Abatelipuna 16 - Misima-Paneati

Hega Isimel I Ab

¹ Abalam lagona Selai nige Abalam natuna etega i aab. Yaa wana totuwalali loloyowanina meluyovana etega i gan alana Hega, Itipita yovana,

² inoke Selai i baek Abalam elana i ba, “Yehoba i kausau nige ya aab. He nu na alom no totuwalali loloyowanina meluyovana nuku kenukenu, yaka ebo ni liyan ge ni ab, inoke wawaya o na awa natuni.” Yaka Abalam i talam.

³ Inoke Selai wana totuwalali loloyowanina Hega i en pwatanik Abalam elana i ola lagona etegana al|. He ginol ya i gana wali minamina Kenani elana ana baliman elulutega enaa.

⁴ Abalam alona Hega hi kenukenu yaka i liyan. Sauga i atena i liyan, inoke Selai i kite lowan.

⁵ Yaka Selai i baek Abalam elana i ba, “Owa wam nak te. No totuwalali ya pewa eliyam, inoke sauga i liyan, yaka i kite lowagau. Yehoba ni hilela henala ge i sapu, owa o ebo nau.”

⁶ Abalam Selai anana i lahe i ba, “He iya wam totuwalali loloyowanina i minaa wam logugui eliyana. Nu ginol elana ni ola hauna wam nuwatu.” Inoke Selai Hega ana hehegan i apapanak-an, yaka i lou luwai.

⁷ Yaka Yehoba wana anelose Hega i pwawaa wewel bwanapitpit etegana gegelinaa labi kekevana elana, panuwa Sul ana kamwasa bebenaa.

⁸ Yaka i ba, “Hega, Selai wana totuwalali loloyowanina, ga u noem, ge ga u nana?” Yaka anana i lahe i ba, “No nevenak Selai ya lou luwai.”

⁹ Yaka Yehoba wana anelose i ba, “U sikal u na wam nevenak eliyana ge nu minaa wana logugui gabulanaa.”

¹⁰ Yaka i ba vevehe al i ba, “Bwaliga tubutubumwau na pagewel nabiyan ge nige bosowaina gamagal etega ni vasilel habal.”

¹¹ Yaka i baek al elana i ba: “He iyaka u liyan tei, ge abwe nu ab natum melutau. Yaka alana nu tun Isimel, kaiwena wam kahin Yehoba iyaka i hago.

¹² He totona ni logugui-an ni ola ewalili. Ni pihigelgel gamagalau gegewel elal, ge gamagalau gegewel nihi pihigelgel elana. Ge nige alonau ge tutunau nihi mimibubun.”

¹³ Inoke Hega Yehoba, iya i baaba elana, alana i tun “Yabowaine toto i kiteyau,” kaiwena i ba, “Age Yabowaine toto i kiteyau ya kite.”

¹⁴ Heiya te kaiwena gamagalau wewel o alana hi tun, “Wewel Yabowaine yawalina gaganina i kiteyau.” He wewel o iyoho panuwa bolo Keides ge Beled ali luwaluwala.

¹⁵ Inoke Hega Abalam natuna melutauina i ab, yaka Abalam wawaya alana i tun Isimel.

¹⁶ He Abalam wana baliman 86 te Hega Isimel i ab.