Hibilu 1 - Misima-Paneati

Yeisu Aneloseyau I Bwata Lakel kaiwena Iya Yehoba Natuna

¹ Valila sauga tomaha ge tomaha ge kamwasa tomaha ge tomaha elal, tubulau Yehoba wana baaba hi hagowa palopitau elal,

² yaa sauga ya elana, iya sauga mowamowasena, Yehoba wana baaba ta hagowa Natuna elana. Iya eliyana Yehoba panayawi ge labulabum i ginolil, ge iya Yehoba i hile abwe bugul gegewena ni minek elana ge ni logugui-an.

³ Iya Yehoba wana wasawasa mwananalina ge iya i ola hot Yehoba. Iya wana baaba ana gasisi i gan inoke baaba o eliyana bugul gegewel bolo hi gan i pagasisi-agil ge hi gangan ya. Iya i yaomal gamagalau wali gegi ni ul yoho, yaka i na labulabumwa ge i misiyowa Yehoba Tobwabwatana Hot labena awonaa.

⁴ Inoke sauga ya iya aneloseyau i bwata lakel, i ola te alan mihahaina toto Yehoba i tun pwatanek elana aneloseyau alaliya i lake.

⁵ Iya alana i miha, kaiwena Yehoba iyaka i baek elana i ba: “Owa natu; lan ebe ya awa natunagiwa.” Ge iya bana Yehoba i ba: “Nau na ola Tamana, ge iya ni ola Natu.” Yaa nige sauga etega Yehoba i babaa ola to aneloseyau kaiweliya.

⁶ I ola al, sauga Yehoba Natuna gamaun i patuna i nem panayawiya, inoke i ba, “No aneloseyau gegewel nihi kululu elana.”

⁷ He aneloseyau baliya Yehoba i ba: “No aneloseyau ya ginolil nihi ola mana, heliya no totuwalali nihi ola ginaha memena.”

⁸ Yaa Natuna bana i ba: Yabowaine owa, wam abalogugui i mihot nige ni momowasi; alom ge wam pagan sasapona wam gamagalau u logugui pasapol.

⁹ Pagan sasapona u yaliyaya-an ge pagan nanakina u towani, inoke ginebi ge wam yaliyaya bwabwatana, nau wam Yabowaine enonu ya ligin kokowamwa ge ya telewa alomwau nu logugui-agil.

¹⁰ I ola al Yehoba i baek Natuna elana i ba: Babala, abatelipuna elana owa panayawi u ginol, ge labulabum iya nimwam mulina.

¹¹ Panayawi ge labulabum nihi mowasi, yaa owa nu mihot. Heliya nihi nak ni ola kaliko i beyaunana ge i nak.

¹² Abwe nu ginol ola-agil ni ola holahola hi gagabom, abwe nu pil getogaagil ni ola gamagalau ali kaliko hi sesensi. Yaa owa nige u gegetoga, ge yawalim nige ana abamowasi i gagan.

¹³ He Yehoba i baek Natuna elana i ba: “U misiyowa labeu awowa ana siga am topihigelgel na teli lowagil aem gabulanaa.” Yaa nige sauga etega i babaa ola to anelose etega elana.

¹⁴ He aneloseyau henalau? Heliya yayaluwa hi totuwalali Yehoba elana ge i papatunal gamagalau bolo abwe pwamwal hi aahe hi lalabel.