Hakaraia 13 - Paipera Tapu 2012

¹ I taua rā ka tuwhera he puna mō te whare o Rāwiri, mō ngā tāngata anō o Hiruhārama, hei mea mō te hara mō te poke.

Ka Hātapea ngā Whakapakoko

² “I taua rā,” e ai tā Ihowā o ngā mano, “ka hātepea atu e ahau ngā ingoa o ngā whakapakoko i runga i te whenua; e kore anō e maharatia ā muri ake nei; ka kore anō i ahau ngā poropiti, me te wairua poke, i runga i te whenua.

³ Nā, tēnei ake, ki te poropiti tētahi ā muri ake nei, ka mea tōna pāpā ki a ia, rāua ko tōna whaea i whānau ai ia, ‘E kore koe e ora; kua kōrero teka hoki koe i runga i te ingoa o Ihowā’; nā, ka werohia ia e tōna pāpā rāua ko tōna whaea i whānau ai ia, ina poropiti ia.

⁴ “I taua rā ka whakamā ngā poropiti, tēnei, tēnei, ki tāna kite, i te mea ka poropiti ia; e kore anō e kākahuria e rātou he kākahu huruhuru hei mea tinihanga.

⁵ Engari ka mea ia, ‘Ehara ahau i te poropiti, he paruauru ahau, he pononga hoki ahau nō tōku taitamarikitanga ake.’

⁶ Ā, ka mea tētahi ki a ia, ‘He aha ēnei patunga i ōu ringa?’ ā, ka mea ia, ‘Ko ōku patunga i roto i te whare o ōku hoa aroha.’ ”

Ka Patua te Hēpara, ka Marara te Kāhui

⁷ “E ara, e te hoari, ki tāku hēpara, ki te tangata i takahoatia ki ahau,” e ai tā Ihowā o ngā mano. “Patua te hēpara, kia marara hoki ngā hipi; ka tahuri atu anō tōku ringa ki ngā mea ririki.

⁸ Nā, i te whenua katoa,” e ai tā Ihowā, “e rua ngā wāhi o reira ka hātepea atu, ka mate; ka toe ia te tuatoru o ngā wāhi ki reira.

⁹ Ka kawea anō e ahau te tuatoru o ngā wāhi i roto i te ahi, ka tahia hoki te para, ka pērātia me te hiriwa e tahia ana. Ka whakamātautauria anō rātou e ahau, ka pērātia me te kōura. Ka karanga rātou ki tōku ingoa, ā, ka whakarongo ahau ki a rātou. Ka mea ahau, ‘He iwi rātou nāku,’ ā, ka mea rātou, ‘Ko Ihowā tōku Atua.’ ”