Āmoho 2 - Paipera Tapu 2012

¹ Ko te kupu tēnei a Ihowā: “Ka toru nei ngā pokanga kētanga o Moapa, āe rā, ka whā, nā, e kore e whakatahuritia atu e ahau te whiu mōna; nō te mea nāna i tahu ngā wheua o te kīngi o Ēroma hei kotakota.

² Engari, ka tukua atu e ahau he ahi ki Moapa, ā, ka pau i reira ngā whare kīngi o Kirioto; ā, ka mate a Moapa i runga i te ngangau, i te hāmama, i te tangi o te tētere.

³ Ā, ka hātepea atu e ahau te kaiwhakawā i roto i a ia, ka patua rātou tahi ko ngā rangatira katoa o reira,” e ai tā Ihowā.

He Whakawātanga ki Īharaira

⁴ Ko te kupu tēnei a Ihowā: “Ka toru nei ngā pokanga kētanga o Hūrā, āe rā, ka whā, nā, e kore e whakatahuritia atu e ahau te whiu mōna; nō te mea kua whakahāwea rātou ki te Ture a Ihowā, kīhai hoki i pupuri i āna tikanga, ā, kua meinga rātou e ā rātou kōrero teka kia kotiti kē, i whāia nei e ō rātou mātua.

⁵ Engari, ka tukua e ahau he ahi ki a Hūrā, ā, pau ake i reira ngā whare kīngi o Hiruhārama.”

⁶ Ko te kupu tēnei a Ihowā: “Ka toru nei ngā pokanga kētanga o Īharaira, āe rā, ka whā, nā, e kore e whakatahuritia atu e ahau te whiu mōna; nō te mea kua hokona e rātou te tangata tika ki te hiriwa, te rawakore ki ngā hū e rua.

⁷ E minamina ana rātou ki te puehu o te whenua i runga i te māhunga o ngā ware; ā, whakaparoritia ake e rātou te ara o te hunga māhaki; ā, ka haere te tangata rāua ko tōna pāpā ki te kōtiro kotahi hei whakapoke i tōku ingoa tapu.

⁸ Nā, takoto ana rātou ki te taha o ngā āta katoa i runga i ngā kākahu i hōmai hei taunaha, ā, i roto i te whare o tō rātou atua kei te inu rātou i te wāina a te hunga i whakataua nei te hē ki a rātou.

⁹ “Otiia, i whakangaromia e ahau te Amori i tō rātou aroaro, ko tōna roa koia anō kei te roa o te hīta, ā, he kaha ia, pērā i ngā oki. Heoi, whakangaromia ana e ahau ōna hua i runga, ōna pakiaka i raro.

¹⁰ “I kawea mai anō hoki koutou e ahau i te whenua o Īhipa, ā, e whā tekau ngā tau i ārahina ai koutou i te koraha, he mea kia riro mai ai te whenua o te Amori.

¹¹ Ā, i whakaarahia ake e ahau ētahi o ā koutou tama hei poropiti, ētahi hoki o ā koutou taitama hei Natari. He teka ianei tēnā, e ngā tama a Īharaira?” e ai tā Ihowā.

¹² “Heoi, i whakainumia e koutou ngā Natari ki te wāina, ā, i ako hoki ki ngā poropiti, i mea, ‘Kaua e poropiti!’

¹³ “Nanā, ka pēhia koutou e ahau ki tō koutou wāhi, ka pērā i te pēhanga a te kāta e kī ana i ngā paihere.

¹⁴ Nā, ka kore te oma i te tangata tere, e kore e nui ake te kaha o te tangata kaha, e kore hoki te mārohirohi e mawhiti i te mate;

¹⁵ e kore anō te kaipupuri o te kōpere e tū; e kore hoki te wae tere e whakaora i a ia anō; e kore anō hoki te tangata eke hōiho e mawhiti i te mate.

¹⁶ Ā, ko te tangata māia i roto i ngā mārohirohi, ka rere tahanga atu i taua rā,” e ai tā Ihowā.