स्तोत्रसंहिता 130 - पवित्रशास्त्र मराठी समकालीन आवृत्ती

स्तोत्र 130

प्रवाशांचे आराधना गीत.

¹ याहवेह, खोल ठिकाणातून मी तुमचा धावा करीत आहे;

² माझा धावा ऐका; प्रभू, माझ्या कृपेच्या विनंतीकडे तुमचे कान लागोत.

³ याहवेह, तुम्ही आमच्या पापांचा हिशोब ठेवला, तर प्रभू आमच्यापैकी कोण उभा राहील?

⁴ पण तुम्ही क्षमाशील आहात; म्हणूनच आम्ही अत्यंत आदराने तुमची सेवा करू शकतो.

⁵ मोठ्या अपेक्षेने माझा जीव याहवेहची वाट पाहतो, आणि मी माझी आशा त्यांच्या वचनावर टाकली आहे.

⁶ पहारेकरी ज्या उत्कंठेने अरुणोदयाची वाट पाहतो, त्याहीपेक्षा अधिक उत्कंठेने मी माझ्या परमेश्वराची वाट पाहतो.

⁷ हे इस्राएला, याहवेहची आशा धर, वात्सल्य याहवेहजवळच आहे; मनुष्यांचे संपूर्ण तारण त्यांच्याचकडेच आहे.

⁸ ते स्वतः खंडणी भरून इस्राएलला सर्व पापांपासून मुक्त करतील.