Āmoho 5 - Paipera Tapu 2012

He Karanga ki te Rīpenetātanga

¹ Whakarongo ki tēnei kupu, kua maranga nei i ahau hei tangi ki a koutou, e te whare o Īharaira:

² “Kua hinga te wāhina a Īharaira, e kore ia e ara i muri; kua whakatakā ia ki runga ki tōna oneone; kāhore he mea hei whakaara ake i a ia.”

³ Nō te mea ko te kupu tēnei a te Ariki, a Ihowā: “Ko te pā kotahi nei te mano i te haerenga atu, kotahi rau e toe, ā, ko tērā kotahi nei te rau i te haerenga atu, kotahi tekau e toe ki te whare o Īharaira.”

⁴ Ko te kupu hoki tēnei a Ihowā ki te whare o Īharaira: “Rapua ahau, kia ora ai koutou;

⁵ otiia, kaua e rapu i Pētēre, kaua e haere ki Kirikara, kaua anō e haere ki Peerehepa; nō te mea tērā a Kirikara ka riro i te whakarau, ā, hei kore noa iho a Pētēre.”

⁶ Rapua a Ihowā, ā, ka ora koutou; kei toro atu ia, ānō he ahi, i roto i te whare o Hōhepa, ā, pau noa, ā, kore noa iho he kaitinei i roto i Pētēre.

⁷ E te hunga i puta kē ai te whakawā hei taru kawa, i tāia ai te tika ki te whenua.

⁸ Rapua te kaihanga o Matariki, o Tautoru; e riro kē ana i a ia te ātārangi o te mate hei ata, e whakapōuritia ana e ia te rā hei pō; e karangatia ana e ia ngā wai o te moana, ā, ringihia ana e ia ki runga ki te mata o te whenua, ko Ihowā tōna ingoa;

⁹ nāna i whakaputa ohorere te whakangaromanga ki te hunga kaha, i tae ai te whakangaromanga ki te pā kaha.

¹⁰ E kinongia ana e rātou te kairiri hē i te kūwaha, ā, he mea whakarihariha ki a rātou te tangata kōrero tika.

¹¹ Nā, i te mea he takahi tā koutou i te ware, he tango i te takoha wīti i a ia; he whare kōhatu tārai tā koutou i hanga ai, nā, e kore e nohoia e koutou; he māra wāina e minaminatia ana tā koutou i whakatō ai, otiia e kore te wāina o aua māra e inumia e koutou.

¹² E mōhiotia ana hoki e ahau te maha o ō koutou poka kē, me te kaha o ō koutou hara – o koutou e whakatupu kino nei i te tangata tika, e tango nei i te utu whakapati, e whakangau kē nei i tā te rawakore i te kūwaha.

¹³ Mō reira ka whakarongo puku te tangata tūpato i taua wā; nō te mea he wā kino.

¹⁴ Rapua te pai, kauaka hoki te kino, kia ora ai koutou; pēnei ko Ihowā, ko te Atua o ngā mano hei hoa mō koutou, hei pēnā anō me tā koutou e kī nā.

¹⁵ Kinongia te kino, arohaina te pai, whakapūmautia te whakawā ki te kūwaha. Tērā pea a Ihowā, te Atua o ngā mano, ka aroha ki te toenga o Hōhepa.

¹⁶ Mō reira tēnei kupu a Ihowā, a te Atua o ngā mano, a te Ariki: “I ngā waharoa katoa ko te tangi; ko tā rātou kupu i ngā huarahi katoa, ‘Auē! auē!’ Ka karangatia te kaingaki whenua ki te tangi, me te hunga mātau ki te uhunga, hei auē;

¹⁷ ā, he auē i ngā māra wāina katoa, ka tika atu hoki ahau i waenganui i a koe,” e ai tā Ihowā.

He Rā Pōuri te Rā o Ihowā

¹⁸ Auē te mate mō koutou e hiahia nei ki te rā o Ihowā! Hei aha mā koutou te rā o Ihowā? He pōuri hoki, ehara i te mārama;

¹⁹ ka pērā me te tangata i rere atu i te aroaro o te raiona, ā, ka tūtaki te pea ki a ia; i haere rānei ki roto ki te whare, ā, okioki atu ana tōna ringa ki te pakitara, nā, ngaua iho ia e te nākahi.

²⁰ He teka ianei tērā e pōuri te rā o Ihowā, e kore e mārama? Tērā e pōuri kerekere, kāhore hoki he mārama i roto?

²¹ “E kino ana ahau, e whakarihariha ana ki ā koutou hākari, ā, e kore ahau e āhuareka ki ā koutou huihui nunui.

²² Āe rā, ahakoa whakaeke noa koutou i ngā tahunga tinana, i ā koutou whakahere totokore ki ahau, e kore e manakohia e ahau. E kore anō e tirohia e ahau ngā whakahere mō te pai, arā ā koutou mea mōmona.

²³ Maua atu kia matara i ahau te ngangau o āu waiata; e kore hoki ahau e whakarongo ki te rangi o āu hātere.

²⁴ Engari, kia huri mai te whakawā ānō he wai, te tika ānō he awa nui.

²⁵ “I kawea mai koia e koutou ki ahau he patunga tapu, he whakahere totokore, e te whare o Īharaira, i te koraha, i ngā tau e whā tekau?

²⁶ Āe rā, kua maua e koutou a Hikutu, tō koutou kīngi, a Kiunu hoki, ā koutou whakapakoko, te whetū o tō koutou atua, i hangā nei e koutou mā koutou.

²⁷ Nā, ka whakaraua koutou e ahau ki kō atu i Ramahiku,” e ai tā Ihowā nōna nei te ingoa, Ko te Atua o ngā Mano.