Yona 2 - Misima-Paneati

Yona Wana Awanun

¹ Yona iyoho moti tinena gamwanaa, inoke i awanun wana Yabowaine Yehoba elana,

² i ba: O Yehoba, no minanakina elana ya yoga elam, inoke anau u lahe. Yaomal hot elana ya awanun labe kaiwena, inoke anau u hago.

³ U alipalowau hogaa ya lau limwan gamwanaa hot, hoga i mipainagau. Wam bagol bwabwatal hi bini pwatawa.

⁴ Ya ba, “Iyaka u patuna owaowa-agau matamwa, yaa matau na lihin al elam wam Limi Bwabwalena elana.”

⁵ Hoga i yabomwau kelaubwa na unun, limwan i mipainagau, lumun kaunu i avan.

⁶ Ya lobek ya na paiya hot o siga oya wali siun i telipunaa, ya lau ya na Tuma, iya nige bosowaina gamagal naha tagila. Yaa owa, Yehoba no Yabowaine, yawaliu u momol heyanem panuwa milalauina o elana.

⁷ Sauga yawaliu kelaubwa ni mowasi, Yehoba ya nuwahikagiwa. No awanun i ha elam i na wam Limi Bwabwalena elana.

⁸ Bolo hi kukululuek yabowaine kakawel elal, iyaka hi towaagiwa, nige hi nunuwana-agiwa.

⁹ Yaa alou no ba mulolu bwasumu na powonan eliyam, ge na ginol ni ola no bateli eliyam. Pwamwal i noem Yehoba eliyam.

¹⁰ Inoke Yehoba i ba moti i na Yona i mamanuvi-an datuwa.