स्तोत्रसंहिता 21 - पवित्रशास्त्र मराठी समकालीन आवृत्ती

स्तोत्र 21

संगीत दिग्दर्शकासाठी. दावीदाचे स्तोत्र.

¹ याहवेह, तुमच्या सामर्थ्यांमुळे राजा केवढा हर्ष पावतो. तुम्ही दिलेल्या विजयामुळे तो अत्यंत उल्लासतो!

² कारण त्याचे मनोरथ तुम्ही पूर्ण केले आहेत; त्याने मागितलेली एकही गोष्ट तुम्ही अमान्य केली नाही. सेला

³ उत्कृष्ट आशीर्वादाने तुम्ही त्याचे स्वागत केले; तुम्ही त्याच्या मस्तकावर शुद्ध सोन्याचा राजमुकुट घातला.

⁴ त्याने तुमच्याजवळ जीवनाची मागणी केली— तुम्ही त्याला युगानुयुगाचे आयुष्य दिले.

⁵ तुम्ही त्याला विजय आणि बहुमान दिला; तुम्ही त्याला ऐश्वर्य व वैभव दिले.

⁶ सर्वकाळचे सुख देऊन तुम्ही त्याला संपन्न केले आणि तुमच्या समक्षतेचा आनंद तुम्ही त्याला दिला.

⁷ कारण राजाचा भरवसा याहवेहवर आहे; सर्वोच्च परमेश्वराच्या अक्षय प्रीतीमुळे तो कधीही ढळणार नाही.

⁸ तुमचा द्वेष करणारे तुमचे सर्व शत्रू तुमच्या हाती सापडतील. तुमचा उजवा हात तुमच्या विरोधकांचा ताबा घेईल.

⁹ तुम्ही युद्ध करण्यासाठी जेव्हा प्रगट व्हाल, तेव्हा तुम्ही अग्नीच्या भट्टीमध्ये भस्म केल्यागत त्यांना नष्ट कराल. आपल्या क्रोधाने याहवेह त्यांना गिळंकृत करतील, याहवेहचा अग्नी त्यांना भस्म करेल.

¹⁰ तुम्ही त्यांची संतती पृथ्वीवरून, त्यांचे वंशज मानवजातीतून कायमचे नाहीसे कराल.

¹¹ ही माणसे जरी तुमच्याविरुद्ध कट रचतात, आणि कुटिल योजना आखतात, परंतु ते यशस्वी होणार नाहीत.

¹² जेव्हा तुमचे धनुष्य ताणून तुम्ही सरळ त्यांच्यावर रोखाल तेव्हा पाठ दाखवून पळण्यास तुम्ही त्यांना भाग पाडाल.

¹³ याहवेह, तुम्ही आपल्या शक्तीने उंचविले जावो; आम्ही तुमच्या सामर्थ्याचे गुणगान व स्तुतिगान करू.