स्तोत्रसंहिता 29 - पवित्रशास्त्र मराठी समकालीन आवृत्ती

स्तोत्र 29

दावीदाचे स्तोत्र.

¹ अहो दिव्यदूतांनो, याहवेहला गौरव आणि सामर्थ्य द्या.

² याहवेहच्या नावाला योग्य ते गौरव द्या; पवित्रतेच्या वैभवाने याहवेहची उपासना करा.

³ याहवेहची वाणी जलांवर आहे; गौरवशाली याहवेहची वाणी महा जलाशयांवर गर्जत आहे.

⁴ याहवेहची वाणी प्रतापशाली आहे; प्रभावी आहे याहवेहचा स्वर.

⁵ याहवेहच्या गर्जनेने देवदारू वृक्ष मोडून पडतात; लबानोनमधील देवदारू वृक्ष दुभंगतात.

⁶ लबानोनचा डोंगर वासराप्रमाणे आणि सिर्योन तरुण रानबैलाप्रमाणे बागडतो;

⁷ याहवेहचा आवाज कडाडतो, विजा चमकल्यासारखा.

⁸ याहवेहच्या आवाजाचा गडगडाट वाळवंटे ढवळून काढतात; कादेशचे अरण्य याहवेह कंपित करतात.

⁹ याहवेहच्या आवाजाने हरिणी प्रसवतात आणि वने पर्णहीन होतात. आणि त्यांच्या मंदिरात सर्वजण म्हणतात: “याहवेहचा, महिमा असो.”

¹⁰ याहवेह जलप्रलयावर सिंहासनावर आरूढ झालेले आहेत; याहवेहच महाराज बनून सिंहासनावर सर्वकाळ स्थानबद्ध झालेले आहेत.

¹¹ याहवेह आपल्या लोकांना सामर्थ्य देतात; याहवेह आपल्या लोकांना शांती देऊन आशीर्वादित करतात.