स्तोत्रसंहिता 124 - पवित्रशास्त्र मराठी समकालीन आवृत्ती

स्तोत्र 124

प्रवाशांचे आराधना गीत. दावीदाची रचना.

¹ सर्व इस्राएलने हे कबूल करावे की— जर याहवेह आमच्या बाजूने नसते,

² जेव्हा मनुष्यांनी आमच्यावर आक्रमण केले होते, जर याहवेह आमच्या बाजूने नसते,

³ तर त्यांचा संताप आमच्यावर भडकला असता. तेव्हा त्या शत्रूंनी आम्हाला जिवंत गिळून टाकले असते;

⁴ जलप्रलयात आम्ही बुडून गेलो असतो व जलप्रवाहात आम्ही पार वाहून गेलो असतो,

⁵ उचंबळलेल्या लाटांनी आम्हाला गिळंकृत केले असते.

⁶ याहवेह धन्यवादित असोत; त्यांनी आम्हाला शत्रूंचे भक्ष्य होऊ दिले नाही.

⁷ पारध्याच्या पाशातून पक्षी निसटावा, त्याप्रमाणे आम्ही जिवानिशी निसटलो; पाश तुटलेला आहे आणि आम्ही मुक्त झालो आहोत.

⁸ आमच्या साहाय्याचा उगम, स्वर्ग व पृथ्वीचे निर्माणकर्ते परमेश्वर, याहवेह यांचे नाव आहे.