Hakaraia 2 - Paipera Tapu 2012

Te Kitenga Tuatoru: Te Tangata he Aho Ruri Tōna

¹ I maranga ake anō ōku kanohi, i titiro, nā, ko tētahi tangata, he aho rūri i tōna ringa.

² Nā, ka mea ahau, “E haere ana koe ki hea?” Ā, ka mea ia ki ahau, “Ki te whanganga i Hiruhārama, kia kitea ai he aha tōna whānui, he aha tōna roa.”

³ Nā, ka haere te anahera i kōrero rā ki ahau, ā, ka puta anō tētahi anahera ki te whakatau i a ia,

⁴ ā, ka mea atu ki a ia, “E oma, kōrero atu ki te taitama nei, kī atu: ‘Ka nohoia a Hiruhārama, ka rite ki ngā pā taiepakore, i te tini hoki o te tangata, o ngā kararehe i roto.

⁵ Nō te mea ko ahau, ko Ihowā, hei taiepa ahi ahau ki a ia, ā tawhio noa, ā, ko ahau hei korōria i roto i a ia.’ ”

Ka Karangatia te Hunga i te Manene kia Hoki mai

⁶ “Hō, hō! Rere mai i te whenua o te raki,” e ai tā Ihowā; “kua whakamararatia atu hoki koutou e ahau me te mea ko ngā hau e whā o te rangi,” e ai tā Ihowā.

⁷ “E Hiona, kāwhaki i a koe, e koe e noho mai nā i te tamāhine a Papurōna.”

⁸ Ko te kupu hoki tēnei a Ihowā o ngā mano: “Nō muri i te korōria kua ungā ahau e ia ki ngā tauiwi nāna nā koutou i pahua: Ko te tangata hoki e pā ana ki a koutou, e pā ana ki te whatupango o tōna kanohi.

⁹ Nā, tēnei ka rūrū tōku ringa ki a rātou, ā, hei taonga pārau rātou mā ā rātou pononga; ā, ka mōhio koutou nā Ihowā o ngā mano ahau i unga mai.

¹⁰ “Waiata, kia koa, e te tamāhine a Hiona; nō te mea, nā, kei te haere atu ahau, ā, ka noho ahau i roto i a koe,” e ai tā Ihowā.

¹¹ “Ā, he maha ngā iwi e whakauru i a rātou ki a Ihowā i taua rā, ā, ko rātou hei iwi māku; ā, ka noho ahau i roto i a koe, ā, ka mōhio koe nā Ihowā o ngā mano ahau i unga mai ki a koe.

¹² Ā, ka riro i a Ihowā a Hūrā hei wāhi tupu māna i te whenua tapu, tērā anō hoki ia ka whiriwhiri i Hiruhārama.

¹³ Whakarongoa, e ngā kikokiko katoa, i te aroaro o Ihowā; kua whakaohokia mai hoki ia i tōna kāinga tapu.”