स्तोत्रसंहिता 120 - पवित्रशास्त्र मराठी समकालीन आवृत्ती

स्तोत्र 120

प्रवाशांचे आराधना गीत.

¹ संकटसमयी मी याहवेहकडे आरोळी मारली, आणि त्यांनी ती ऐकली.

² हे याहवेह, असत्य बोलणार्‍या ओठांपासून व कपटी जिव्हेपासून माझा बचाव करा.

³ अगे कपटी जिभे, ते तुला काय करतील, आणखी तुला कशी वागणूक मिळेल?

⁴ ते तुला योद्ध्यांच्या तीक्ष्ण बाणांनी, केरसुणीच्या लाकडांच्या निखार्‍यांनी दंड करतील.

⁵ धिक्कार असो माझा, जर मी मेशेख हे माझे निवासस्थान केले, वा केदार येथे माझा डेरा घातला!

⁶ जे शांतिप्रिय नाहीत अशा लोकांसह राहण्यात मी बराच काळ घालविला आहे.

⁷ मी तर शांतताप्रिय आहे; पण मी काही बोलताच ते युद्धास तयार होतात.