Āmoho 6 - Paipera Tapu 2012

Te Urupatu o Īharaira

¹ Auē te mate mō te hunga e noho hūmārie ana i Hiona, mō te hunga hoki e whakawhirinaki ana ki te maunga o Hamaria, ngā tāngata whai ingoa o te tuatahi o ngā iwi, i tae atu nei te whare o Īharaira ki a rātou!

² Haere tonu ki Karane titiro ai; haere atu i reira ki Hāmata nui; haere tonu atu ki Kāta o ngā Pirihitini. He pai atu rānei i ēnei kīngitanga? Nui atu rānei tō rātou rohe i tō koutou rohe?

³ E te hunga e whakamatara atu nā i te rā kino, e mea nā i te nohoanga o te tutū kia tata mai.

⁴ E takoto nā i runga i te moenga rei, e whārōrō nā i runga i ō rātou takotoranga. E kai nā i ngā reme o te kāhui, i ngā kūao kau o waenganui i te tūranga kau.

⁵ E waiata nā i ngā waiata pōauau ki te rangi hātere; e whakaaroa ana hoki e rātou ngā mea whakatangi, e pērā ana me Rāwiri;

⁶ e inu ana i te wāina o ngā peihana, ā, e whakawahi ana i a rātou ki ngā hinu pai rawa; kāhore ia ō rātou pōuri mō te aituā o Hōhepa,

⁷ Nā āianei, ko rātou ki mua ka whakaraua atu o te hunga e whakaraua ana, ā, ka kore te hākari a te hunga i whārōrō rā.

⁸ Kua oatitia te Ariki, a Ihowā, e ia anō, e ai tā Ihowā, tā te Atua o ngā mano: “E whakarihariha ana ahau ki tā Hākopa e whakaī nā, e kino ana ki ōna whare kīngi; mō reira ka tukua atu e ahau te pā me ngā mea i roto.”

⁹ Nā, ki te toe ngā tāngata kotahi tekau i roto i te whare kotahi, ka mate rātou.

¹⁰ Ā, ki te tangohia ake tētahi e tōna matua kēkē, arā e te kaitahu mōna, kia maua mai ai ngā wheua i roto i te whare, ā, ka mea ia ki te tangata i roto rawa i te whare, “He tangata anō rānei tēnā kei a koe nā?” Ā, ka mea ia, “Kāhore!” Kātahi ia ka mea, “Whakarongoa; e kore hoki tātou e whakahua i te ingoa o Ihowā.”

¹¹ Nō te mea, nanā, kei te whakahau a Ihowā, ā, ka patua te whare nui ki ngā pakaru, te whare iti ki ngā ngātata.

¹² E rere rānei te hōiho i runga i te kāmaka? E parautia rānei a reira ki te kau? I whakaputaina kētia ai e koutou te whakawā hei au, ngā hua hoki o te tika hei taru kawa –

¹³ e koa nā hoki koutou ki te kāhore noa iho, e mea nā, “He teka ianei kua riro mai he haona i a tātou, he mea nā tō tātou uaua?

¹⁴ “Otiia, nanā, ka ara i ahau tētahi iwi ki a koutou, e te whare o Īharaira,” e ai tā Ihowā, tā te Atua o ngā mano, “ā, ka whakatupuria kinotia koutou e rātou i te haerenga atu ki Hāmata, ā tae noa ki te awa o te Arapa.”