Hakaraia 1 - Paipera Tapu 2012

Ka Karanga a Ihowā ki Tāna Iwi kia Hoki ki a ia

¹ I te waru o ngā marama, i te rua o ngā tau o Tariuha, ka puta mai te kupu a Ihowā ki a Hakaraia, tama a Perekia, tama a Iro poropiti, i mea ia:

² “Nui atu te riri o Ihowā ki ō koutou mātua.

³ Nā, mea atu ki a rātou: Ko te kupu tēnei a Ihowā o ngā mano: ‘Tahuri mai anō ki ahau,’ e ai tā Ihowā o ngā mano, ‘ā, ka tahuri atu anō hoki ahau ki a koutou,’ e ai tā Ihowā o ngā mano.

⁴ Kei rite koutou ki ō koutou mātua, i karanga rā ngā poropiti o mua ki a rātou, i mea, ‘Ko te kupu tēnei a Ihowā o ngā mano, Tahuri mai ināianei i ō koutou ara kino, i ā koutou mahi kino.’ Otiia, kīhai rātou i rongo, kīhai hoki i whai taringa ki ahau, e ai tā Ihowā.

⁵ Ko ō koutou mātua, kei hea rātou? Ā, ko ngā poropiti, e ora tonu ana rānei rātou ake ake?

⁶ Nā, ko āku kupu me āku tikanga i whakahaua e ahau ki āku pononga, ki ngā poropiti, kīhai rānei ō koutou mātua i rokohanga e ērā? “Ā, hoki mai ana rātou, mea ana, ‘Ka pērā i tā Ihowā o ngā mano i whakaaro ai kia meatia ki a mātou, he mea whakarite ki ō mātou ara, ki ā mātou mahi; ka pērā tonu tāna ki a mātou.’ ”

Te Kitenga Tuatahi: Ngā Kaieke Hōiho

⁷ I te rua tekau mā whā o ngā rā o te tekau mā tahi o ngā marama, arā o te marama Hepata, i te rua o ngā tau o Tariuha, ka puta mai te kupu a Ihowā ki a Hakaraia tama a Perekia, tama a Iro poropiti, i mea ia:

⁸ I titiro ahau i te pō, nā, ko tētahi tangata e noho ana i runga i te hōiho whero, ā, tū ana ia i roto i ngā ramarama i te whārua; ā, i muri atu i a ia ko ētahi hōiho, he whero, he kōpurepure, he mā.

⁹ Nā, ka mea atu ahau, “E tōku ariki, he aha ēnei?” Ā, ka kī mai te anahera i kōrero ki ahau, “Māku e whakaatu ki a koe te tikanga o ēnei.”

¹⁰ Nā, ka oho mai te tangata i tū rā i roto i ngā ramarama, ka mea, “Ko ngā mea ēnei i ungā atu nei e Ihowā hei hāereere i te whenua.”

¹¹ Nā, ka whakahoki rātou ki te anahera a Ihowā e tū ana i roto i ngā ramarama, ka mea, “Kua hāereerea e mātou te whenua, nanā, kei te āta noho te whenua katoa, kei te mārie.”

¹² Kātahi ka oho te anahera a Ihowā, ka mea, “E Ihowā o ngā mano, kia pēhea te roa ōu ka kore nei e tohu i Hiruhārama, i ngā pā o Hūrā, e mauāharatia nei e koe i ēnei tau e whitu tekau?”

¹³ Nā, ka whakahoki a Ihowā ki te anahera i kōrero nei ki ahau, he kupu pai, arā he kupu whakamārie.

¹⁴ Heoi, ka mea ki ahau te anahera i kōrero nei ki ahau: “Karanga atu koe, mea atu: Ko te kupu tēnei a Ihowā o ngā mano: ‘He nui te hae i hae ai ahau ki Hiruhārama, ki Hiona.

¹⁵ Ā, he tino nui tōku riri ki ngā iwi e noho hūmārie ana; he iti noa rā hoki tōku riri, ā, nā rātou i whakatetere te hē.’

¹⁶ “Mō reira ko te kupu tēnei a Ihowā: ‘Kua hoki mai ahau ki Hiruhārama i runga i te tohu tangata; ka hangā tōku whare ki reira,’ e ai tā Ihowā o ngā mano, ‘ā, ka whakamārōkia he aho ki runga ki Hiruhārama.’

¹⁷ “Karanga atu anō, mea atu: Ko te kupu tēnei a Ihowā o ngā mano: ‘Tērā ōku pā e rauroha noa atu i te pai; ā, tērā a Ihowā ka whakamārie i Hiona, tērā ka whiriwhiri i Hiruhārama.’ ”

Te Kitenga Tuarua: Ngā Haona me ngā Kāmura

¹⁸ Nā, ka maranga ake ōku kanohi, ā, ka kite ahau, nanā, e whā ngā haona.

¹⁹ Nā, ka mea ahau ki te anahera i kōrero nei ki ahau, “He aha ēnei?” Anō rā ko ia ki ahau, “Ko ngā haona ēnei nāna i whakamarara a Hūrā, a Īharaira, a Hiruhārama.”

²⁰ Nā, ka whakakitea e Ihowā ētahi kāmura ki ahau, tokowhā.

²¹ Kātahi ahau ka mea, “I haere mai ēnei ki te aha?” Ā, ka kōrero tērā, ka mea, “Ko ngā haona ēnei nāna i whakamarara a Hūrā, i kore ai e ara te māhunga o tētahi. Otirā, i haere mai ēnei ki te whakawehi i a rātou, ki te whakataka iho i ngā haona o ngā tauiwi, o te hunga i ara nei tō rātou haona ki te whenua o Hūrā, ki te tītaritari i a ia.”