स्तोत्रसंहिता 105 - पवित्रशास्त्र मराठी समकालीन आवृत्ती

स्तोत्र 105

¹ याहवेहचे स्तवन करा, त्यांच्या नावाची घोषणा करा; त्यांनी केलेली अद्भुत कृत्ये सर्व राष्ट्रात जाहीर करा.

² त्यांची स्तुतिस्तोत्रे गा आणि त्यांचे स्तवन करा; त्यांच्या सर्व अद्भुत कार्याचे वर्णन करा.

³ त्यांच्या पवित्र नावाचा अभिमान बाळगा; जे याहवेहचा शोध करतात, त्यांचे हृदय हर्षित होवो.

⁴ याहवेह व त्यांच्या सामर्थ्याकडे पाहा; सतत त्यांचे मुख शोधा.

⁵ परमेश्वराने केलेली अद्भुत कार्ये, त्यांचे चमत्कार आणि त्यांनी केलेले न्याय यांचे स्मरण करा.

⁶ अहो त्यांचे सेवक, अब्राहामाच्या वंशजांनो, त्यांच्या निवडलेल्या लोकांनो, याकोबाच्या संतानांनो, स्मरण करा.

⁷ कारण याहवेह आमचे परमेश्वर आहेत. त्यांचे न्याय सर्व पृथ्वीवर आहेत.

⁸ जी अभिवचने त्यांनी हजारो पिढ्यांना दिली होती, ते आपला करार सर्वदा स्मरणात ठेवतात.

⁹ हा करार त्यांनी अब्राहामाशी केला, आणि इसहाकाशी शपथ वाहिली,

¹⁰ आणि त्यांनी याकोबासाठी नियम व इस्राएलसाठी सदासर्वकाळचा करार या रूपाने कायम केला:

¹¹ “मी तुम्हाला कनान देश तुमचे वतन म्हणून देईन.”

¹² त्यावेळी इस्राएली लोक अगदी मोजके होते निश्चितच थोडे, वचनदत्त देशात ते परके होते.

¹³ ते एका देशातून दुसर्‍या देशात, एका राज्यातून दुसर्‍या राज्यात भटकत असताना,

¹⁴ याहवेहने कोणा मनुष्याला त्यांच्यावर जुलूम करू दिला नाही; त्यांच्याकरिता त्यांनी राजांना दटाविले:

¹⁵ “माझ्या अभिषिक्तांना स्पर्श करू नका; माझ्या संदेष्ट्यांना इजा करू नका.”

¹⁶ त्यांनी त्यांच्या देशावर दुष्काळ आणला, आणि त्यांचा अन्नपुरवठा तोडून टाकला.

¹⁷ तेव्हा त्यांनी एका पुरुषाला— योसेफाला पाठविले.

¹⁸ इजिप्तींनी योसेफाच्या पायांना खोडे घालून इजा केली, त्याची मान लोखंडी गळपट्ट्यात अडकविली.

¹⁹ याहवेहने ठरविलेली वेळ येईपर्यंत, त्यांनी दिलेले अभिवचन पूर्णपणे पारखले जाईपर्यंत हे घडले.

²⁰ मग राजाने त्याला बोलाविणे पाठविले आणि त्याला मुक्त केले, प्रजेच्या शासकाने त्याला सोडविले.

²¹ राजाने त्याला महालाचा प्रशासक म्हणून नेमले, सर्व मालमत्तेवर त्याला अधिकार दिला.

²² त्याच्या राजपुत्रांचा सल्लागार, आणि राजाच्या मंत्र्यांना बोध देण्यासाठी त्याची नेमणूक झाली.

²³ नंतर याकोब, म्हणजे इस्राएल इजिप्तमध्ये आला; आणि उपरा म्हणून हाम वंशजांच्या देशात राहिला.

²⁴ याहवेहने इस्राएली लोकांना अत्यंत समृद्ध केले; त्यांच्या शत्रूपेक्षाही त्यांची लोकसंख्या अधिक झाली,

²⁵ त्यांच्या सेवकांविरुध्द कट करण्यासाठी परमेश्वराने इजिप्ती लोकांचे मन फिरविले.

²⁶ तेव्हा परमेश्वराने आपले प्रतिनिधी म्हणून मोशेला व अहरोनाला निवडून पाठवले.

²⁷ त्यांनी इजिप्ती समोर याहवेहचे चमत्कार केले, हामच्या भूमीवर त्यांची अद्भुत कार्ये प्रकट केली.

²⁸ परमेश्वराने अंधकार पाठवून त्या संपूर्ण देशाला अंधकारमय केले— कारण त्यांनी परमेश्वराच्या आदेशाची अवहेलना केली नाही का?

²⁹ त्यांनी इजिप्तच्या सर्व पाण्याचे रक्त केले, आणि परिणामतः त्यातील मासे मरून गेले.

³⁰ मग त्या राष्ट्रात प्रचंड संख्येने बेडके उत्पन्न झाली, राजाच्या शयनकक्षात देखील ती पोहोचली.

³¹ ते बोलले आणि गोमाश्यांचे, आणि कीटकांचे थवे प्रचंड प्रमाणात संपूर्ण देशावर आले.

³² पावसाच्या पाण्याचे गारात रूपांतर केले, आणि विजेच्या अग्निलोळांनी त्या राष्ट्रावर वर्षाव केला.

³³ त्यांचे द्राक्षवेल आणि अंजिराची झाडे त्यांनी उद्ध्वस्त केली, देशातील सर्व झाडे कोलमडून पडली.

³⁴ त्यांनी आदेश दिला आणि टोळांनी आक्रमण केले, टोळांचे थवेच्या थवे आले;

³⁵ त्यांनी देशातील सर्व हिरवळ खाऊन टाकली, आणि सर्व पिके गिळंकृत केली.

³⁶ मग त्यांनी त्यांच्या देशातील प्रत्येक ज्येष्ठ संतानास ठार केले, जे त्यांच्या पुरुषत्वाचे प्रथमफळ होते.

³⁷ त्यांनी इस्राएलास विपुल चांदी आणि सोन्यासह इजिप्तमधून बाहेर काढले, त्यावेळी त्यांच्या गोत्रातील कोणीही अडखळले नाही.

³⁸ इस्राएली लोक गेल्यावर इजिप्ती लोकांना आनंद झाला, कारण इस्राएलाच्या भयाने ते ग्रासले होते.

³⁹ याहवेहनी इस्राएलावर मेघाचे छत्र पसरले, आणि रात्री प्रकाशासाठी अग्निस्तंभ दिला.

⁴⁰ त्यांनी याचना केली, तेव्हा परमेश्वराने लावे पक्षी पाठविले; त्यांना स्वर्गातील भाकर देऊन तृप्त केले.

⁴¹ त्यांनी खडक फोडला आणि पाणी उफाळून बाहेर आले; त्याची नदी होऊन ती वैराण प्रदेशातून वाहू लागली.

⁴² कारण आपला सेवक अब्राहाम याला दिलेल्या पवित्र अभिवचनाची त्यांना आठवण होती.

⁴³ त्यांनी त्यांच्या लोकांना आनंदाची गाणी गात, व आपल्या निवडलेल्यांना हर्षनाद करीत बाहेर आणले;

⁴⁴ परमेश्वराने अनेक राष्ट्रांची भूमी यांना दिली, परक्यांनी परिश्रम केलेल्या संपत्तीचे ते वारस झाले—

⁴⁵ जेणेकरून इस्राएली लोक त्यांचे विधिनियम व त्यांची आज्ञा दक्षतेने पाळतील. याहवेहची स्तुती असो.