2 Samuwela 23 - Misima-Paneati

Deibid wana Wona Mowamowasena

¹ Tomihahaina Hot abamina bwabwatana i pek Deibid Diyesi natuna elana, Yakobo wana Yabowaine i hile ni tabwa kin, ge iya Isileli wali wona waiwaisal ana totomwatomwa. He wana wona mowamowasena ana baaba i ola hiwe:

² Yehoba Yayaluwana wana baaba i baunanim na baunan, iya wana liwaliwan elau na pamasal.

³ Isileli wala Yabowaine, iya wala Pat abalou, i baem elau i ba: “Ebo gamagal etega ni tologugui alona wana ginol sasapona, ebo ni nul alona nau Yabowaine o lovakun,

⁴ he iya i ola sabwelu matakululuna sauga i haha mwelulugaa, nige ana yaluyalu, i ola kehe mwawin i pahun i siun bilibiliya, ge sabwelu i yane namanamalina.”

⁵ Nau alowau tubutubuwau Yabowaine i hilema naha kin. Wana bateli i baunan eliyau ni mihot, bateli o iya i nuwatuan ge ni patunahot. Sauga gegewena i pwamwalau ge waisi toto nuwau nasi ni ba ni gan.

⁶ Yaa gamagalau nanakil ni apapanak-agil ni ola pepesala ta tomwa yohil, heliya nige bosowaina niman elana ta libhikagil.

⁷ Nige bosowaina nimala awawana elana ta tuwalali-an, iyai te etuwalali aiyan ge ebwakil elana bosowaina ta tomwa palol, yaka abwe ta pahel ge ta ton olagil. Deibid wana tolohaveyan gamwaliyaa, enuna alaliya i bwata, kaiwena heliya toasiyala ge ginol gasigasisel enuna hi ginolil haveyan enuna gamwaliyaa. (puna 8-39)