स्तोत्रसंहिता 40 - पवित्रशास्त्र मराठी समकालीन आवृत्ती

स्तोत्र 40

संगीत दिग्दर्शकासाठी. दावीदाचे स्तोत्र.

¹ मी धीराने याहवेहची वाट पाहिली; तेव्हा त्यांनी माझ्याकडे लक्ष दिले आणि माझी आरोळी ऐकली.

² निसरड्या खाचेतून, दलदलीच्या चिखलातून त्यांनी मला बाहेर काढले; त्यांनी माझी पावले खडकावर ठेवली, आणि त्यांनी मला उभे राहण्यास भक्कम ठिकाण दिले.

³ त्यांनी आपल्या परमेश्वराचे स्तवन करण्यास माझ्या मुखात नवीन गीत दिले. हे अनेकजण पाहतील व याहवेहचे भय धरतील आणि त्यांच्यावर विश्वास ठेवतील.

⁴ जे लोक याहवेहवर भरवसा ठेवतात, जे गर्विष्ठांच्या व असत्याकडे वळणार्‍यांच्या वार्‍यासही उभे राहत नाही, ते धन्य होत.

⁵ याहवेह, माझ्या परमेश्वरा, तुम्ही अनेक चमत्कार केलेले आहेत; आमच्यासाठी तुम्ही केलेल्या योजनेची तुलना करता येत नाही; त्याबद्दल बोलावयाचे झाले तर त्यांची मोजदाद करता येणार नाही.

⁶ यज्ञ किंवा अन्नार्पणे यांची इच्छा तुम्हाला नाही— परंतु तुम्ही माझे कान उघडले आहेत; होमार्पण आणि पापार्पण यांनी तुम्हाला संतोष होत नाही.

⁷ तेव्हा मी म्हणालो, “पाहा मी येथे आहे, आलो आहे— शास्त्रलेखात माझ्याविषयी लिहिले आहे.

⁸ हे माझ्या परमेश्वरा, तुमची इच्छा पूर्ण करावी असे मला वाटते; तुमचे नियम माझ्या अंतःकरणात आहेत.”

⁹ विशाल सभेत तुमच्या तारणाच्या कृत्यांची घोषणा करतो; त्याबाबतीत मी माझे ओठ मुळीच आवरून धरीत नाही, याहवेह हे तुम्हाला माहीत आहे.

¹⁰ हे नीतिमत्व मी माझ्या हृदयात दडवून ठेवले नाही, मी तुमचा विश्वासूपणा आणि तुमच्या तारणाच्या मदतीची चर्चा करतो. सर्व मंडळीपासून तुमची प्रीतिपूर्ण दया आणि सत्य ही लपवित नाही.

¹¹ याहवेह, तुमची कृपा माझ्यापासून राखून धरू नका; तुमची प्रीती आणि विश्वासूपणा मला नेहमी सुरक्षित ठेवील.

¹² असंख्य समस्यांनी माझ्यावर मात केली आहे; माझ्या अपराधांनी माझा पिच्छा पुरविला आहे आणि ते मी पाहू शकत नाही. ते माझ्या डोक्यावरील केसांपेक्षा जास्त आहेत, आणि माझे हृदय विव्हळत आहे.

¹³ याहवेह, प्रसन्न होऊन मला वाचवा; त्वरेने या, याहवेह मला साहाय्य करा.

¹⁴ माझ्या जीव घेऊ पाहणार्‍यांना लज्जित करा व गोंधळात पाडा; त्यांना मागे हटवून त्यांची दाणादाण करून त्यांना घालवून द्या;

¹⁵ जे लोक मला, “अहा! अहा!” म्हणतात, ते स्वतःच्या लज्जेमुळे चकित होवोत.

¹⁶ परंतु जे तुम्हाला शोधतात ते तुमच्यामध्ये आनंद आणि हर्ष करोत; जे तुमच्या तारणाच्या साहाय्याची अपेक्षा बाळगतात ते सर्व हेच म्हणोत, “याहवेह किती थोर आहेत!”

¹⁷ मी गरीब आणि गरजवंत आहे, याहवेहला माझी आठवण असो; तुम्ही माझे साहाय्यकर्ता आणि मला सोडविणारे आहात; माझ्या परमेश्वरा, विलंब लावू नका.