Āmoho 4 - Paipera Tapu 2012

¹ Whakarongo ki tēnei kupu, e ngā kau o Pahana, i te maunga o Hamaria, e whakatupu kino nā i ngā ware, e kuru nā i ngā rawakore, e mea nā ki ō rātou ariki, “Kawea mai, kia inu tātou.”

² Kua oatitia tōna tapu e te Atua, e Ihowā: “Nanā, kei te haere mai ngā rā ki a koutou e mauria ai koutou e rātou ki te matau, ō koutou whakamutunga ki te matau ika.

³ Ka haere atu anō koutou nā ngā pakaru, nā ngā wāhi e hāngai mai ana ki tēnei, ki tēnei; ā, ka ākiri koutou i a koutou ki Haramona,” e ai tā Ihowā.

⁴ “Haere mai ki Pētēre, ki reira poka kē ai; ki Kirikara whakanui ai i te poka kē; kawea mai anō ā koutou patunga tapu i tēnei ata, i tēnei ata, ā koutou whakatekau, i te toru o ngā rā.

⁵ Tāpaea anō he whakahere whakawhetai, he mea kīnaki ki te rēwena, kauwhautia hoki, kārangarangatia ngā whakahere noa ake; ko tā koutou hoki tēnei i pai ai, e ngā tama a Īharaira,” e ai tā te Ariki, tā Ihowā.

Ka Karohia e Īharaira te Whakatikanga

⁶ “I tukua anō e ahau he parakore mō ngā niho ki a koutou i roto i ō koutou pā katoa, he tarokore ki ō koutou wāhi katoa; heoi, kīhai koutou i tahuri ki ahau,” e ai tā Ihowā.

⁷ “I kaiponuhia anō e ahau te ua ki a koutou i te mea kia toru ake marama ko te kotinga wīti; i meinga anō e ahau kia ua ki runga ki tētahi pā, ā, ki tētahi pā i mea ahau kia kaua e ua. Ko tētahi wāhi i uaina, ā, ko te wāhi kīhai i uaina, maroke noa iho.

⁸ Nā, kōpiko atu ana ētahi pā e rua, e toru, ki te pā kotahi ki te inu wai, ā, kore ake i mākona; otiia, kīhai koutou i hoki mai ki ahau,” e ai tā Ihowā.

⁹ “Kua patua koutou e ahau ki te ngingio, ki te koriri; nui noa ā koutou kāri, ā koutou māra wāina, ā koutou piki, ā koutou ōriwa, pau ake i te whangawhanga; heoi, kīhai koutou i hoki mai ki ahau,” e ai tā Ihowā.

¹⁰ “I tukua e ahau te mate urutā ki a koutou, he pērā tonu me tō Īhipa; ko ā koutou taitama he mea patu nāku ki te hoari, ko ā koutou hōiho riro ana i ahau, ā, meinga ana e ahau te piro o tō koutou puni kia kake ake ki ō koutou ihu rawa; heoi, kīhai koutou i hoki mai ki ahau,” e ai tā Ihowā.

¹¹ “I hurihia ētahi o koutou e ahau ki raro, i pērātia me tā te Atua hurihanga i Horoma, i Komora, ā, rite tonu koutou ki te mōunga i kapohia mai i roto i te weranga; heoi, kīhai koutou i hoki mai ki ahau,” e ai tā Ihowā.

¹² “Mō reira ka meatia tēnei e ahau ki a koe, e Īharaira; ka meinga nei tēnei e ahau ki a koe, nā, kia rite ōu mea mō tōu tūtaki ki tōu Atua, e Īharaira.”

¹³ Nō te mea, nā, ko te kaiwhakaahua o ngā maunga, e hanga nei i te hau, e whakaatu nei ki te tangata i tāna i whakaaro ai, e mea nei i te ata kia pōuri, ā, e haere ana i runga i ngā wāhi tiketike o te whenua – ko Ihowā, ko te Atua o ngā mano tōna ingoa.