स्तोत्रसंहिता 114 - पवित्रशास्त्र मराठी समकालीन आवृत्ती

स्तोत्र 114

¹ जेव्हा इस्राएल इजिप्तमधून, परकीय भाषेच्या लोकातून याकोब बाहेर पडला,

² यहूदाह परमेश्वराचे पवित्रस्थान, आणि इस्राएल त्यांचे सार्वभौमत्व झाले.

³ तांबड्या समुद्राने हे पाहून पळ काढला, आणि यार्देन नदी माघारी गेली;

⁴ पर्वतांनी मेंढ्यांप्रमाणे आणि टेकड्यांनी कोकरांसारख्या उड्या मारल्या.

⁵ हे समुद्रा, तू पलायन का केले? अगे यार्देने, तू मागे का फिरलीस?

⁶ पर्वतांनो, तुम्ही मेंढ्यांप्रमाणे, टेकड्यांनो, तुम्ही कोकरांसारखे का बागडलात?

⁷ अगे पृथ्वी, तू परमेश्वराच्या समक्षतेत, याकोबाच्या देवासमोर, थरथर काप.

⁸ कारण त्यांनीच खडकाचे झर्‍यात रूपांतर केले, अत्यंत कणखर खडकास जलाचे स्त्रोत बनविले.