⁷ Ahakoa kore te piki e kōpuku, kore ngā wāina e whai hua; ka hē te mahi ōriwa, kāhore hoki ngā māra e whai kai; ko ngā hipi poto ake i roto i ngā taiepa, kāhore hoki he kau i roto i ngā taiepa kau;

¹⁸ otiia, ka koa ahau ki a Ihowā, ka whakamanamana ki te Atua o tōku whakaoranga.

¹⁹ Ko Ihowā, ko tōku Ariki, tōku kaha, ka meinga e ia ōku waewae kia rite ki ō te hāta, ka meinga anō ahau e ia kia takahi i runga i ōku wāhi tiketike. Ki te tino kaiwaiata i runga i āku mea whakatangi.