Āmoho 3 - Paipera Tapu 2012

Te Kaniawhea me te Whakawhiunga o Īharaira

¹ Whakarongo ki tēnei kupu i kōrerotia e Ihowā mō koutou, e ngā tama a Īharaira, mō te hapū katoa i kawea mai e ahau i te whenua o Īhipa, i mea ahau:

² “Ko koutou anake tāku i mōhio ai o ngā hapū katoa o te ao. Mō reira ka whiua koutou e ahau mō ō koutou hē katoa.”

³ E haere tahi anō rānei te tokorua, ki te kore e whakaae ki a rāua?

⁴ E hāmama rānei te raiona i te ngahere i te mea kāhore āna tūpāpaku? E tangi rānei te reo o te kūao raiona i tōna kuhunga, ki te kore tētahi mea e mau i a ia?

⁵ E taka rānei te manu ki roto ki te māhanga i runga i te whenua i te mea kāhore he āhere mōna? E mokowhiti ake rānei te māhanga i te oneone, ā, hore rawa he mea e mau?

⁶ E tangi rānei te tētere i roto i tētahi pā, ā, kāhore te iwi e wehi? E puta rānei he kino ki te pā, ā, ehara i a Ihowā nāna i mahi?

⁷ He pono e kore te Ariki, a Ihowā, e mahi i tētahi mea, engari ka whakakitea e ia tōna whakaaro huna ki āna pononga, ki ngā poropiti.

⁸ Kua hāmama te raiona; ko wai e kore e wehi? Kua kōrero a Ihowā, te Ariki; ko wai e kore e poropiti?

Te Turakitanga o Hamaria

⁹ Pānuitia atu i roto i ngā whare kīngi i Aharoro, i ngā whare kīngi hoki i te whenua o Īhipa, mea atu, “Whakamine i a koutou ki runga ki ngā maunga o Hamaria, ka mātakitaki ki ngā ngangau nui i waenga o reira, ki ngā tūkinotanga hoki i waenga o reira.”

¹⁰ “Kāhore hoki rātou e mōhio ki te mahi i te tika,” e ai tā Ihowā, “e rongoā nei rātou i te mahi tutū me te pāhua i roto i ō rātou whare kīngi.”

¹¹ Mō reira ko te kupu tēnei a te Ariki, a Ihowā: “He hoariri tērā, ka karapotia e ia te whenua; ā, ka riro iho i a ia tōu kaha, ka pāhuatia hoki ōu whare kīngi.”

¹² Ko te kupu tēnei a Ihowā: “Ka rite ki te hēpara e tango mai nei i ngā waewae e rua i te māngai o te raiona, i tētahi wāhi rānei o te taringa; ka pēnā anō te tangohanga mai o ngā tama a Īharaira e noho rā i Hamaria i te pito o te moenga, i runga hoki i ngā urunga o tētahi moenga.”

¹³ “Whakarongo koutou, whakaaturia hoki he hē mō te whare o Hākopa,” e ai tā te Ariki, tā Ihowā, tā te Atua o ngā mano.

¹⁴ “Nō te mea hei te rā e pā ai tāku ki a Īharaira mō ōna poka kē, ka pā anō hoki tāku ki ngā āta o Pētēre, ā, ka pōutoa ngā haona o te āta, ka taka ki te whenua.

¹⁵ Ka patua anō e ahau te whare hōtoke me te whare raumati; ā, ka mōtī ngā whare rei, ka kore ngā whare nunui,” e ai tā Ihowā.