इय्योब 36 - पवित्रशास्त्र मराठी समकालीन आवृत्ती

¹ एलीहू पुढे म्हणाला:

² “अजून थोडा वेळ माझ्याशी धीर धरून राहा आणि मी तुला दाखवेन की परमेश्वराच्या बाजूने मला आणखी पुष्कळ बोलायचे आहे.

³ माझे ज्ञान मला फार दुरून मिळते; माझ्या निर्माणकर्त्याचे न्यायीपण मी वर्णन करून सांगेन.

⁴ ही खात्री करून घे की माझे शब्द खोटे नाहीत; ज्याच्याकडे परिपूर्ण ज्ञान आहे तो तुझ्याबरोबर आहे.

⁵ “परमेश्वर सामर्थ्यवान आहे, परंतु कोणाचा तिरस्कार करीत नाही; ते बलवान असून त्यांच्या योजनांमध्ये स्थिर आहेत.

⁶ दुष्टांना ते जिवंत ठेवत नाही परंतु पीडितांना त्यांचे हक्क देतात.

⁷ न्यायी मनुष्यावरून त्यांची नजर सरकत नाही; राजांबरोबर त्यांना ते राजासनावर बसवितात आणि सर्वकाळासाठी त्यांना थोर बनवितात.

⁸ परंतु जर लोक साखळ्यांनी बांधलेले आहेत, आणि दुःखाच्या दोरखंडात जखडलेले आहेत,

⁹ त्यांनी काय केले आहे हे परमेश्वर त्यांना सांगतात— त्यांनी गर्विष्ठपणात पाप केले आहे.

¹⁰ ते त्यांना सुधारणा ऐकून घेण्यास भाग पाडतात आणि त्यांनी केलेल्या पापांसाठी पश्चात्ताप करण्याची आज्ञा करतात.

¹¹ जर त्यांनी आज्ञा पाळल्या आणि परमेश्वराची सेवा केली, तर त्यांच्या आयुष्याचे बाकीचे दिवस ते समृद्धीत घालवतील आणि संतृप्तीची वर्षे बघतील.

¹² परंतु जर ते ऐकणार नाहीत, तर तलवारीने ते नाश होतील आणि ज्ञाना अभावी मरण पावतील.

¹³ “देवहीन हृदयाचे लोक संताप साठवून ठेवतात; त्यांना बेड्या बांधल्या, तरी ते मदतीसाठी रडत नाही.

¹⁴ त्यांच्या भर तारुण्यातच मंदिरांना जीवन समर्पित असलेल्या पुरुषगामींसह ते मरण पावतात.

¹⁵ परंतु जे क्लेश सहन करतात त्यांना परमेश्वर क्लेशातून मुक्त करतात; त्यांच्या दुःखात ते त्यांच्याशी बोलतात.

¹⁶ “दुःखाच्या जाभाड्यातून ते तुला निमंत्रण देतात आणि विशाल व मर्यादा नसलेल्या ठिकाणी, तुझ्या आरामदायी मेजावर मिष्टान्नांनी परमेश्वर तुला तृप्त करतात.

¹⁷ परंतु आता दुष्टांमुळे तुझ्यावर दंड लादला आहे; शिक्षा आणि न्याय यांनी तुझी पकड घेतली आहे.

¹⁸ सावध राहा की कोणीही आपल्या श्रीमंतीने तुला भुरळ पाडू नये; आणि मोठी लाच देऊन तुला कोणी भटकू देऊ नये.

¹⁹ तुझी श्रीमंती किंवा तुझे शक्तिशाली प्रयत्न संकटात पडण्यापासून तुला उचलून धरतील काय?

²⁰ लोकांना त्यांच्या घरातून ओढून दूर नेण्यासाठी, रात्रीच्या समयाची इच्छा करू नकोस.

²¹ दुष्टतेकडे तू वळणार नाहीस याची काळजी घे, कारण असेच दिसते की तू कष्टापेक्षा दुष्टतेची निवड करतोस.

²² “परमेश्वर त्यांच्या सामर्थ्यात उंचावलेले आहेत. त्यांच्यासारखा दुसरा शिक्षक कोण आहे?

²³ त्यांचे मार्ग त्यांच्यासाठी कोणी विदित केले आहेत, किंवा, ‘तुम्ही दुष्कृत्य केले आहे’ असे त्यांना कोण म्हणणार?

²⁴ ज्या कृत्यांबद्दल लोकांनी गीते गाऊन स्तुती केली, ती त्यांची कृत्ये आठवून त्यांची प्रशंसा कर.

²⁵ सर्व मानवजातीने हे पाहिले आहे; मनुष्य दुरूनच त्याच्याकडे टक लावून पाहतात.

²⁶ परमेश्वर किती महान आहे—ते समजणे आमच्या बुद्धीपलीकडे आहे! त्यांच्या आयुष्याच्या संख्येचे आकलन करता येत नाही.

²⁷ “ते पाण्याचे थेंब वर आकर्षून घेतात, आणि झर्‍यासाठी त्याचे रूपांतर पावसात करतात;

²⁸ मेघ आपले दहिवर खाली ओततात आणि मनुष्यांवर भरपूर वृष्टी होते.

²⁹ ढगांना त्यांनी कसे पसरविले आहे, आपल्या मंडपातून ते कसे गडगडाट करतात हे कोणाला समजते?

³⁰ पाहा ते कशाप्रकारे आपल्या सभोवती वीज विखरून ठेवतात, आणि समुद्राच्या खोलीला झाकून घेतात.

³¹ अशाप्रकारे परमेश्वर राष्ट्रांवर अधिकार करतात आणि विपुलतेने अन्न पुरवितात.

³² चमकणार्‍या विजेला ते आपल्या हातात भरतात आणि त्याच्या नेमाने तडाखा करण्यास आज्ञा करतात.

³³ त्यांचा गडगडाट येणार्‍या वादळाची घोषणा करते; पशूप्राण्यांना सुद्धा त्यांच्या येण्याचे पूर्वज्ञान होते.