Ekoruhe 15 - Paipera Tapu 2012

Te Waiata a Mohi

¹ Kātahi ka waiata a Mohi rātou ko ngā tama a Īharaira i tēnei waiata ki a Ihowā, ā, ka whakahua, ka mea: “Ka waiata ahau ki a Ihowā, he hira noa atu hoki tōna korōria; ko te hōiho rāua ko tōna kaieke, kua pangā e ia ki te moana.

² Ko Ihowā tōku kaha, tāku waiata, ko ia anō hoki hei whakaora mōku; ko tōku Atua tēnei, ā, māku ia e whakakorōria; ko te Atua o tōku pāpā, ā, māku ia e whakanui.

³ He tangata whawhai a Ihowā; ko Ihowā tōna ingoa.

⁴ Ko ngā hāriata a Parao, me tāna ope, kua makā e ia ki te moana; ko āna rangatira whiriwhiri toremi iho ki te Moana Whero.

⁵ Taupokina iho rātou e ngā wai hōhonu; totohu ana rātou ki te rire, ānō he kāmaka.

⁶ “Ka whai korōria tōu ringa matau, e Ihowā, mō te kaha; nā tōu ringa, e Ihowā i mongamonga ai te hoa whawhai.

⁷ Nā te nui o tōu kaha ka turakina e koe te hunga i whakatika mai rā ki a koe. Te whakaputanga o tōu riri, pau katoa rātou, me he tumutumu otaota.

⁸ Nā te hau hoki o tōu ihu i haupū ai ngā wai; i tū ake ngā roma, ānō he pūranga, ā, whakatotoka ana te rire i te takere o te moana.

⁹ “I mea te hoariri, ‘Ka whai atu ahau, ka hopu, ka tuwha i ngā taonga, ka nā tōku ngākau i a rātou; ka unuhia tāku hoari, mā tōku ringa rātou e huna.’

¹⁰ I pupuhi atu koe ki tāu hau, taupokina iho rātou e te moana; totohu iho rātou, ānō he matā, i ngā wai nui.

¹¹ “Ko wai o ngā atua hei rite mōu, e Ihowā? Ko wai hei rite mōu, e whakamoemititia nei mō te tapu, e wehingia nei, e whakapaingia nei, e mahi nei i ngā mea whakamīharo?

¹² I totoro atu tōu ringa matau, horomia ana rātou e te whenua.

¹³ “Nā tōu atawhai i ārahina mai ai e koe te iwi kua hokona nei e koe; nā tōu kaha i aratakina ai rātou e koe ki tōu nohoanga tapu.

¹⁴ Ka rongo ngā iwi, ka tūiri; mau tonu te matapōuri ki ngā tāngata o Pirihitia.

¹⁵ Nō reira i ohorere ai ngā rangatira o Ēroma; ko ngā tāngata nunui o Moapa, mau tonu te wiri ki a rātou; memeha noa ngā tāngata katoa o Kanaana.

¹⁶ Tau ana ki a rātou te tūiri me te wehi; mā te nui o tōu ringa e tū tonu ai rātou, ānō he kōhatu, kia pahemo rā anō tāu iwi, e Ihowā, kia pahemo rā anō tēnei iwi kua hokona nei e koe.

¹⁷ Māu rātou e kawe atu, e whakatupu ki te maunga, ki tōu kāinga ō mua iho, ki te wāhi, e Ihowā, i hangā e koe hei nohoanga mōu, ki te wāhi tapu, e te Ariki, i whakapūmautia e ōu ringa.

¹⁸ Hei kīngi a Ihowā ake ake.”

¹⁹ I haere hoki ngā hōiho a Parao, me ana hāriata, me āna hōia eke hōiho ki te moana, ā, nā Ihowā i whakahoki ngā wai o te moana ki runga ki a rātou; tēnā ko ngā tama a Īharaira, i haere rā te wāhi maroke, i waenga moana.

Te Waiata a Miriama

²⁰ Ā, ka tango a Miriama poropiti, tuahine o Ārona, i te timipera ki tōna ringa; ā, haere atu ana ngā wāhine katoa i muri i a ia me ngā timipera, me te kanikani anō rātou.

²¹ Ā, i whakahokia e Miriama tā rātou: “Waiata ki a Ihowā, he hira noa atu hoki tōna korōria; nāna hoki te hōiho rāua ko tōna kaieke i whiu ki te moana.”

Ngā Wai Kawa

²² Ā, ārahina atu ana e Mohi a Īharaira i te Moana Whero, ā, ka haere rātou ki te koraha o Huri, ā, e toru ngā rā i haere ai rātou i te koraha, ā, kīhai i kitea he wai.

²³ Nā, ka tae rātou ki Mara, kīhai hoki i āhei te inu i ngā wai o Mara; he kawa hoki. Nā reira i huaina ai tōna ingoa ko Mara.

²⁴ Nā, ka amuamu te iwi ki a Mohi, ka mea, “Ko te aha hei inu mā mātou?”

²⁵ Nā, ka karanga ia ki a Ihowā; ā, ka whakakitea mai he rākau e Ihowā ki a ia, ā, pangā ana e ia ki ngā wai, nā, ka reka ngā wai. I hōmai e ia he ture ki a rātou i reira, me tētahi ritenga; i whakamātauria rātou e ia ki reira.

²⁶ I mea hoki ia, “Ki te rongo mārie koe ki te reo o Ihowā, o tōu Atua, ā, ka mahi i te mea tika ki tāna titiro, ā, ka whai taringa ki āna whakahau, ka pupuri hoki i āna tikanga katoa, e kore rawa tētahi o aua mate i whakapāngia ki ngā Īhipiana e ahau, e whakapāngia atu e ahau ki a koe. Ko Ihowā hoki ahau e whakaora nei i a koe.”

²⁷ Nā, ka tae rātou ki Erimi, kotahi tekau mā rua nei ngā puna wai i reira, me ngā nīkau e whitu tekau; ā, ka noho rātou ki reira, ki te taha o ngā wai.