Uleleanna Rasul 15 - Buku Masero Pa'dandi Bakaru

Angganna rasul anna perepi' ma'mesa dio Yerusalem

¹ Saemi dio Antiokhia pira-pira to Yahudi to mangngoreammo lako Puang Yesus lu dio mai Yudea, anna ma'pa'guru lako tau senga' salianna to Yahudi to mangngoreammo duka', nakua: “Ianna tae'koa' mala dipasalama'.”

² Sapo' marru nassai Paulus sola Barnabas lambisan sipekka inde taue. Napolalan nasituru'-turu'i angganna to mangngoresan ussua Paulus sola Barnabas anna pira-pira to mangngorean dio Antiokhia lao umpellambi'i rasul sola angganna perepi'na to mangngorean dio Yerusalem, anna malara umpa'mesai kara-kara iatoo.

³ Naanta'mi angganna to mangngorean dio Antiokhia sae lako salian tondok, anna mane le'ba ummola lako lembangna Fenisia anna lembangna Samaria. Ma'tetterammi lako to mangngorean dio pira-pira tondok naola kumua budami tau senga' salianna to Yahudi mangngorean lako Puang Yesus, napolalan dore' asan urrangngii.

⁴ Saei lako Yerusalem natarima manappami to mangngorean sola angganna rasul anna perepi'. Natulasammi kara-kara napogau' Puang Allata'alla ummolai pengkaranganna Paulus anna Barnabas.

⁵ Sapo' sae pira-pira to Farisi to mangngoreammo nakua: “Angganna tau senga' salianna to Yahudi to mangngoreammo lako Puang Yesus manggi' disunna' anna disua unturu' angganna pepa'guruanna Musa.”

⁶ Ma'mesami angganna rasul sola perepi' dio Yerusalem untula' kara-kara iatoo.

⁷ Masae-saei nasitimba'-timba'i, ke'de'mi Petrus anna ma'kada nakua: “Mentu'ko siulu'ku, muissanammia' kumua mangkamo' napile Puang Allata'alla illalan mai alla'-alla'mua' yolona la umpalanda' Kareba Kadoresan lako tau senga' salianna to Yahudi anna rangngii napolalan mangngorean.

⁸ Annu mangkami napakawanan Puang Allata'alla to ullosa penawanna ma'rupa tau kumua untarima duka' tau senga' salianna to Yahudi ummolai Penawa Maserona napaturun lako tau iatoo susikia'.

⁹ Anna tae'kia' naissan la napaleang, susi kita to Yahudi tenni tau senga' salianna to Yahudi, annu naseroianni duka' penawanna ura'na kapangngoreananna.

¹⁰ Ianna susi too, maakaria' ammu la ussandak-sandak Puang Allata'alla? Maakaria' ammu morai la umpapassai passanan mabanda' lako to mangngorean? Annu inde passananne mengkalao dio mai neneta sae lako kita tae' tabela tapalako.

¹¹ Sapo' taoreanna' kumua: Angga ummolai pa'kamasena Puang Yesus tangei mala salama', susi siami duka' tau senga' salianna to Yahudi.”

¹² Mengkamma' asammi angganna to dio reen anna umperangngii Paulus sola Barnabas untetteran ma'rupa-rupa tanda anna tanda memangnga-mangnga napadadi Puang Allata'alla illalan alla'-alla'na tau senga' salianna to Yahudi ummolai pengkaranganna duai.

¹³ Mangkai mantula' Paulus sola Barnabas, ma'kadami duka' Yakobus nakua: “Mentu'ko sa'do'dorangku, perangngia' tula'ku:

¹⁴ Mangkami natetteran Simon Petrus umba nakua pa'parandukanna Puang Allata'alla umpakawanan pa'kamasena lako tau senga' salianna to Yahudi, iamo napile illalan mai alla'-alla'na to la mendadi petauanna.

¹⁵ Kara-kara iatoo siundu' battakadanna Puang Allata'alla mangka nauki' nabi nakua:

¹⁶ ‘Dako la saena' umpake'de' sule banuanna Daud iato mangka roppokko, anna angganna tala kayunna la kupake'de' matoto' sule.

¹⁷ Anna malara angganna tau senga' la tinanda lako Puang Allata'alla, iamo angganna tau senga' salianna to Yahudi to mangka kutambai la mendadi petauangku. Susimi te kadanna Puang Allata'allae to umpadadi angganna kara-kara iatoo

¹⁸ to mangka umpa'peissananni mengkalao dio mai.’

¹⁹ Dadi situru' pikki'ku, tae'kia' mala ussussai tau senga' salianna to Yahudi to la mengngolomo langngan Puang Allata'alla.

²⁰ Sapo' la ummuki'kia' sura' lako anna malara tae' ummande Andean mangka dipopemala' lako dewata senga', tae' la ullullu' pa'bannetauan, tae' mala ummande rara anna balena olo'-olo' mate ditekke.

²¹ Annu mengkalao dio mai sidibaca liu pepa'guruanna Musa ke allo kotorroan illalan banua pa'sambayangan lako simesa-mesa tondok.”

Sura'na rasul napopebaa lako tau senga' salianna to Yahudi to mangngoreammo

²² Ummalami kada situru' angganna rasul sola perepi' anna angganna to mangngorean dio Yerusalem la umpile pira-pira tau illalan mai kombonganna to mangngorean la nasolalan Paulus anna Barnabas ma'pasule lako Antiokhia. Umpilemi Yudas sidisangai Barnabas anna Silas, bassi to diangga' illalan alla'alla'na to mangngorean.

²³ Dibengammi sura' nabaa. Issina inde sura'e nakua: “Salama'ki, anggangki siulu'mua' susi rasul tenni perepi', matin anggammua' siulu'ki salianna to Yahudi itin Antiokhia, Siria, anna Kilikia.

²⁴ Kikarebami kumua dengan pira-pira solaki tokke' sae matin tae' kisua, anna umpalanda' pepa'guruanna napolalan selang penawammua'.

²⁵ Iamo kingie ussituru'turu'i umpile dua tau to la ussolan Barnabas anna Paulus to kikamasei;

²⁶ to umbotoran sunga'na untetteran sanganna Puang Yesus Kristus Dewatanta.

²⁷ Dadi kipasan polepi Yudas sola Sila la umpalanda' puduk pepasangki matin susi illalan inde sura'e.

²⁸ Ummalamokan kada situru' naparunduk Penawa Masero kumua tae'koa' la dipapassanni passanan mabanda', sapo' anggami parallunna la muturu' iamo:

²⁹ Tae'koa' mala ummande Andean mangka dipopemala' lako dewata senga'; tae'koa' mala ummande rara anna balena olo'-olo' mate ditekke, ammu daua' ullullu' pa'bannetauan. Umpogau'mokoa' to kamapiaanmi ke ta'mo mupogau' kara-kara iatoo. Padami te pepasangkie. Salama'ki matin.”

³⁰ Mangkai dipatontong, mengkalaomi inde to disuae lako Antiokhia. Saei lako umpopa'mesami angganna to mangngorean dio anna beenni inde sura'e.

³¹ Dore' asammi to mangngorean dio umbacai annu napakaranga issinna inde sura'e.

³² Budapi pepakaranga sola pepakatoto' napalanda' Yudas sola Silas lako to mangngorean annu inde dua taue innang nabi duka'.

³³ Masae-saei dio Antiokhia Yudas anna Silas napabeaimi to mangngorean ma'pasule lako Yerusalem siayun kamasakkean.

³⁴ [Sapo' naporaipia Silas torro.]

³⁵ Masae-saeipi duka' Paulus anna Barnabas torro dio Antiokhia, anna ma'pa'guru sola umpalanda' battakadanna Puang Allata'alla untetteran Puang Yesus sola buda tau senga'.

Paulus sisarak Barnabas

³⁶ Masae-saei dio, nakuamo Paulus lako Barnabas: “Umbai la mapia ke laoki' ullelean sule siulu'ta lako tondok mangka tangei umpalanda' battakadanna Puang Allata'alla untetteran Puang Yesus, battu maakami.”

³⁷ Nasituru'imi Barnabas sapo' morai la ussolaan Yohanes sidikuan Markus.

³⁸ Sapo' moka Paulus annu nasanga kadanna, tae' dadi ussolaan to mangka mepellei dio Pamfilia anna moka mesolaan mengkarang.

³⁹ Sipekkami Paulus anna Barnabas napolalan sisarak. Lu lakomia Siprus Barnabas sola Markus ma'kappala'.

⁴⁰ Mengke'de' Paulus, Silas ia napile la nasolaan. Mangkai nasorong lako pa'kamasena Puang Allata'alla siulu'na to mangngorean dio Antiokhia mengkalaomi

⁴¹ ullelean tondok illalan lembangna Siria anna Kilikia umpakatoto' kapangngoreananna to mangngorean illalan simesa-mesa kombongan.