Āmoho 1 - Paipera Tapu 2012

¹ Ko ngā kupu a Āmoho, a tētahi o ngā kaitiaki hipi o Tekoa, ko tāna i kite ai mō Īharaira i ngā rā o Utia kīngi o Hūrā, i ngā rā hoki o Ieropoama tama a Ioaha, kīngi o Īharaira, e rua ngā tau i mua ake o te rū.

Te Whakawātanga ki ngā Iwi Pātata o Īharaira

² Ā, i mea ia: “Ka hāmama a Ihowā i Hiona, ka puaki hoki tōna reo i Hiruhārama; ā, ka tangi ngā haerenga hipi a ngā hēpara, ka maroke hoki te tihi o Karamere.”

³ Ko te kupu tēnei a Ihowā: “Ka toru nei ngā pokanga kētanga o Ramahiku, āe rā, ka whā, nā, e kore e whakatahuritia atu e ahau te whiu mōna; kua patua ā-wītitia hoki e rātou a Kireara ki ngā patu rino.

⁴ Engari, ka tukua atu e ahau he ahi ki te whare o Hataere, ā, ka pau i reira ngā whare kīngi o Pēneharara.

⁵ Ā, ka whati i ahau te tūtaki tatau o Ramahiku, ka hātepea atu hoki te tangata noho o te raorao o Āwene, me te kaipupuri hēpeta o te whare o Erene; ka whakaraua atu anō te iwi o Hīria ki Kiri,” e ai tā Ihowā.

⁶ Ko te kupu tēnei a Ihowā: “Ka toru nei ngā pokanga kētanga o Kaha, āe rā, ka whā, nā, e kore e whakatahuritia atu e ahau te whiu mōna; nō te mea i whakaraua e rātou te iwi katoa, hei tuku atu mā rātou ki Ēroma.

⁷ Engari ka tukua atu e ahau he ahi ki te taiepa o Kaha, ā, ka pau i reira ōna whare kīngi.

⁸ Ā, ka hātepea atu e ahau te tangata noho o Aharoro, me te kaipupuri hēpeta i Ahakerono; ka tahuri hoki tōku ringa ki Ekerono, ā, ka ngaro te mōrehu o ngā Pirihitini,” e ai tā te Ariki, tā Ihowā.

⁹ Ko te kupu tēnei a Ihowā: “Ka toru nei ngā pokanga kētanga o Tāira, āe rā, ka whā, nā, e kore e whakatahuritia atu e ahau te whiu mōna; nō te mea i tukua e rātou te iwi katoa ki Ēroma, ā, kīhai i mahara ki te kawenata a te tuakana ki te teina.

¹⁰ Engari, ka tukua atu e ahau he ahi ki te taiepa o Tāira, ā, ka pau i reira ōna whare kīngi.”

¹¹ Ko te kupu tēnei a Ihowā: “Ka toru nei ngā pokanga kētanga o Ēroma, āe rā, ka whā, nā, e kore e whakatahuritia atu e ahau te whiu mōna; nō te mea i whāia e ia tōna teina ki te hoari, ā, makā atu ana e ia te aroha katoa, heoi haehae tonu tōna riri, rongoā tonu ia i tōna riri ā ake ake.

¹² Engari, ka tukua e ahau he ahi ki Temana, ā, pau ake i reira ngā whare kīngi o Potora.”

¹³ Ko te kupu tēnei a Ihowā: “Ka toru nei ngā pokanga kētanga o ngā tama a Āmona, āe rā, ka whā, nā, e kore e whakatahuritia atu e ahau te whiu mōna. Nō te mea kua ripiripia e rātou ngā wāhine hapū o Kireara, he mea kia nui ake ai te rohe ki a rātou.

¹⁴ Engari, ka ngiha i ahau he ahi ki runga ki te taiepa o Rapa, ā, ka pau i reira ōna whare kīngi, i runga i te hāmama i te rā o te whawhai, i te paroro i te rā o te tūkauati;

¹⁵ ā, ka riro tō rātou kīngi i te whakarau, rātou tahi ko āna rangatira,” e ai tā Ihowā.