स्तोत्रसंहिता 58 - पवित्रशास्त्र मराठी समकालीन आवृत्ती

स्तोत्र 58

संगीत दिग्दर्शकासाठी. “अल्तश्केथ” चालीवर आधारित. दावीदाचे मिक्ताम गाण्याची रचना.

¹ अहो सत्ताधीशांनो, तुमचे निकाल खरोखर योग्य असतात काय? तुम्ही लोकांचा न्याय प्रामाणिकपणे करता काय?

² नाही, विपरीत न्याय कसा करावा याचा तुम्ही आपल्या मनात शोध लावता आणि तुमचे हात पृथ्वीवर हिंसक कृत्ये पसरवितात.

³ दुष्ट लोक जन्मतःच चुकीच्या मार्गांने जातात; गर्भात असतानाच ते लबाड्या करतात.

⁴ त्यांचे विष सर्पाच्या विषासारखे आहे, ते कान बंद ठेवणार्‍या नागसर्पांसारखे आहेत,

⁵ की गारुडी कितीही कुशल असला, तरी तो गारुड्याचा सूर ऐकणार नाही.

⁶ हे परमेश्वरा, त्यांचे विषाचे दात पाडून टाका; याहवेह, या सिंहांच्या दाढा उपटून काढा.

⁷ त्यांना पाण्यासारखे वाहू द्या आणि विलीन करा; जेव्हा ते धनुष्य रोखतात, तेव्हा त्यांचे बाण लक्ष्य गाठू नयेत.

⁸ गोगलगायीप्रमाणे चिखलातच त्यांना विरघळून जाऊ द्या; सूर्याचे दर्शन न घेता मरण पावणार्‍या, अकाली जन्मणार्‍या गर्भासारखे ते होवोत.

⁹ काटेरी झुडूपात लागलेल्या अग्नीची आच तुमच्या भांड्यांना लागण्यापूर्वी— ते हिरवे असो वा वाळलेले—दुष्टही लगेच नाहीसे होतील.

¹⁰ जेव्हा दुष्टांचा सूड घेतला जाईल, तेव्हा नीतिमान लोक आनंद मानतील; दुष्ट लोकांच्या रक्ताने ते आपले पाय धुतील.

¹¹ तेव्हा लोक म्हणतील, “नीतिमानाला आताही निश्चितच प्रतिफळ मिळते; आणि खचित पृथ्वीवर यथार्थपणे न्याय करणारे परमेश्वर आहेत.”