Āmoho 8 - Paipera Tapu 2012

Te Kete Hua Raumati

¹ I whakakitea anō tēnei e te Ariki, e Ihowā, ki ahau – nā, he kete hua raumati.

² Nā, ka mea ia, “Ko te aha te kitea ana e koe, e Āmoho?” Anō rā ko ahau, “He kete hua raumati.” Anō rā ko Ihowā ki ahau, “Kua tae mai te mutunga ki tāku iwi, ki a Īharaira; e kore tā rātou e whakarērea noatia e ahau ā muri ake nei.

³ “He auē anō ngā waiata o te temepara i taua rā,” e ai tā te Ariki, tā Ihowā; “ka maha ngā tinana mate i ngā wāhi katoa; ka ākiritia pukutia atu.”

⁴ Whakarongo ki tēnei, e te hunga i horomia ai te rawakore, i meinga ai te hunga iti o te whenua kia ngohe;

⁵ e kī ana koutou, “Āhea pahemo ai te kōwhititanga marama, kia hoko wīti ai tātou, te hāpati hoki, kia whakaputaia atu ai te wīti e tātou?” Ka meinga te epa kia iti, te hekere kia nui, me te teka ki ngā pāuna tinihanga;

⁶ kia hokona ai e tātou ngā ware ki te hiriwa, te rawakore ki ngā hū e rua; nā, ko te wīti rukenga me hoko atu.

⁷ Kua oatitia e Ihowā te nui o Hākopa: “E kore ahau e wareware ki tētahi o ā rātou mahi ā ake ake.

⁸ E kore ianei te whenua e wiri ki tēnei? E kore ianei te hunga katoa e noho ana i reira e tangi? Āe rā, ka pari katoa ake nei hoki ānō ko te awa; ka ākina e te hau, ka hoki iho anō, ka pērā me te awa o Īhipa.”

⁹ “Nā, i taua rā,” e ai tā te Ariki, tā Ihowā, “ka meinga e ahau te rā kia toene i te awatea, ā, ka pōuri i ahau te whenua i te mea e mārama ana anō te rā.

¹⁰ Ka puta kē anō i ahau ā koutou hākari hei tangihanga, ā koutou waiata katoa hei apakura; he taratara tāku kākahu mō ngā hope katoa; mō ngā māhunga katoa he pākira. Ka rite i ahau ki te tangihanga ki te huatahi, ā, ko tōna mutunga hei rā mamae.

¹¹ “Nanā, kei te haere mai ngā rā,” e ai tā te Ariki, tā Ihowā, “e tukua ai e ahau he hemokai ki te whenua, ehara i te hemokai taro, ehara anō i te matewai; engari he hiahia kia rongo i ngā kupu a Ihowā.

¹² Ā, ka ātiutiu atu rātou i tētahi moana ki tētahi moana, i te raki ki te rāwhiti; ka kōpikopiko, he rapu i te kupu a Ihowā; heoi e kore e kitea.

¹³ “I taua rā ka hemo ngā wāhina ātaahua, me ngā taitama, i te matewai.

¹⁴ Nā, ko te hunga e oati ana i te hē o Hamaria, e kī ana, ‘Kei te ora tōu Atua, e Rāna,’ me tēnei, ‘Kei te ora te tikanga o Peerehepa’ – ka taka rawa rātou, e kore anō e ara ā muri ake nei.”