Ehetere 7 - Paipera Tapu 2012

¹ Heoi, kua tae te kīngi rāua ko Hāmana ki te hākari, ki te kuīni, ki a Ehetere,

² ā, ka mea anō te kīngi ki a Ehetere i te rua o ngā rā, i te mea e inu wāina ana, “He aha tāu e mea nei māu, e Kuīni Ehetere? Ka hoatu hoki ki a koe. He aha hoki tāu e tono ai? Ahakoa ko te hāwhe o te kīngitanga, ka meatia.”

³ Kātahi ka whakautu a Kuīni Ehetere, ka mea, “Ki te mea kua manakohia ahau e koe, e te kīngi, ā, ki te pai te kīngi; ko tāku e mea ai māku, ko ahau kia whakaorangia, ko tāku e tono nei māku, ko tōku iwi.

⁴ Kua oti hoki mātou, ahau me tōku iwi, te hoko kia whakangaromia, kia whakamatea, kia hunā. Otiia me i hokona mātou hei pononga tāne, hei pononga wāhine, kua whakarongo puku ahau. E kore anō ia e rite i te hoariri ngā mea a te kīngi ka maumauria nei.”

⁵ Kātahi ka utua e Kīngi Ahahueruha, ka mea ki a Kuīni Ehetere, “Ko wai rā? Kei hea rā te tangata i pokanoa nei tōna ngākau ki te mea i tēnei mea?”

⁶ Anō rā ko Ehetere, “He hoariri, he hoa whawhai, anei ko te Hāmana kino nei.” Kātahi ka mataku a Hāmana i te aroaro o te kīngi rāua ko te kuīni.

⁷ Nā, whakatika ana te kīngi, i te inumanga wāina, he riri hoki nōna, ā, haere ana ki te kāri o te whare. Ko Hāmana hoki, tū tonu ki te īnoi ki a Kuīni Ehetere mōna kia whakaorangia; i kite hoki ia kua takoto te hē mōna i te kīngi.

⁸ Kātahi ka hoki te kīngi i te kāri o te whare ki te whare inu wāina, nā, ko Hāmana kua takoto ki te takotoranga o Ehetere. Kātahi ka mea te kīngi, “E takotoria anō rānei e ia te kuīni i tōku aroaro i te whare?” Puta ana te kupu i te māngai o te kīngi, ka hīpokina e rātou te mata o Hāmana.

⁹ Kātahi ka mea a Harapona, tētahi o ngā rangatira rūma i te aroaro o te kīngi, “Nanā, te tārawa e rima tekau whatīanga te tiketike, i hangā e Hāmana mō Mororekai, nāna nei te kupu pai mō te kīngi, e tū rā i te whare o Hāmana.” Anō rā ko te kīngi, “Tāronatia ia ki runga.”

¹⁰ Heoi, tāronatia ana a Hāmana ki runga ki te tārawa i oti rā i a ia mō Mororekai, ā, ka māriri iho te riri o te kīngi.