Hakaraia 9 - Paipera Tapu 2012

He Whakawātanga ki ngā Hoariri o Īharaira

¹ Ko te poropititanga o te kupu a Ihowā i te whenua o Hararaka; nā, ko tōna taunga atu kei Ramahiku. E whai kanohi ana hoki te tangata me ngā hapū katoa o Īharaira ki a Ihowā.

² Kei Hāmata anō e tata rā ki reira; kei Tāira, kei Hairona nō te mea he pā whakaaro nui rawa ia.

³ I hangā anō e Tāira he pā kaha mōna, i opehia e ia te hiriwa, ānō he puehu, te kōura parakore, ānō ko te paru o ngā waharoa.

⁴ Nanā, mā te Ariki ia e pei, ka patua hoki e ia tōna kaha i te moana; ka pau ia i te ahi.

⁵ Ka kite a Ahakerono, ā, ka wehi, a Kaha, nui atu te mamae, me Ekerono anō; nō te mea he whakamā tō tāna i tūmanako ai; ka kore hoki tō Kaha kīngi; e kore anō a Ahakerono e nohoia.

⁶ Ā, ka nohoia a Aharoro e te pōriro, ka hātepea atu anō e ahau te whakapehapeha o ngā Pirihitini.

⁷ Ka kore anō i ahau ōna toto i roto i tōna māngai, me āna mea whakarihariha i waenganui i ōna niho; nā, hei mōrehu ia mō tō tātou Atua, ka rite anō ki te kāwana i roto i a Hūrā, ka rite anō a Ekerono ki te Iepuhi.

⁸ Ka nohoia anō e ahau ngā taha o tōku whare, hei ārai mō te taua, mō te tangata anō e tika ana nā reira, mō te tangata e hoki ana. E kore anō te kaitūkino e tika nā waenga i a rātou ā muri ake nei; kua kite nei hoki ōku kanohi ināianei.

Te Kīngi e Haere mai mō Hiona

⁹ Kia nui te whakamanamana, e te tamāhine a Hiona, hāmama, e te tamāhine a Hiruhārama! Nanā, ko tōu Kīngi e haere nā ki a koe; he tika ia, he whakaora, he ngākau māhaki, e noho ana i runga i te kāihe, i te kūao anō, i te tama a te kāihe.

¹⁰ Ā, ka hātepea atu e ahau te hāriata o Ēparaima, me te hōiho o Hiruhārama; ka hātepea atu anō te kōpere o te whawhai; mō te rongo mau hoki āna kupu ki ngā tauiwi; ka kīngi anō ia i tētahi moana ā tae noa ki tētahi moana, i te awa ā tae noa ki ngā pito o te whenua.

¹¹ Me koe anō, nā te toto o tāu kawenata i ungā atu ai e ahau ōu herehere i roto i te poka kāhore nei ōna wai.

¹² Tahuri ki te pā kaha, e ngā herehere, e te hunga e tūmanako ana; i tēnei rā nei me whakaatu e ahau e rua āku whakautu ki a koe.

¹³ Kua piko hoki i ahau a Hūrā māku, kua whakakīia te kōpere ki a Ēparaima; ā, ka oho i ahau āu tama, e Hiona, ki te whawhai ki āu tama, e Kariki, ka meinga hoki koe e ahau kia rite ki te hoari a te mārohirohi.

¹⁴ Ā, ka kitea a Ihowā i runga i a rātou, ka puta atu anō tāna pere ānō he uira. Ka tangi hoki te tētere a te Ariki, a Ihowā, ā, ka haere ia i runga i ngā tūkauati o te tonga.

¹⁵ Mā Ihowā o ngā mano rātou e tiaki; ā, ka kai rātou, ā, ka takahi i ngā kōhatu o te kōtaha; ka inu anō rātou, ka hāmama me te mea nā te wāina; ka kī rātou ānō he peihana, ānō ko ngā koki o te āta.

¹⁶ Nā, ka whakaora a Ihowā, tō rātou Atua, i a rātou i taua rā, me he kāhui nō tāna iwi; ka rite hoki rātou ki ngā kōhatu o te karauna, maiangi rawa i runga i tōna whenua.

¹⁷ Nā, koia anō tōna pai, koia anō tōna ātaahua! Ka tupu ngā tama i te wīti, ngā kōtiro i te wāina hou.