स्तोत्रसंहिता 87 - पवित्रशास्त्र मराठी समकालीन आवृत्ती

स्तोत्र 87

कोरहाच्या पुत्रांची रचना. एक स्तोत्र. एक गीत.

¹ त्यांनी पवित्र पर्वतावर त्यांच्या नगरीचा पाया घातला.

² याकोबाच्या सर्व नगरांपेक्षा, सीयोनाचे व्दार याहवेहला अधिक प्रिय आहे.

³ परमेश्वराच्या नगरी, तुझ्याबद्दल या उत्कृष्ट गोष्टी कथन होतात: सेला

⁴ “मी नोंद करेन की, राहाब आणि बाबिलोन हे देश माझे अस्तित्व मान्य करतात— पलेशेथ, सोर आणि कूश देखील असेच करतात— ते म्हणतील की, ‘हा सीयोनात जन्मलेला आहे.’ ”

⁵ खरोखर, त्या दिवसात सीयोनाबाबत म्हटले जाईल, “हा आणि तो सीयोनात जन्मलेला आहे, आणि प्रत्यक्ष देवाधिदेव या शहराला प्रस्थापित करतील.”

⁶ नागरिकांच्या नोंदवहीत याहवेह लिहितील: “याचा जन्म सीयोनात झाला आहे.” सेला

⁷ संगीत समारंभात ते गातील, “माझे सर्व झरे तुमच्यामध्येच आहेत.”