इय्योब 20 - पवित्रशास्त्र मराठी समकालीन आवृत्ती

सोफर

¹ मग सोफर नामाथीने उत्तर देऊन म्हटले:

² “माझे त्रस्त विचार मला उत्तर देण्यास प्रेरित करीत आहेत कारण मी फारच अस्वस्थ झालो आहे.

³ मला अपमानित करणार्‍या धमक्या मला ऐकायला येतात, आणि माझी सुबुद्धी उत्तर देण्यास मला प्रवृत्त करीत आहे.

⁴ “पुरातन काळापासूनची वस्तुस्थिती आणि मानवाची पृथ्वीवर उत्पत्ती झाली, तेव्हापासूनच्या गोष्टी तुला खचित माहीत आहेत,

⁵ की दुष्टाचा उल्हास हा अल्पकालीन आहे, देवहीन व्यक्तीचा आनंद क्षणभंगुर आहे.

⁶ जरी देवहीन मनुष्याचा गर्व आकाशापर्यंत पोहोचला आणि त्याचे डोके आभाळाला जाऊन भिडले,

⁷ तरी तो आपल्या स्वतःच्या विष्ठेप्रमाणे नष्ट होणार; जे त्याला ओळखीत होते, ते विचारीत राहतील, ‘तो कुठे आहे?’

⁸ तो स्वप्नासारखा विरून जाईल आणि पुन्हा सापडणार नाही. रात्रीच्या दृष्‍टांताप्रमाणे तो नाहीसा होईल.

⁹ ज्यांनी त्याला पाहिले होते, ते त्याला पुन्हा पाहणार नाहीत; त्याचे स्थान त्याच्याकडे पुन्हा पाहणार नाही.

¹⁰ त्याची मुलेबाळे गरिबांची नुकसान भरपाई करतील; आणि स्वतःच्या हातांनी आपली संपत्ती परत करतील.

¹¹ तारुण्याचा जो जोम त्याच्या हाडात भरलेला आहे तो त्याच्याबरोबरच धुळीत मिळेल.

¹² “जरी दुष्टपणा त्याच्या जिभेला गोडवा देते आणि तो आपल्या जिभेखाली ते दाबून ठेवतो,

¹³ ती चव नाहीशी होऊ नये असे त्याला वाटते म्हणून हळूहळू चघळत राहतो,

¹⁴ तरीही त्याने खाल्लेले अन्न त्याच्या पोटात आंबट होऊन त्याला पचत नाही; त्याच्या पोटात ते सापाच्‍या विषासारखे होईल.

¹⁵ गिळून घेतलेली सर्व संपत्ती त्याला थुंकावी लागणार; परमेश्वरच त्याच्या पोटातून त्याला ते ओकायला लावेल.

¹⁶ तो सापाचे विष चोखून घेईल; विषारी सापाचा दंश त्याला जिवे मारेल.

¹⁷ मधाने भरलेल्या नद्या आणि झरे जे लोण्याच्‍या प्रवाहाने वाहतात, त्यांचा उपभोग त्याला घेता येणार नाही.

¹⁸ ज्यासाठी त्याने परिश्रम केले, त्याची चव त्याला मिळणार नाही; त्याच्या व्यापाराचा नफा त्याला मिळणार नाही.

¹⁹ कारण त्याने गोरगरिबांवर जुलूम करून त्यांना निराधार सोडले; जी घरे त्याने बांधली नाहीत, ती त्याने जप्त केली.

²⁰ “त्याच्या हावेपासून त्याला कधीही सुटका मिळणार नाही; त्याची संपत्ती त्याला वाचवू शकणार नाही.

²¹ गिळून टाकावे असे आता काही उरले नाही; त्याची समृद्धी दीर्घकाल टिकणार नाही.

²² त्याच्या भरभराटीत विपत्ती त्याला गाठेल; आणि त्याच्यावर मोठ्या यातना येऊन पडतील.

²³ जेव्हा त्याने पोटभरून खाल्ले असणार, तेव्हा परमेश्वराचा प्रचंड कोप त्याच्याविरुद्ध पेटेल आणि त्याच्यावर त्यांच्या क्रोधाची वृष्टी होईल.

²⁴ लोखंडी शस्‍त्रांपासून त्याने जरी पळ काढला, तरी कास्य धनुष्‍यबाण त्याच्या पार जाईल.

²⁵ बाण त्याच्या पाठीतून तो ओढून काढेल, आणि त्याचे चमकणारे टोक त्याच्या पित्ताशयातून बाहेर येईल. तो भीतीने ग्रस्त होईल.

²⁶ निबिड अंधकार त्याच्या संपत्तीची वाट पाहत आहे, अग्नी त्याला भस्म करेल आणि त्याच्या तंबूमध्ये जे काही उरलेले आहे ते गिळून टाकेल.

²⁷ आकाश त्याचे दोष प्रकट करेल; आणि पृथ्वी त्याच्याविरुद्ध उभी राहील.

²⁸ त्याचे घर पुराने वाहून जाईल, परमेश्वराच्या क्रोधाच्या दिवशी त्याची सर्व संपत्ती पाण्याच्या ओघात नष्ट होईल.

²⁹ दुष्ट मनुष्याचा परमेश्वराने हाच वाटा नेमलेला आहे, परमेश्वराने त्यांच्याकरिता नेमलेला वारसा तो हाच आहे.”