इय्योब 32 - पवित्रशास्त्र मराठी समकालीन आवृत्ती

एलीहूचे प्रत्युत्तर

¹ मग त्या तिघांनी इय्योबाला उत्तर देण्याचे थांबविले, कारण आपल्या दृष्टीने तो स्वतः नीतिमान होता.

² परंतु रामाच्या कुळातील, बारकाएल बूजीचा पुत्र एलीहू खूप रागावला, कारण इय्योब परमेश्वरापेक्षा स्वतःलाच न्यायी ठरवीत होता.

³ तीन मित्रांवर देखील तो संतापला कारण त्यांनी कोणत्याही प्रकारे इय्योबाचे खंडन केले नाही आणि तरीसुद्धा त्यांनी परमेश्वराला दोषी ठरविले होते.

⁴ एलीहू आता इय्योबाशी बोलायचा थांबला होता, कारण ते त्याच्याहून वयाने मोठे होते.

⁵ परंतु जेव्हा एलीहूने पाहिले की आणखी बोलण्यास त्यांच्याजवळ काहीही उरले नाही, त्याचा राग भडकला.

⁶ आणि बूजी बारकाएलचा पुत्र एलीहू बोलला: “मी वयाने लहान आहे, व आपण वयोवृद्ध आहात; म्हणूनच मी घाबरलो, आणि मला जे माहीत आहे ते सांगण्याचे धाडस केले नाही;

⁷ मला वाटले की, ‘वयाने मोठे असलेल्यांनी बोलावे; प्रौढ असलेल्यांनी ज्ञान शिकवावे.’

⁸ परंतु व्यक्तीमध्ये असलेला तो आत्मा, आणि सर्वसमर्थाचा श्वासच आहे की जो शहाणपण देतो.

⁹ जे वयाने मोठे तेच ज्ञानी आहेत असे नसते, जे योग्य ते केवळ वृद्धांनाच समजते असेही नाही.

¹⁰ “म्हणून मी सांगतो ते लक्षपूर्वक ऐका; मी सुद्धा मला जे माहीत आहे ते सांगतो.

¹¹ तुम्ही बोलत असता, मी प्रतीक्षा करीत बसलो, जेव्हा तुम्हाला शब्द अपुरे पडत होते; तेव्हा तुमचे ते तर्कवाद मी ऐकले,

¹² लक्षपूर्वक मी तुमचे ऐकले. परंतु तुमच्यातील एकानेही इय्योबाला चुकीचे असे सिध्‍द केले नाही; तुमच्यापैकी कोणीही त्याच्या वादास प्रत्युत्तर केले नाही.

¹³ ‘आम्हाला ज्ञान सापडले आहे’ असे म्हणू नका; ‘परमेश्वराने त्याचे खंडन करावे, मनुष्याने नव्हे.’

¹⁴ परंतु इय्योबाने माझ्याविरुद्ध शब्द लढवले नाहीत, आणि तुमच्या वादांच्‍या साहाय्याने मी त्याला उत्तर देणार नाही.

¹⁵ “ते निराश झाले आहेत आणि त्यांच्याकडे बोलण्यासाठी आणखी काही उरले नाही; ते शब्‍दरहित झाले आहेत.

¹⁶ आता ते तिथे गप्प उभे आहेत, ते शांत आहेत म्हणून ते बोलतील याची मी वाट का पाहावी?

¹⁷ मी देखील माझे म्हणणे सादर करेन; मला जे माहीत आहे ते मी सुध्‍दा सांगेन.

¹⁸ कारण माझ्याकडे भरपूर शब्द आहेत, आणि माझ्या आत माझा आत्मा मला बोलावयास भाग पाडत आहे;

¹⁹ बाटलीमध्ये भरून ठेवलेल्या द्राक्षारसा समान, नवीन बुधला जो फुटायला आला आहे, त्यासारखा मी झालो आहे.

²⁰ मला आराम मिळावा म्हणून मी बोलणारच; उत्तर देण्यासाठी मी माझे मुख उघडलेच पाहिजे.

²¹ मी पक्षपात करणार नाही, ना मी कोणा मनुष्याची उगीच प्रशंसा करणार;

²² कारण मी जर कोणाची फाजील स्तुती करण्यात तरबेज असलो, तर माझा निर्माणकर्ता मला लवकरच घेऊन जाईल.