गीतरत्न 2 - पवित्रशास्त्र मराठी समकालीन आवृत्ती

नायिका

¹ मी शारोनाचा गुलाब आहे, खोर्‍यातील कमळ आहे.

नायक

² खरेच, काट्यांमध्ये कमळ तशी इतर तरुणींमध्ये माझी प्रिया आहे.

नायिका

³ जसे जंगलातील इतर झाडांमध्ये सफरचंदाचे झाड, तसा इतर तरुणांमध्ये माझा प्रियकर आहे. त्याच्या छायेत बसणे मला आनंददायी आहे, आणि त्याचे फळ मला चवीला गोड लागते.

⁴ त्याने मला आपल्या मेजवानगृहात आणावे, त्याच्या प्रेमाचा ध्वज माझ्यावर असावा.

⁵ मनुक्यांनी मला बळ द्या, सफरचंदांनी मला ताजेतवाने करा, कारण प्रेमात मी दुर्बल झाले आहे.

⁶ त्याचा डावा हात माझ्या डोक्याखाली आहे, आणि त्याच्या उजव्या हाताने तो मला आलिंगन देतो.

⁷ यरुशलेमच्या कन्यांनो, तुम्हाला रानातील मृगांची आणि हरिणीची शपथ, त्याची इच्छा आहे तोपर्यंत माझ्या प्रेमाला जागे करू नका.

⁸ ऐका! माझ्या प्रियांनो! पाहा! तो येत आहे, डोंगरामधून उड्या मारत, टेकड्यांवरून बागडत येत आहे.

⁹ माझा प्रियकर हरिणीसारखा किंवा तिच्या वत्सासारखा आहे. पाहा, तो तिथे आमच्या भिंतीआड उभा राहून, खिडक्यांतून न्याहळत आहे, जाळीतून डोकावीत आहे.

¹⁰ माझा प्रियतम मला म्हणाला, “माझ्या प्रिये, ऊठ, माझ्या सुंदरी, माझ्याबरोबर ये.

¹¹ पाहा! हिवाळा संपला आहे; आता पाऊससुद्धा होऊन गेला.

¹² पृथ्वीवर फुले उमलली आहेत; गाण्याचा ऋतू आला आहे, कबुतरांचे गीत आमच्या देशात ऐकू येत आहे.

¹³ अंजिराच्या झाडाची फळे लागली आहेत; आणि द्राक्षवेलींच्या फुलांचा सुगंध दरवळत आहे. ऊठ, ये, माझ्या प्रिये; माझ्या सुंदरी, माझ्याबरोबर ये.”

नायक

¹⁴ डोंगराच्या कपारीत, कड्यांच्या गुप्त जागी राहणारी माझी कबुतरीण, मला तुझे मुख पाहू दे, मला तुझा स्वर ऐकू दे; कारण तुझा स्वर गोड आणि तुझा चेहरा मनोहर आहे.

¹⁵ कोल्हे व लहान खोकडे, जे द्राक्षमळ्यांची नासधूस करतात त्यांना आमच्यासाठी पकडा, कारण आमच्या द्राक्षमळ्यात आता बहर आला आहे.

नायिका

¹⁶ माझा प्रियतम माझा, आणि मी त्याची आहे; कमळांमध्ये तो आपला कळप चारीत आहे.

¹⁷ दिवस संपेपर्यंत आणि सावली जाईपर्यंत, खडतर पर्वतावरच्या हरिणांसारखा किंवा लहान वत्सासारखा हे प्रियतमा, माझ्याकडे परत ये.