गणना 33 - पवित्रशास्त्र मराठी समकालीन आवृत्ती

इस्राएली लोकांच्या प्रवासातील टप्पे

¹ मोशे आणि अहरोन यांच्या नेतृत्वाखाली इस्राएली लोक आपल्या तुकडीनुसार इजिप्तमधून बाहेर पडल्यानंतर त्यांच्या प्रवासाचे टप्पे असे होते.

² याहवेहच्या आज्ञेनुसार मोशेने त्यांच्या प्रवासाच्या टप्प्यांची नोंद केली. टप्प्यानुसार त्यांचा प्रवास असा होता:

³ पहिल्या महिन्याच्या पंधराव्या दिवशी, वल्हांडणाच्या दुसर्‍या दिवशी इस्राएली लोक रामसेस येथून निघाले. सर्व इजिप्ती लोकांदेखत ते मोठ्या धैर्याने चालत बाहेर पडले,

⁴ त्यावेळी इजिप्तचे लोक आपल्या सर्व प्रथम जन्मलेल्या मुलांना ज्यांना याहवेहने जिवे मारले होते त्यांना दफन करीत होते; कारण याहवेहने त्यांच्या दैवतांवरही न्याय आणला होता.

⁵ इस्राएली लोकांनी रामसेस सोडले व सुक्कोथ येथे तळ दिला.

⁶ त्यांनी सुक्कोथ सोडले आणि वाळवंटाच्या काठावरील एथाम येथे तळ दिला.

⁷ त्यांनी एथाम सोडले व बआल-सफोनच्या पूर्वेकडे पी-हाहीरोथ कडे वळले आणि मिग्दोलकडे तळ दिला.

⁸ त्यांनी पी-हाहीरोथ सोडले व समुद्र पार रानात गेले आणि एथाम रानातील तीन दिवसांचा प्रवास केल्यानंतर माराह येथे त्यांनी तळ दिला.

⁹ त्यांनी माराह सोडले व एलीम येथे गेले, त्या ठिकाणी पाण्याचे बारा झरे व खजुरीची सत्तर झाडे होती. तिथे त्यांनी तळ दिला.

¹⁰ त्यांनी एलीम सोडले व तांबड्या समुद्राजवळ तळ दिला.

¹¹ त्यांनी तांबडा समुद्र सोडून सीनच्या रानात तळ दिला.

¹² सीनचे रान सोडून त्यांनी दोफकाह येथे तळ दिला.

¹³ त्यांनी दोफकाह सोडले व अलूश येथे तळ दिला.

¹⁴ नंतर त्यांनी अलूश सोडले व रफीदीम येथे तळ दिला. या ठिकाणी लोकांना पिण्यासाठी पाणी नव्हते.

¹⁵ रफीदीम सोडल्यावर त्यांनी सीनायच्या रानात तळ दिला.

¹⁶ मग सीनायच्या रानातून निघून त्यांनी किब्रोथ-हत्ताव्वा येथे तळ दिला.

¹⁷ नंतर त्यांनी किब्रोथ-हत्ताव्वा सोडले आणि हसेरोथ येथे तळ दिला.

¹⁸ त्यांनी हसेरोथ सोडले आणि रिथमाह येथे तळ दिला.

¹⁹ मग त्यांनी रिथमाह सोडल्यावर रिम्मोन-पेरेस येथे तळ दिला.

²⁰ त्यांनी रिम्मोन-पेरेस सोडले व लिब्नाह येथे तळ दिला.

²¹ मग त्यांनी लिब्नाह सोडले व रिस्साह येथे तळ दिला.

²² त्यांनी रिस्साह सोडले आणि केहेलाथाह येथे तळ दिला.

²³ त्यांनी केहेलाथाह सोडले आणि शेफर पर्वतावर तळ दिला.

²⁴ नंतर त्यांनी शेफर पर्वत सोडला आणि हारादाह येथे तळ दिला.

²⁵ त्यांनी हारादाह सोडले आणि माखेलोथ येथे तळ दिला.

²⁶ माखेलोथ सोडल्यावर त्यांनी तहथ येथे तळ दिला.

²⁷ तहथ सोडून त्यांनी तेराह येथे तळ दिला.

²⁸ नंतर त्यांनी तेराह सोडले व मितखाह येथे तळ दिला.

²⁹ त्यांनी मग मितखाह सोडले व हशमोनाह येथे तळ दिला.

³⁰ त्यांनी हशमोनाह सोडले आणि मोसेरोथ येथे तळ दिला.

³¹ त्यांनी मोसेरोथ सोडले आणि बेने-याकन येथे तळ दिला.

³² त्यांनी बेने-याकन सोडले आणि होर-हग्गीदगाद येथे तळ दिला.

³³ त्यांनी होर-हग्गीदगाद सोडले आणि याटबाथह येथे तळ दिला.

³⁴ त्यांनी याटबाथह सोडले आणि आबरोनाह येथे तळ दिला.

³⁵ नंतर त्यांनी आबरोनाह सोडले आणि एजिओन-गेबेर येथे तळ दिला.

³⁶ त्यांनी एजिओन-गेबेर सोडले आणि सीनच्या वाळवंटातील कादेश येथे तळ दिला.

³⁷ त्यांनी कादेश सोडले आणि एदोमच्या सीमेवरील होर पर्वतावर तळ दिला.

³⁸ याहवेहच्या आज्ञेनुसार अहरोन याजक होर पर्वतावर गेला आणि इस्राएली लोक इजिप्तमधून बाहेर आल्यानंतर चाळिसाव्या वर्षाच्या पाचव्या महिन्याच्या पहिल्या दिवशी तो तिथे मरण पावला.

³⁹ अहरोन होर पर्वतावर मरण पावला तेव्हा तो एकशे तेवीस वर्षांचा होता.

⁴⁰ कनानी अरादचा राजा कनानाच्या नेगेव येथे राहत होता, त्याने इस्राएली लोक आपल्या देशाकडे येत आहेत असे ऐकले.

⁴¹ मग त्यांनी होर डोंगर सोडून जालमोनाह येथे तळ दिला.

⁴² नंतर त्यांनी जालमोनाह सोडले व पूनोन येथे तळ दिला.

⁴³ पूनोन सोडल्यानंतर त्यांनी ओबोथ येथे तळ दिला.

⁴⁴ त्यांनी ओबोथ सोडले व मोआबच्या सीमेवरील ईये-अबारीम येथे तळ दिला.

⁴⁵ नंतर ईये-अबारीम सोडून त्यांनी दिबोन-गाद येथे तळ दिला.

⁴⁶ दिबोन-गाद सोडल्यावर त्यांनी आलमोन-दिबलाथाइम येथे तळ दिला.

⁴⁷ त्यांनी आलमोन-दिबलाथाइम सोडले व नबोजवळ अबारीम डोंगराजवळ तळ दिला.

⁴⁸ मग त्यांनी अबारीम डोंगर सोडून मोआबाच्या मैदानात यार्देन नदीजवळ यरीहो समोर तळ दिला.

⁴⁹ तिथे मोआबाच्या मैदानात यार्देनजवळ बेथ-यशिमोथापासून आबेल-शित्तीमपर्यंत तळ दिला.

⁵⁰ मोआबाच्या मैदानात यार्देनजवळ यरीहोजवळ याहवेह मोशेला म्हणाले,

⁵¹ “इस्राएली लोकांशी बोल व त्यांना सांग: ‘यार्देन पार करून तुम्ही जेव्हा कनान देशात जाल,

⁵² तेव्हा तिथे राहणार्‍या लोकांना तुमच्यापुढून घालवून द्या, त्यांच्या सर्व कोरीव आकृत्या व ओतीव मूर्त्यांचा नाश करा व त्यांची सर्व उच्च स्थाने नष्ट करा.

⁵³ देशाचा ताबा घ्या व त्यात वस्ती करा, कारण तुम्ही त्यात वस्ती करावी म्हणून हा देश मी तुम्हाला दिला आहे.

⁵⁴ तुमच्या कुळानुसार चिठ्ठ्या टाकून जमीन वाटप करावी. संख्येने मोठ्या असलेल्या गटाला मोठे वतन व लहान गटाला लहान वतन. चिठ्ठीद्वारे जे निघेल ते त्यांचे वतन होईल. तुमच्या पूर्वजांच्या गोत्रानुसार त्याची वाटणी करावी.

⁵⁵ “ ‘पण त्या ठिकाणच्या रहिवाशांना तुम्ही जर घालवले नाही, व त्यांना तुम्ही तिथेच राहू दिले, तर ते तुमच्या डोळ्यांना कुसळांसारखे आणि तुमच्या कूशीला काट्यांसारखे होतील. ज्या देशात तुम्ही राहाल त्यामध्ये ते तुम्हाला त्रास देतील.

⁵⁶ आणि मग जसे मी त्यांचे करण्याचे योजले आहे, तसे तुमचे करेन.’ ”