स्तोत्रसंहिता 72 - पवित्रशास्त्र मराठी समकालीन आवृत्ती

स्तोत्र 72

शलोमोनाची गीत रचना

¹ हे परमेश्वरा, राजाला न्यायदातृत्व आणि राजपुत्रास नीतिमत्व प्रदान करा.

² तो तुमच्या लोकांचा नीतीने न्याय करो, तुमच्या पीडितांचा न्यायनिवाडा न्यायीपणाने करो.

³ मग पर्वत लोकांना समृद्धी प्रदान करो, आणि डोंगर नीतिमत्वाची फळे उत्पादित करो.

⁴ तो लोकांमधील पीडितांचा बचाव करो आणि गरजूंच्या मुलांना वाचवो; तो जुलमीला चिरडून टाको.

⁵ जोपर्यंत सूर्य आणि चंद्र आकाशात राहतील, तोपर्यंत पिढ्यान् पिढ्या तुमचे भय बाळगून तुमचा आदर करोत.

⁶ कापलेल्या गवतावर पडणार्‍या पावसाप्रमाणे, पृथ्वीला पाणी देणार्‍या सरीप्रमाणे तो होवो.

⁷ त्याच्या कारकिर्दीत सर्व नीतिमानांची भरभराट होवो आणि चंद्र नाहीसा होईपर्यंत समृद्धी वाढो.

⁸ त्याची सत्ता एका समुद्रापासून दुसऱ्या समुद्रापर्यंत आणि नदीपासून पृथ्वीच्या दिगंतापर्यंत राहो.

⁹ अरण्यातील लोक त्याच्यासमोर नतमस्तक होवोत आणि त्याचे शत्रू धूळ चाटोत.

¹⁰ तार्शीश आणि तटवर्तीय राजे आपआपले नजराणे आणोत, शबा व सबा यांचे सर्व राजे आपले उपहार आणोत.

¹¹ होय, सर्व ठिकाणचे राजे त्याला नमन करोत; सर्व राष्ट्रे त्याची सेवा करोत.

¹² ज्यांचा कोणी सहायक नाही अशा धावा करणार्‍या दुःखितांना तो मुक्त करेल.

¹³ दुर्बल आणि दरिद्री यांची त्याला दया येवो; तो गरजवंताला मृत्यूपासून वाचवेल.

¹⁴ तो त्यांना छळ आणि हिंसा यांच्यापासून वाचवेल, कारण त्यांचे जीवित रक्त मोलाचे आहे.

¹⁵ तो चिरायू होवो! त्याला शबाचे सोने मिळो; त्याचे लोक सतत त्याच्यासाठी प्रार्थना करोत आणि दिवसभर त्याला आशीर्वाद देवोत.

¹⁶ देशभर विपुल धान्य उगवो; लबानोनच्या शिखरावर ते डोलू द्या, देशातील डोंगरही धान्याने आच्छादून जावोत; शेतातील भरगच्च गवताप्रमाणे शहरे लोकांनी भरून गजबजून जावोत.

¹⁷ त्याचे नाव सर्वकाळ राहो, जोपर्यंत सूर्य आहे, त्याचे नाव वाढत जावो. सर्व राष्ट्रे त्याच्याद्वारे आशीर्वादित होवोत, आणि ते त्याला धन्य म्हणोत.

¹⁸ इस्राएलाचे परमेश्वर, याहवेह धन्यवादित असोत, केवळ तेच महान कार्य करतात.

¹⁹ त्यांच्या गौरवशाली नावाचे सदासर्वकाळ स्तवन होवो; सर्व पृथ्वी त्यांच्या गौरवाने भरो. आमेन आणि आमेन.

²⁰ इशायाचा पुत्र दावीदच्या प्रार्थना समाप्त झाल्या.